Skip to content
BibleKenya

Dao Ao Dai Literal Text

1 Cô-lin-tô 7

Nzof coong tauv nyâuh ja jenx naic wax đomc jau: “Yaz nyâyh taih munh pha max nongc munh nzif six năngx gongx têx.” Six wâyc naih pongz lauh nyăngz jau, muif lanh munh pha oix zuc naih cănh nyăngz au, nzof muif lanh munh nzif oix zuc naih cănh nyăngz langh. Langh six oix zuc nyunc âyz cănh nyăngz au, nzof au lauf oix zuc nyunc âyz langh ayx năngđ nâyx. Au six max naih gâyf cun cănh nyăngz stinb, six langh cun. Lauf tinyh năngđ, langh lauf max naih gâyf cun cănh nyăngz stinb, six au cun. Năngx gâyf lanh pyenv lanh, blătc nzuf iz lanh hoopđ nyâuđ zoz săngx huđ congv, nongc phunz nyâuh hayh nzuf stimz cloo Zâu, blătc wa oix zuc tinyh songc yămz, săngx đanyf Sax-tanx păngc yămz nyâuh max cun tuz cănh nyăngz săngx huđ bix taih stâyv nyâuh.

Six, yaz coong ayx nâyx cayx năngđ hoopđ zuc coong, max zâyf yaz setb lanyf. Yaz nyâyh taih, tuz mungc muif lanh munh tuz cayx năngđ yaz nâyx. Six, mănv yâuc cănh tuz mănv nyăngz sâuđ nyâyc max tinyh năngđ tăng Zâu Tênb-Huungh, nâyx lanh tuz năngđ nâyx, wax lanh yâuc tuz năngđ wa. Nzof năngx naih wax đomc max zeengx zoongz pyau nyăngz munh cloon wax đomc au qua, yaz quinb coong stiz năngđ phanv nâyx yămz, cayx năngđ yaz nâyx six năngx gongx têx. Six năngđ coong stiz max cun tuz cănh nyăngz stinb, stiz six oix zuc zoongz pyau. Wâyc zoongz pyau six năngx gongx têx zuc pongz lauh tâuf sac. Năngx naih wax đomc zoongz pyau nyăngz munh yaz setb lanyf — max zâyf tăng yaz, six tăng Zâu — coong au max tuz gâyh langh (six năngđ coong au zuc queengx, yâuc oix zuc cănh yămz, max six zef muf hoopđ cloon cănh nyăngz langh), nzof langh lauf max tuz queengx au. Nzof năngx yăngc nzac wax đomc yaz yâuc setb lanyf — nây six yaz, max zâyf Zâu — năngđ coong naih tix lanh yâuf pez naih au max zen Zâu, bix au lauf nyunc cloon nănh yămz, nănh six max tuz queengx au. Năngđ coong naih tix lanh munh nzif naih langh max zen Zâu bix wax tauh langh lauf nyunc cloon nănh yămz, wax tauh au six max tuz queengx langh. Wâyc langh max zen păngc au zen bix tuz coi nyâuđ, nzof au max zen păngc langh zen bix tuz coi nyâuđ. Năngđ max têx nyâuh nyăngz sây six max đăngb zeengh, bix nâyx zanyf stiz yâuc tuz đăngb zeengh. Six năngđ coong max zen wax tauh cănh oix queengx, bix phanv phunz nănh queengx. Wax lanh yâuf pez max six ô stayx yâuc max zuc stayb yămz nâyx stinz jau, wâyc Zâu Tênb-Huungh six êu pănh peengh oonz nyăngz yămz. Wâyc, ô stayx lex, nyâuh laiv pâyz tuz heh, săngx đanyf nyâuh zef cănh njâuv tuz nyâuh nyăngz langh hec? Nzof, Yâuf pez lex, nyâuh laiv pâyz tuz heh, săngx đanyf nyâuh zef cănh njâuv tuz nyâuh nyăngz au hec? Năngđ max têx, Zâu cănh jaoz phunz săngh lanh munh ayx năngđ laix, Zâu Tênb-Huungh êu pănh taih yămz ayx năngđ laix, oix zuc năngđ wa nâyx yămz. Nzof yaz tingc săngh năngđ nây nâyx nzaox yămz muif nomz jiux pangx. Laiv lanh ayx quaix catz blătc bix tuz sên taih? Wax lanh munh six năngx gâyf ayx cayx năngđ max quaix catz. Laiv lanh max zeengx ayx quaix catz bix tuz sên taih? Wax lanh munh six max nongc ayx quaix catz. Quaix catz six max naih luungđ, nzof max quaix catz lauf max naih luungđ, nongc sen six oix zuc ayx âyz Zâu Tênb-Huungh nyăngz lanyf. Laiv lanh yămz ayx năngđ laix bix tuz sên taih, six oix zuc yămz ayx năngđ wa nâyx. Nyâuh ayx nâuh bix tuz sên taih mah? Năngx gâyf phunz nâyx huungđ ayx nyâuh plungh plănb. Six năngđ coong nyâuh naih congv tuz pungx goib taih, six oix zuc ayx pungx goib nyăngz munh. Wâyc ah lanh nâuh munh tuz Zâu sên taih, six pênx Zâu nyăngz pungx goib nyăngz munh. Lauf tinyh năngđ, laiv lanh ayx pungx goib nyăngz munh bix tuz Zâu sên taih six pênx Zâu Jix-Tuz nyăngz nâuh. Nyâuh tuz suc lauf saix nzongf nzof; năngx gâyf ninyh ayx bamh munh nyăngz nâuh gôh. Nyâuh laiv lanh yămz ayx năngđ laix bix tuz sên taih, six phanv njinh luh cloon Zâu Tênb-Huungh yămz ayx năngđ wa nâyx.

Năngx naih wax đomc tanz stinb yămz nyăngz munh, yaz max naih Zâu nyăngz lanyf. Six tuz Zâu nyăngz pôz bix tuz pênx ah lanh săngh zen nyăngz munh, yaz coong ayx nâyx. Wâyc cayx setb taih nyăngz zâuđ nanc, yaz nyâyh taih, năngđ coong ah lanh munh phanv nâyx cănh yămz six năngx gongx têx. Năngđ coong nyâuh zuc stayb cloon au? Six năngx gâyf lov jau tinyh gâyh. Six năngđ coong nyâuh max zeengx zuc stayb cloon au? Six năngx gâyf lov au. Six năngđ coong nyâuh zoz au, nyâuh six lauf max longđ stoif; nzof năngđ coong ah lanh munh sab đăngb zoz langh, nănh lauf max longđ stoif. Six, zoongz pyau nyăngz munh hayh pongh zuc đuungx huungđ stauh jau yămz nây stâyv sangc, yaz six oix nongc nyâuh tuz gâyh đutb nâyx đomc jau. Wâyc nây, yâuf pez lex, yaz coong nâyx đomc jau bux nyâuh: Săngx huđ max naih đao gôh, tăng nâyx staox ninyh, njinh naih au nyăngz munh lauf oix zuc ayx cayx năngđ max naih nâyx; laiv lanh haoh, six ayx cayx năngđ max haoh; laiv lanh nyađ, six ayx cayx năngđ max nyađ; maif nyăngz munh, six ayx cayx năngđ max naih luungđ; laiv lanh nongc nây bamh canz nyăngz jax toongx, six ayx cayx năngđ max nongc; wâyc nâyx nomz bamh canz six jinh đangh quaix ninyh. Nzof, yaz yâuc oix nongc nyâuh tuz max naih luungđ zenv nyâuh. Tanz stinb yămz nyăngz munh six cungb nyâyh tauv Zâu nyăngz cumh pâuz cuungv, nyâyh ayx laix nzăngđ tuz Zâu numđ nyađ. Six naih au nyăngz munh pha cungb nyâyh nây stâyv sangc nyăngz jau, nyâyh ayx laix nzăngđ tuz hoođ cănh nyăngz au, nănh songđ naih quenđ nyâuđ. Tanz stinb yămz nyăngz munh nzif cloon munh sab đăngb lauf ha, cungb nyâyh tauv Zâu nyăngz cumh pâuz cuungv, nyâyh ayx laix tuz njinh nănh nyăngz stinb a cloon mengc hoonh tuz đăngb zeengh. Six zoongz pyau nyăngz munh nzif yâuc quenđ nyâuđ nây stâyv sangc nyăngz jau, nyâyh ayx laix tuz hoođ cănh nyăngz langh. Yaz coong nâyx six wâyc phunz nyâuh tuz gongx, max zâyf stiv ploz nongc lopb nyâuh, six oix nongc tuz nzuf stimz ayx Zâu nyăngz cumh pâuz, yâuc max naih luungđ quenđ nyâuh. Six năngđ coong laiv lanh numđ max săngh phunz cănh nyăngz sab đăngb yămz blătc toongv — năngđ nây wax tauh sab six oix zuc zoongz pyau — wax lanh munh phanv âyx nănh nyăngz stimz ayx. Nănh yâuc max longđ stoif; oix zuc phunz stiz zoongz pyau. Nzof năngđ coong laiv lanh tingc nyâuđ, max numđ naih luungđ stayb, yâuc cănh âyz nănh nyăngz stimz bix yămz nyâuđ tingc săngh — nzauf cănh nyăngz sab đăngb — wax tauh munh ayx nâyx six senz toix. Năngđ nây, zanyf sab nyăngz munh ayx lauf toix, nzof max zanyf sab nyăngz munh zef ayx năngx toix têx. Langh năngx jinh săngh nyăngz săngx huđ au six zuc stayb cloon langh. Six năngđ coong langh tayc au six tuz pungx goib, oix zoz laiv lanh yâuc tuz, tinyh phanv âyz Zâu nyăngz zux ix. Six, âyz yaz nyâyh taih nănh năngđ coong phanv nâyx cănh yămz six năngx gongx têx. Nzof, yaz nyâyh taih yaz lauf naih Zâu Tênb-Huungh nyăngz Singx-Lingh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.