2 Cô-lin-tô 10

1Yaz, six Phao-lô — ah lanh munh pongh nyâuh nyăngz săngx huđ six đah mâyc đoonh, six tauv ninyh gâyh nyâuh yâuc pungx stimz njoongh nzongf — wâyc Zâu Jix-Tuz nyăngz stimz dlênc yâuc nyâuđ gongx bix joođ nyâuh. 2Yaz joođ nyâuh năngx gâyf yac yaz, ninyh pongh nyâuh nyăngz săngx huđ bix năngx zuc ayx minb njoongh coong, cayx năngđ yaz ayx minb njoongh nzeengz cloon laic nyâyh buz six jinh đangh âyz stinb a ayx wax đomc munh nâyx. 3Wâyc zuc manyf săngh yămz nây stinb a, six buz lauf max âyz nây stinb a bopc zax. 4Wâyc buz bopc zax nyăngz tungh zăngc six max zâyf nây stinb a nyăngz, six nongc Zâu Tênb-Huungh nyăngz tômx jab, nongc bopc lunc nzuf muif huungđ nyăngz coonz tay, yâuc bopc lunc nzuf munh nzeengz nyăngz gâyf 5cloon muif huungđ phutx taih nzeengz cloon pâyz Zâu Tênb-Huungh nyăngz jau wax đomc, yâuc ayx phunz muif huungđ zux ix zuc lauf buc Zâu Jix-Tuz nzuf; 6yâuc naih nyâuđ bênc săngh nongc phađ ayx nyâuđ nhlengc wax đomc, zu tauv laiv zanyf nyâuh mungv wac tuz clăkx clunh nzuf.

7Nyâuh cungb mangc muif huungđ yămz cungh ngwaic cuungv. Năngđ coong naih mănv zen tingc coong nănh six săngh Zâu Jix-Tuz nyăngz munh, wax tauh six lauf oix zuc cănh pâyz coong: nănh săngh Zâu Jix-Tuz nyăngz munh, buz lauf săngh Zâu Jix-Tuz nyăngz munh. 8Max cun yaz naih ayx nzetx lub tanv yaz tuz taih nyăngz lokx jangx, six Zâu sađ phunz nyăngz lokc jangx nongc zâyv nyâuh max zâyf nongc mêtc nyâuh, yaz songđ max numđ nyayz, 9yaz max zâyf oix nongc yaz ja nyăngz jenx huukb phunz nyâuh cumh nzav. 10Wâyc naih munh coong: “Nănh manyf ja wax đomc jenx coong wac mungv six cayx năngđ nzongf yongb, six tauv senz naih minb yămz nây leenf max setb siv coong tuz laiv huungđ.” 11Coong nâyx đomc wac nyăngz munh oix zuc pâyz coong, max naih minb nyăngz săngx huđ buz coong yămz nâyx đomc jenx cah njaf nyăngz wac ayx năngđ laix, tauv naih minb buz six lauf ayx năngđ wa nâyx.

12Wâyc buz max nzađ payh max six pây buz ănz cloon wax đomc cănh zanyb lub nyăngz munh. Wax đomc munh — six cănh stiz gaob ănz stiz, yâuc cănh zoz stiz nyăngz stinb pây ănz stiz — songđ max pâyz luungđ. 13Nzof, buz yâuc max cănh tanv buz laiv huungđ blătc mutb, six cungb âyz năngđ Zâu Tênb-Huungh jaoz phunz buz nyăngz phănc cuungv, yâuc taih tauv nyâuh. 14Wâyc buz six max zâyf ninyh blătc buz nyăngz mutb, cayx năngđ cah đangc max zeengx ninyh nyâuh wa nâyx, max cun buz cah đangc ninyh tauv nyâuh wa păngc Zâu Jix-Tuz nyăngz Cuđ Jenx, 15buz max cănh tanv laiv huungđ tuz blătc mutb, yămz munh ayx taih nyăngz cumh pâuz, six wâyc nyâyh mungc oix nyâuh nyăngz zen stimz hayh tuz pâu đuungx staox, phunz buz ayx nyăngz cumh pâuz hayh tuz ninyh quăng staox, 16phunz buz nzăngđ hayh nzônh Cuđ Jenx yămz gâyh nyâuh côz wax đomc stâyz phangz — nzof buz yâuc max cănh tanv buz ayx taih yămz munh nyăngz cah đangz wax đomc.

17“Six laiv lanh cănh tanv nănh, oix zuc tanv yămz Zâu cah njaf.”

18Wâyc max zâyf coong laiv lanh cănh tanv nănh nyăngz stinb nănh bix tuz nyenc, six cungb tuz Zâu tanv nyăngz munh cuungv.