1 Cô-lin-tô 4

1Wâyc nây, muif lanh munh oix zuc mangc buz ayx cayx năngđ cay Zâu Jix-Tuz nyăngz pâuz cloon tuz cun jămđ Zâu Tênb-Huungh pinyx vâyv nyăngz jau wax đomc munh. 2Nzof yămz, ayx cun pâuz nyăngz munh tauv laiv, six muif lanh oix zuc neetb stimz ayx. 3Six yămz yaz, max cun yaz hănđ zuc nyâuh stămđ max six yămz bamh munh nyăngz stămđ stoif tinc zuc stămđ, yaz lauf max numđ săngh laix. Wâyc yaz six max cănh stămđ yaz. 4Wâyc yaz cănh numđ yaz max naih luungđ stoif, nzof yaz yâuc max zâyf păngc nâyx đomc bix tuz stunx ayx peengh stimz; wâyc Zâu six stămđ yaz wax Tauh. 5Wâyc nây, max zeengx tauv săngx huđ năngx gâyf stămđ toix laiv huungđ, zu tauv Zâu taih, Nănh six zoz pinyx yămz nzămc wax đomc jau setb gwăngz taih, nzof yâuc zoz tăng munh nyăngz nyâuđ nyâyh wax đomc jau setb taih nzuf. Tauv wax zanyf, laiv lanh săngh tanv cănh tuz tăng Zâu Tênb-Huungh tanv.

6Yâuf pez lex, nây six wâyc phunz nyâuh tuz gongx, yaz bix nongc nâyx đomc jau coong tauv yaz cloon A-bô-lô, phunz tăng buz nyâuh bix hoođ pâyz nâyx zâux wac:

“Năngx gâyf ninyh blătc tuz ja taih nyăngz wac,”

phunz max naih mănv hayh ayx nzetx lub, bix tim nâyx lanh nyăngz bux ninyh nzeengz cloon wax lanh. 7Wâyc zuc naih mănv phunz goib nyâuh taih heh? Ha, nyâuh naih tix huungđ bix max zâyf tuz stipx taih mah? Six năngđ coong nyâuh tuz stipx nâyx, săngh laix nyâuh bix ayx nzetx lub cayx năngđ cay max zâyf tuz stipx nâyx heh? 8Nyâuh six bâyf tuz caux nzuf nzof! Nyâuh yâuc tuz puv quâyx nzuf nzof! Nyâuh bâyf cănh hayh cun max zâuđ sămv tauv buz nzof, tuz mungc nyâuh senz tuz cun, phunz buz lauf tuz cloon nyâuh cun. 9Wâyc yaz nyâyh taih Zâu Tênb-Huungh zoz buz taih ayx năngx đangz quaix wax đomc cumh pâuz munh, cayx năngđ nongc zuc tayx nyăngz munh nâyx. Yâuc phunz buz pênx năngx jetx nyăngz jau yămz nây bamh canz — phunz stinz munh cloon bamh munh mangc. 10Buz six săngh munh oongx munh wâyc Zâu Jix-Tuz, nzof nyâuh six munh lemđ munh yămz Zâu Jix-Tuz. Buz six đoonh, nzof nyâuh six njoongh. Nzof nyâuh six tuz zanyb saix, buz six zuc phătc stanc. 11Hănđ tauv nâyx zanyf, buz lauf zuc tanyđ nyâuđ sab, tanyđ nyâuđ gatb, yâuc zuz guyz quav yootz, yâuc zuc bopc, yâuc max naih tinc yămz, 12yâuc zuc ayx zâuđ, nongc cănh nyăngz puf ayx cumh pâuz. Zuc munh mađ zaux, buz poou wac phunz; zuc munh ayx huđ ănz, buz yâuc tanyđ; 13zuc munh plongz wac ănz, buz yâuc quinb bux. Buz six cayx năngđ cay bamh canz nyăngz njămc nyav nâyx, zuc munh mangc max staox mâyc, ayx tuz tauv nâyx zanyf.

14Yaz max zây ja nâyx đomc wac nongc ayx phunz nyâuh nyayz, six yaz quinb nzaox nyâuh cayx năngđ cay yaz stăngz nyăngz sây nâyx. 15Max cun nyâuh hănđ naih săngh panc lanh stênx steengb yenv nyăngz munh yămz Zâu Jix-Tuz, six lauf max naih đuungx lanh pha; wâyc yaz six păngc Cuđ Jenx steengb nyâuh taih yămz Zâu Yê-su Jix-Tuz. 16Năngđ nây, yaz joođ nyâuh oix zuc ayx âyz yaz nyăngz gao. 17Yâuc wâyc nâyx, yaz nzăngđ paiđ Ti-mô-tai ninyh pongh nyâuh, nănh six yaz stăngz nyăngz toonz yâuc neetb stimz yămz Zâu, nănh six cănh coong nzuf yaz yămz Zâu Yê-su Jix-Tuz nyăngz jau bux nyâuh, âyz năngđ yaz yămz muif đoif nyăngz jiux pangx nzaox nyăngz nâyx. 18Six, naih ah phanx munh yâuc nyâyh coong yaz max ninyh pongh nyâuh gôh, stiz songđ ayx lub. 19Six năngđ coong Zâu oix, yaz six ninyh pongh nyâuh năngx căn, nzof yaz six zah mangc wax đomc ayx lub nyăngz munh, max zâyf cungb yămz nzetx coong nyăngz wac six mangc yămz stiz nyăngz jab. 20Wâyc Zâu Tênb-Huungh nyăngz côkz six max zâyf cungb yămz nzetx coong nyăngz wac, six yămz tômx jab. 21Nyâuh oix luungđ heh? Oix yaz nzâyz pya ninyh pongh nyâuh, max six nzâyz tinyh stăngz cloon nyâuđ dlênc heh?