1 Cô-lin-tô 6

1Nyâuh naih lanh cloon lanh tinyh nzeengz, săngh laix ninyh phunz max peengh stimz nyăngz munh stămđ, bix max phunz wax đomc đăngb zeengh nyăngz munh stămđ heh? 2Ha nyâuh max pâyz tuz coong wax đomc đăngb zeengh munh six stămđ bamh canz haz? Nzof năngđ coong bamh canz six zuc nyâuh stămđ, ha nyâuh bix max hayh stămđ tuz nâyx đomc jenz stăm nyăngz dlayc mah? 3Nyâuh max pâyz tuz coong pănh six stămđ wax đomc stinz munh haz? Năngđ nâyx, nây stâyv sangc nyăngz dlayc bix naih luungđ heh? 4Năngđ nây, nyâuh naih tinyh cooux yămz nây stâyv sangc nyăngz dlayc, săngh laix nyâuh bix ninyh nongc yămz jiux pangx cah njaf max setb luungđ wax đomc munh stămđ heh? 5Yaz coong ayx nâyx nongc phunz nyâuh numđ nyayz. Ha, yămz nyâuh cah njaf bix max naih mănv naih tongb manyh hayh stămđ tuz nyâuh mah? 6Nyâuh lanh cloon lanh tinyh nzeengz, bix zef năngx ninyh yămz wax đomc max zen nyăngz munh cah đangc stămđ wax đomc dlayc naz? 7Wâyc nây, yămz nyâuh naih tinyh nzeengz nyăngz jau, lôx săngh stoif nzof gôh. Wâyc yămz nyâuh cah njaf naih lanh cooux lanh nyăngz dlayc? Ha săngh laix bix max nođ zuc stâyb? Săngh laix bix max nođ zuc jaf? 8Six, nyâuh cănh ayx max hoođ, zef năngx plănc minb, yâuc ayx nâyx ănz cănh nyăngz yâuf pez! 9Ha nyâuh max pâyz tuz coong max peengh stimz nyăngz munh six max tuz stipx Zâu Tênb-Huungh nyăngz côkz haz? Năngx gâyf cănh njaf pănh; tinyh phanv ayx pongz lauh nyăngz munh, paix miuc hanyh nyăngz munh, văngf munh nyăngz munh, munh pha zoongz ayx munh nzif, munh pha cănh nongc munh pha, munh nzif cănh nongc munh nzif, 10ayx stac nyăngz munh, mauh tax huungđ, tiu binz munh, mađ munh nyăngz munh cloon puv maoh nyăngz munh, six max tuz stipx Zâu Tênb-Huungh nyăngz côkz. 11Nzof cah đangc nyâuh lauf naih ah phanx ayx năngđ nâyx, six păngc yămz Zâu Yê-su Jix-Tuz nyăngz manyh, cloon pănh nyăngz Zâu Tênb-Huungh nyăngz Singx-Lingh, nyâuh bix tuz quanyf nzuf, săngh đăngb zeengh, yâuc tuz stunx ayx peengh stimz.

12“Muif huungđ yaz six ayx tuz,” six max zâyf muif huungđ hayh tuz gongx. “Muif huungđ yaz six ayx tuz,” six yaz max phunz laiv huungđ stayb yaz ayx nâuh. 13“Nhlinc hopb six wâyc stib, stib six wâyc nhlinc hopb,” six Zâu Tênb-Huungh mêtc njinh nâyx huungđ cloon wax huungđ nzuf. Nzof stinb a six max zâyf wâyc phunz pongz lauh nyăngz jau, six wâyc phunz Zâu, nzof Zâu six wâyc phunz stinb a. 14Zâu Tênb-Huungh ayx phunz Zâu săngh taih, six lauf nongc Nănh nyăngz jab ayx phunz pănh săngh taih. 15Nyâuh max pâyz tuz coong nyâuh nyăngz stinb six Zâu Jix-Tuz nyăngz stinb sangc haz? Ha nâyx, pănh bix cayx nzâyz Zâu Jix-Tuz nyăngz stinb sangc, ninyh ayx săngh maic phăngh munh nyăngz stinb naz? Cănh mayv tuz ayx nâyx! 16Ha nyâuh max pâyz coong laiv lanh ninyh tac maic phăngh munh sab six cloon nănh songc ah nomz stinb haz? Wâyc naih ja coong: “Iz lanh six săngh ah nomz stinb.” 17Nzof laiv lanh songc cloon Zâu six cloon Nănh songc ah stinz mengc. 18Oix zuc pyenv goib pongz lauh nyăngz jau! Munh longđ nyăngz muif huungđ stoif six cungb yămz stinb a cungh ngwaic cuungv, six laiv lanh ayx pongz lauh nyăngz jau six pamf stoif cloon cănh nyăngz stinb. 19Ha nyâuh max pâyz tuz coong cănh nyăngz stinb six Zâu Singx-Lingh nyăngz congx tinc yămz nyâuh cah njaf haz, senz nyâuh tuz stipx tăng Zâu Tênb-Huungh taih wax Tauh? Nzof nyâuh six max zâyf săngh nyâuh cănh nyăngz nzof, 20wâyc nyâuh tuz suc lauf nyăngz zax senz saix nzongf. Wâyc nây, oix zuc nongc cănh nyăngz stinb ayx phunz Zâu Tênb-Huungh tuz gwăngz eeng.