1 Cô-lin-tô 5

1Senz nyăngz six numđ lănv coong, yămz nyâuh wa naih ayx pongz lauh nyăngz jau, nzof nâyx huungđ pongz lauh nyăngz jau njinh yămz wax đomc pitc stingx munh lôx max naih ayx năngđ nâyx — coong naih ah lanh munh cănh zoz pha nyăngz au nongc. 2Nzof nyâuh yâuc năngx ayx nzetx lub, nyâuh lauf max pâyz stauh luungđ, wâyc pamf stoif năngđ nâyx nyăngz munh six zuc zoz setb nyâuh ninyh. 3Wâyc, yaz nyăngz stinb manyf max cloon nyâuh yămz six yaz nyăngz nyâuđ lauf cloon nyâuh yămz, yaz yâuc tingc ayx nâyx huungđ stoif nyăngz munh, cayx năngđ yaz jinh đangh naih minb yămz wa nâyx. 4Laiv zanyf nyâuh căpx dlonf, yămz pănh nyăngz Zâu, six Zâu Yê-su Jix-Tuz nyăngz manyh, cloon yaz nyăngz stimz nyâuđ, cloon pănh nyăngz Zâu, six Zâu Yê-su nyăngz tômx jab, 5bix stungx wax tauh munh phunz Sax-tanx nongc mêtc nănh nyăngz stinb a, ayx phunz nănh nyăngz mengc hoonh hayh tuz njâuv, tauv Zâu taih wax noib. 6Nyâuh ayx nzetx lub nyăngz jau six max gongx ah tiny. Nyâuh max pâyz tuz coong tix cay piny hayh ayx phunz săngh tungđ văn phutx nzuf haz? 7Oix zuc quanyf nzuf lôx nyăngz piny, phunz nyâuh tuz pênx săngb nyăngz văn, nongc ayx cayx năngđ cay max ănz piny nyăngz nzu nâyx. Wâyc Zâu Jix-Tuz six Pyenv Mengc Stêtz nyăngz pax jiz yuungh jenz, yâuc zuc tayx nongc ayx stanyb lanyh. 8Wâyc nây, pănh oix zuc quaix stêtz, max zâyf nongc lôx nyăngz piny, yâuc max zâyf nongc ayx huđ ayx okx nyăngz piny, six nongc max ănz piny nyăngz nzu nây six nyâuđ zac cloon senz gâyf.

9Yaz ja nây jenx phunz nyâuh six êu năngx gâyf cloon wax đomc pongz lauh munh ayx toic — 10six yaz max zâyf coong yămz nây bamh canz wax đomc pongz lauh nyăngz munh, cloon mauh tax huungđ nyăngz munh, cloon jaf munh nyăngz munh, cloon ninyh congx miuc hanyh nyăngz munh wax đomc, năngđ coong nâyx, nyâuh six zuc setb nây bamh canz ninyh. 11Six nâyx zanyf yaz ja phunz nyâuh six êu năngx gâyf cloon tinyh phanv laiv lanh tuz hipđ ayx yâuf pez, bix năngx ninyh ayx pongz lauh, mauh tax huungđ, congx miuc hanyh, hayh mađ munh, hopb tiu binz, max six jaf munh wax đomc ayx toic; njinh năngx gâyf cloon nâyx đomc munh songc hinh nhlinc năngv. 12Wâyc yămz cungh ngwaic wax đomc munh six max nongc tauv yaz stămđ? Ha max zâyf nyâuh six hoopđ zuc stămđ yămz cah njaf wax đomc munh haz? 13Nzof yămz cungh ngwaic wax đomc munh six Zâu Tênb-Huungh cănh stămđ.

“Oix zuc zoz okx nyăngz jau quanyf ninyh năngx gâyh nyâuh.”