Wale Magar Kham
मर्कुस 9
होकाम येसुये नोरंलाई हैओडोवरं, “डस्साज़, ङा जेलाई हैङाडाच्यो, आका च्याङसिवरंकाम कोइ-कोइरं परमेस्वरलो ओराज्य सक्तिसं ओराज़्याव यामरःङया समं सिने मालेरं।”
येसुलो उरुप उफिरिव
मत्ती १७:१-१३; लुका ९:२८-३६
होकाम छ डिन झिन्डे येसुये पत्रुस, याकुब सोनो युहन्नालाई ओल्स टोबो झेनो डान्डाटं ओलाङोरं होटं येसुरं याज़ लेवरं, होकाम होराई याङाःकंज़ येसुलो उरुप छुट्टभान्ट्याव ओटाव। होकाम येसुलो ओक्वा टक पलाङो मिलङ झिने ओटाव, ऐटाव पलाङो ओटाव, प्रिठीबीलं काङ्का मीये पनि क्वा छेडे हैटाव माझैडुव। होकाम सोमबऱ्याङ उसिसराई एलिया सोनो मोसानि येसुसं नेपाङज़्याव यारोःङो। पत्रुसये येसुलाई हैओडोव “रब्बी, गे आटं गेलेव बनै चाव याटा। गे आटं सोमबऱ्याङ गोठो गेझैके, टोबो नलागिटं, नेबऱ्याङ मोसा सोनो एलियानी नेलागिटं।” पत्रुस सोनो ओल्स लेनेरं बनै याछेव कडि पाङने हो नोराई मासनरंये।
होकाम टोबो बाडल राडे होरंलाई ओकपोरं, हो बाडलटाम टोबो ऐटाव गा ओठोयो, “आव के ङा ङायुङ्का ङाज़ाची, जे आवलो ओपाङ ठैच्यो।” होकाम होपानाज़ आडेहोडे यारःङकं येसुलाई याज़ यासं यारोःङो।
येसुरं डान्डाटाम याझरिज़्याकं यायेम्बैटं येसुये होरंलाई आग्या ओयोवरं “मानवालो ओज़ा सिडे ज्युङडा ओम्टाया समं आव जेरोःङो रोः भरि काङ्कालाईज़ हैटाडाच्यो।”
होराई नो रोः यायुङलंज़ यानोयो, सिडे ज्युङडा टाने ओवारो कडि वार्डे या-याज़ यापाङो। होकाम नोरं आव रोः येसुलाई यापजोयो, “ङाःडे एलिया राव परिये वार्डे सास्त्रटा न्याम पैने मीराई कडाने हैयावार्ज़्यावखेने?”
येसुये हैओडोवर “पक्काज़ एलिया ङाःडे रा, होकाम स्यान्टै रोः फरि झोयो। होकाम मानवालो ओज़ाये बनै भ्या डुखं डैडे उरुराईङाम हेलाहारी टानेले वार्डे सास्त्रटं कडाने सर्सिव उलिज़्यावखेने? ङा जेलाई हैङाडाच्यो, एलिया राडेयाखेम्डु, होसोनो एलियालो ओबारेलं सर्सिव स्यानाव, एलियासं नोराई जो यायुङये सुन्चिव होज़ यालेव।”
माचाव आत्माये ओडापो छोऱ्या ओसोमो
मत्ती १७:१४-२१; लुका ९:३७-४३
येसु सोनो सोमबऱ्याङ उसिसरं बाङ्की उसिसरं लेवकं वोल्डे याराकं माहुले मीराई नोरंलाई घिरिडे न्याम पैने मीरासं बनै यायुसिज़्याव येसुये ओरोःङो। स्यान्टै मीराई येसुलाई यारोःङोपानाज़ बक्क टाडे येसु लेवडे गुरक्याटं ज़ोरिडे ढो याडोव। येसुये नोरंलाई ओपंजोयोरं, “जे आवरासं कडाने जियुसिज़्याव?”
नो माहुल्ये मीरंकाम टोबोये येसुलाई हैओडोव, “गुरबा ङाज़ालाई मापाङ्ने माचाव आत्माये क्योःडे नोयो, होकाम नङ लेवकं रैडेङानै। जोकं नो माचाव आत्माये ङाज़ालाई क्योःवये। होकाम छोऱ्यालाई नामलं टवये, होसोनो छोऱ्याये ओयाःलाम फेन राःवये, होकाम ओहा कट्र सपिडे गेखेङ्टेङ टाये, ङा नसिसरंलाई नो माचाव आत्मा पुलैच्यो वार्डे बिन्ती ङाडोवरं, नोराई माढुरंये।”
होकाम येसुये नोरंलाई हैओडोवर “ए बिस्वास माडोने पुस्ता, ङा जेसं खर्का समं ङालेके? ङा जेलाई खर्का समं ङासहिच्योके? नो छोऱ्यालाई आकं रैच्यो।” हो छोऱ्यालाई येसु लेवकं यारैज़्याकं येसुलाई ओरोःङोपानाज़ हो माचाव आत्माये छोऱ्यालाई ल-ल ओटंव, छोऱ्या नामलं टसिडे ओयाःलाम फेन पुलैडे नाम्ल फर्लिङ-फर्लिङ उपल्टिव।
येसुये छोऱ्यालो ओबाबुलाई ओपजोयो, “खाबलाकाम आव छोऱ्यालाई ऐ ओटाव?”
छोऱ्यालो ओबाबुये हैओडोव “ज़ीमज़ा ओलेवकामज़। ङाज़ालाई सैःने लागिटं नो आत्माये गरि मेःलं गरि रीःलं ख्यावये। नङ ससोमो नढुखे भने, नयुङ नाडे गेलाई सायता गयासिके!”
येसुये छोऱ्यालो ओबाबुलाई हैओडोव, “‘नङ नढुखिन!’ वार्डे नो कै नवार्ज़्याव? बिस्वास डोनेराई यालागिटं स्यान्टै रोःज़ टाये।”
होपानाज़ छोऱ्यालो ओबाबुये कीःडे हैओवारो “ङा बिस्वास ङाडो। ङा कम्जोर ङाबिस्वास बडैने ङालाई सायता डाङ।”
होकाम माहुले मीरं बोलोङ गुरक्याटं याराज़्याव रःङडे येसुये हो माचाव आत्मालाई ऐ वार्डे ओहक्लोयो, “ए मापाङने सोनो भैरा आत्मा, ङा नङलाई आग्या ङायान, नो छोऱ्याटाम पुलुडे रान, होकाम खर्क पनि नो लेवटं टानान।”
होकाम हो माचाव आत्मा चीर-चीर किःडे छोऱ्यालाई फङ-फङ टडे उपुलुव, होकाम हो छोऱ्या लल्याट्रो ओटाव, भ्या बिछुराई के उसिव ची वार्डे हैयावारो। होकाम येसुये हो छोऱ्यालाई उकुइटं क्योःडे पङ्ल्याङ ओसोचोयो, होकाम छोऱ्या ओच्याङसिव।
होकाम येसुरं ज़ीःमडे यानाव येसुलो उसिसराई ओबाठङ ओलेकं येसुलाई ऐ लेडे यापजोयो, “गे नो माचाव आत्मालाई कडा गेमहाइडुखेने?”
येसुये नोरंलाई हैओडोवरं, “आव खाले माचाव आत्मालाई खेपैने प्रार्ठनाये याज़ खेपैसिडु।”
होकामटानि येसुरं होलाम पुलुडे गालीललाग्यान यानाव। गे आलं गिलिज़्याव रोः काङ्कायेज़ टासनरंकं वार्ने येसुलो उयुङ लेव, कडालेकं येसुये उसिसरंलाई ओपैज़्यारंकं हैओडोवरं, “मानवालो ओज़ा मीराई याकुइटं सुम्पिसिनेले, होकाम होराई नोलाई सैःनेलेरं, होकाम उसिव झिन्डे सोङलाका ज्युङडा टाडे सोनेले।”
येसुये ओपाङो आव रोः उसिसराई माबुझिरंये, होकाम येसुसं पजैने पनि याछेव।
स्यान्टैराई भन्डा घ्योव काङ्का?
मत्ती १८:१-५; लुका ९:४६-४८
येसु सोनो उसिसरं कफर्नहुम नाङखारलं याराव, ज़ीःमकं यालिज़्याकं येसुये नोरंलाई ओपंजोयोरं, “येम्ट जेराकं कडि रोः जेपाङरिज़्याव?”
होकाम होरं कडिज़ मापाङरंये, कडालेकं होरं येम्ट “गे भरिलाम स्यानटैराई भन्डा घ्योव काङ्का?” वार्डे या-या यायुसिव। होकाम येसु चुङडे बारंजना उसिसरंलाई खुल्डे नोरंलाई हैओडोवरं, “जो मी पैला टाने युङ डोव, हो स्यान्टैराई भन्डा आलिज़ा टाडे यासेवा डोव परिये।” होकाम येसुये टोबो आलिज़ा बाल्खलाई रैडे उसिसराई याखार्ल उसुचुनो, होकाम बाल्खलाई ओघोन्ट रैडे उसिसरंलाई हैओडोवरं, “जोये एटाव आलिज़ा बाल्खराईलाम टोबोलाई ङामिन्ट ग्रहन डोव होये ङालाईज़ ग्रहन डाङो, होकाम जोये ङालाई ग्रहन डाङो होये ङालाई माङ्कची, ङालाई परिःङनेलाई ग्रहन डोवये।”
जो गेबिरोडलं माले हो गे लेवडे ले
लुका ९:४९-५०
युहन्नाये येसुलाई हैओडोव, “गुरबा टोबो मीये नमिनङाम ज़्याःरं उपुलैज़्यावरं गे गेरोःङो। गे हो मीलाई नेटाव येःन टाडो वार्डे हैगेडोव, कडालेकं हो मी गेसंका माङ्कची।”
होकाम येसुये हैओडोवरं, “हो मीलाई टावोङच्यो, कडालेकं ङामिन्टाम सक्तिला येःन डोनेये झिन्डे ङाबिरोडलं चानो माचाव पाङने माले। कडालेकं जो गेबिरोडलं माले हो गिज्युङङाम झैसिये। कडालेकं जोये जेलाई जे ख्रीस्टसंकारं ची वार्डे जेलाई ङामिनङाम टुखुरि रीः ओंँव यायाच्योव भने, डस्साज़ ङा जेलाई हैङाडाच्यो हो मीये पक्काज़ उईनाम डैनेले।”
पाप डोव परिःङने कारन
“जोये ङालाई बिस्वास डोने आलिज़ारंलाम टोबोलाई पाप डोव परिःङो, होलाई के टोबो घ्योव रान्ठै ओढेङलं झुन्डैडे समन्डरलं ख्यानि पनि चाव याटाहो। होकाम नकुइये नङलाई पाप डोव यापरिःङसोनोखे भने होलाई कटंडे ख्या। नेबऱ्याङ कुइसं नर्गला मासिने मेःलं नाने भन्डा के टोबो कुइ मालेव खर्कज़ मासिने जीबन डैने नलागिटं चाव टाये नर्गलं के रुईर पनि मासिरं, मेः पनि मासिये।1 नखङये नङलाई पाप डोव यापरिःङसोनोखे भने होलाई पल्डे ख्या। नेबऱ्याङ खङसं नर्गलं नाने भन्डा के टोबो खङ मालेव खर्कज़ मासिने जीबन डैने नलागिटं चाव। 2 नर्गलं रुइरं पनि मासिरंये मेः पनि मासिये नमिलंङये नङलाई पाप डोव यापरिःङसोनोखे भने नोलाई हाइडे ख्या। नेबऱ्याङ मिलङसं नर्गलं नाने भन्डा के टोबो मिलङसं परमेस्वरलो ओराज्यलं नाने नलागिटं चाव टाये। नर्गलं रुइरं पनि मासिरंये मेः पनि मासिये।”
“कडालेकं स्यान्टैलाई मेःयेज़ चोखो झोयोये होमान्टिज़ सापिये चरैसिव बस्तरं चोखो झोयोये।”
“सापि चाव टाये, सापिलो ओडार यानाखे भने फरि कडिये डारो झैने? जे स्यान्टैरं नै-नैलं सापि स्याव डारो टाच्यो, होकाम सान्तिसं लेच्यो।”
Source notes (2)
- Footnote आव कोइ-कोइ ग्रीक कुइये सर्सिव कितापटंयाज़ ले
- Footnote आव कोइ-कोइ ग्रीक कुइये सर्सिव कितापटंयाज़ ले
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.