Wale Magar Kham
मर्कुस 8
येसुये चार हजार मीरंलाई ओपर्भयोरं
मत्ती १५:२९-३९
हो डिन छ्याम फरि पनि माहुले मीरं याडुप्सिव, होरासं ज़्याने कडिज़ मालेव। होकाम येसुये उसिसरंलाई ओल लेवकं खुल्डे हैओडोवरं, “आव माहुल्ये मीरंलाई रःङडे ङायुङ नाज़्या कडालेकं आवरं ङासं यालेव आछिम सोङला याटाडु होसोनो आवरासं ज़्याने कडि पनि माले। होकाम आवरंलाई करेसंज़ ज़ीःमडे ङापरिःङरंखे भने के येमयालं बेहोस टाडे ढलिने लेरं आवरं कोइ कोइरं के टाडाङाम राव लिज़्यारं।”
येसुलो उसिसराई येसुलाई हैयाडोव, “आव कडिज़ मालेव बनलं आवरंलाई कैजैडे बरे यानेरं?”
येसुये उसिसरंलाई ओपजोयोरं, “जेसं खागोटा बरे उलिज़्याव?”
नोराई हैयाडोव, “सात गोटा लिज़्या”
येसुये हो माहुल्ये मीरंलाई नामलं चुङो उपरिःङोरं, होकाम सात गोटा बरे उकुइटं छेन्डे ढन्याबाड ओयोवपाना बरे केःडे, मीरंलाई भाड्याच्योरं वार्डे उसिसरंलाई हैओडोवरं, उसिसराई बरे लाङडे मीरंलाई याभाड्योवरं। नोरासं टिगिडा आलिलिज़ा ङाःरं पनि लेवरं, नो पनि येसुये आसिक याडे नोराई याङाःकंज़ नोयो उपरिःङोरं। होकाम हो मीरं ज़्याडे, यावाःङो। ओयेःलं याडुप्क घ्योव फुङ्गालं सात फुङ्गा ओटाव। होल चार हजारया मीरं लेवरं। होकाम येसुये नो मीरंलाई उपरिःङोरं। होपाना येसु उसिसरासं डोङ्गाटं पुलुडे डलमनुठा वार्ने जिल्लालं ओनाव।
फरिसीराई चिन्न यानिःव
फरिसीरं येसु लेवकं राडे होसं यायुसिव, होकाम येसुलाई जान्चिनेलो लागिटं स्वर्गटाम टोबो चिन्न यानिःव। येसुये खेव ओसं चेङडे होरंलाई हैओडोवरं, “आव पुस्ताये कडाने चिन्न उखिम्ज़्याव? डस्साज़, ङा जेलाई हैङाडाच्योज़्या, आव पुस्तालाई चिन्नलो उमिन्ट कडि पनि यासिने माले।”
होकाम येसुये होरंलाई राःडे फरि पनि डोङ्गाटं चुङडे समन्डर होपंटं ओनाव।
फरिसीराई सोनो हेरोडलो ओखमीर
मत्ती १६:५-१२
येसुलो उसिसरं यासं बरे लाङने मेःडेयानैज़्याव, होकाम डोङ्गाटं यासं टोबोज़ाज़ बरे लेव। येसुये उसिसरंलाई ऐ वार्डे चेतावनी ओयोवरं, “जे फरिसीराई याखमिर सोनो हेरोडलो ओखमीरटाम जोगिडे लेच्यो।”
होकाम होरं गेसं बरे ओम्लेवये येसुये एटाव ओपाङज़्याव वार्डे या-याज़ यापाङो।
येसुये आव रोः सन्डे होरंलाई हैओडोवरं, “जेसं बरे माले वार्डे कडाने जेपाङज़्याव? जे अजं पनि जेमठैज़्याव, सै जिमबुझिज़्याव? कडा जियुङ खाव टाडे उलिज़्याव रो? जिमिलङ लेडे पनि जेमरःङडुज़्याव? जेना लेडे पनि जेमठैडुज़्याव? जे जेमचेटैज़्याव रो? ङा पाँस गोटा बरे पांँस हजार मीराई याखार्ल ङा केःव बेलाकं, खागोटा फुङ्गालं बरेलो कुत्रा जिडुपो?”
नोराई येसुलाई हैयाडोव, “बारं फुङ्गा।”
“होकाम सात गोटा बरे चार हजार मीराई याखार्ल ङाकेःव बेलाकं, खागोटा फुङ्गालं बरेलो उकुत्रा जिडुपो?”
होराई येसुलाई हैयाडोव, “घ्यो-घ्योव सात फुङ्गा।”
येसुये उसिसरंलाई हैओडोवरं, “होकाम जे अजं पनि जिमबुझिज़्याव?”
बेठसेडाला अन्डला मी ओसोमो
होकाम येसु बेठसेडालं ओराव। मीरं टोबो अन्डला मीलाई येसु लेवकं रैडे, नो मीलाई येसुये गुछुड्यासिवकं वार्डे बिन्ती याडोव। येसुये हो मीलाई उकुइटाम चेङडे नाङखारलाम टङकं ओरोयो, होकाम उमिलङटं ट्युल्डे ओक्याङटं उकुइ नैडे होलाई ओपजोयो, “नङ कडिरं नमरःङज़्या?”
होकाम हो मीये याडे रःङडे हैओवारो, “ङा मीरंलाई सिङरं स्याव याबारिज़्याव ङारःङज़्या।”
होकाम येसुये फरि हो मीलो उमिलङटं उकुइये उछुकं, हो मीलो उमिलङ ओफैसिव होकाम स्यान्जाति चावसं रःङने ओटाव। येसुये होलाई नाङखारलं मापसिडे उज़ीःमडे उपरिःङो।
पत्रुसये येसुलाई मसिह वार्डे बिस्वास ओडोव
मत्ती १६:१३-१६; लुका ९:१८-२१
येसु सोनो उसिसरं कैसरिया फिलिपलो ओनाङखारलं यानाव। येमकं यानाज़्याकं येसुये उसिसरंलाई ऐ वार्डे ओपंजोयोरं, “मीराई ङालाई कै डाङज़्यारं ङा काङ्का?”
नोराई येसुलाई हैयाडोव, “कोइरं वार्र, ‘बप्तिस्मा झैने युहन्ना।’ उरुराई ‘एलिया।’ यहुडीरंकाम उरुका मीरं हैवाररं, अगमबक्तारंलाम टोबो।”
होकाम येसुये उसिसरंलाई ओपंजोयोरं, “जे कै जेवारये, ङा काङ्का?”
पत्रुसये येसुलाई हैओडोव, “नङ ख्रीस्टज़।”
येसुये नोरंलाई ङाबारेलं काङ्कालाई पनि हैटाडाच्योरं वार्डे आग्या ओयोवरं!
ओडैने डुखं सोनो उसिने ओबारेलं येसु ओपाङो
मत्ती १६:२१-२८; लुका ९:२१-२७
“मानवालो ओज़ाये बनै भ्या डुखं डैने, होसोनो यहुडी नेतारं, मुख्या सेवा डोने मीरं सोनो न्याम पैने मीरंङाम हेलाहारी टाडे होराई याकुइटाम सिनेले होकाम सोङलाका ज्युङडा टाडे सोनेज़ ले” वार्डे होरंलाई ओपोयोरं। हैजैडे आव रोः येसुये चावसं बुझैडे हैओडोवरं। आव रोः ठैडे पत्रुसये येसुलाई टङडे लाङडे ओहक्लोयो। होकाम येसु उसिसराई लेवडे वोल्डे रःङडे, पत्रुसलाई ऐ वार्डे ओहक्लोयो, “ए सैतान, नङ ङाछ्योकाम होडे नान, कडालेकं नयुङ परमेस्वर लेवडे माले, बुरु मीराई लेवडे ची लिज़्या।”
होकाम येसुये उसिसरासं माहुले मीरंलाई ओछ्योकं खुल्डे हैओडोवरं, “कोइ मी ङाछिन्ट राने युङ याडोवखे भने हो मीये ओल्स लिज़्याव स्यान्टै राःडे उक्रुस घुर्डे ङाछिन्ट ओराकं। कडालेकं जोये ओपोहोन जोगैने युङ डोव होये हो गोमैनेले, ङालागिटं सोनो चाव सोरलो ओलागिटं जोये उजीबन गोमोयो होये हो जोगैनेले। कडालेकं मीये स्यान्टै सङसार उकुइटं रैडे ओपोहोन याझाव भने कडि फाइडा याटाया ड? होसोनो मीये ओपोहोनलो ओपोलं कडि योडुव ड? आव बनै ब्यभिचारी सोनो पापी पुस्तालं जोये ङासं सोनो ङाबचनसं ओलाजं हायो, होलाई मानवालो ओज़ाये पनि ओबाबुलो ओमहिमाटं चोखो कटंवालरासं ओराकं होसं ओलाजं हाइनेले।”
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.