मर्कुस 7

पुर्खाराई यासिछ्या

मत्ती १५:१-२०

1यरुसलेमङाम राव नेबऱ्याङया फरिसीरं सोनो न्याम पैने मीरं येसुलो ओछ्योयालं याडुप्सिव। 2येसुलो कोइ-कोइ उसिसरं याकुइ माहुरसिडे काङ याज़्योज़्याव यारोःङो।

3फरिसीरं सोनो यहुडीरं नोराई यासाखा पुर्खाकामटाज़ चावसं याकुइ माहुरसिडे कडिज़ माज़्याने याचलन लेव। 4बजारलाम यारोयो बस्तरं चावसं छेडे याज़ चलैरंये। होसोनो बजारलाम राडे चावसं हुर्सिडे याज़ कडिरं ज़्योरंये। नोराई उरु याचलन एटाव समं यामानिज़्याव खुरीरं, जारं, टानरं, सोनो काङ्सा जारं पनि सिल्ने याचलन लेव।

5हैजैडे फरिसीरं सोनो सास्त्रटा न्याम पैने मीराई येसुलाई यापजोयो, “नसिसराई कडा गेसाखा पुर्खाकामटा राव चलन अनंसारला जीबनलं यामबाज़्याव? कडा आवराई याकुइ माहुरसिडेज़ ज़्योरं?”

6होकाम येसुये नोरंलाई हैओडोवरं, “जे मान्टिव कैफटिराई यालागिटं यसैयाये ङाःडेज़ ऐ लेडे ठीकंज़ अगमबानी ओडोव! ऐटाव सर्सिवले,1

‘आव मीराई यायाःये मान्त्राज़ ङामान नैड्याङज़्यारं,

हैनि पनि यायुङ के ङाकाम टाडाज़ लिज़्या।

7नोराई, सोजोज़ ङामहिमा डोज़्यारं,

हैनि पनि नोराई यासिछ्या मीराई यापोयो तरिकायाज़ची।’

8हैजैडे जे परमेस्वरलो ओन्यामलाई राःडे झन मीराई यापोयो चलनलं जेबाज़्या।”

9येसुये नोरंलाई हैओडोवरं, “जे जेचलनलाई मानिनेलो लागिटं खाडंङ चलाकसं परमेस्वरलो ओन्यामलाई जेराःज़्या। 10कडालेकं मोसाये हैओवारो ले, ‘जेआमा, जेबाबुलाई मान याच्योरं, होसोनो जोये वामा, ओबाबुलाई बिरोड डाडे माचाव रोः पाङ नो मीलाई सोःयोज़ परिये।’ 11कोइ मीये ओबाबु वामालाई जिन ङालेवङाम डैने फाइडा स्यान्टै परमेस्वरलाई चरैःसिव ची ले वार्डे हैयावार भने, 12जे नो मीलाई ओबाबुनि वामानि कडि नेसेवाज़ डोव जेमयोये। 13हैजैडे जे जेसाखा जेपुर्खाकाम्टा चलिडे राज़्याव चलनलाई मानिडे परमेस्वरलो ओपाङलाई फालिम जेजैज़्या। एटानाव उरु भ्या येःनरं जेडोज़्या।”

14येसुये माहुले मीरंलाई फरि ओल लेवकं खुल्डे नोरंलाई ऐ ओडोवरं, “जे स्यान्टैये ङारोः ठैच्यो होकाम चावसं बुझिच्यो। 15एटानाव कडि रोःज़ माले जो पाखाङाम मीलो उज्युङलं पसिडे मीलाई बलेने, मीलो युङलाम पाखाडे पुलुज़्याव रोःराई ची मीलाई माचाव झैरंये। 16जोलो ठैने ओना ले होये चावसं ओठोयोकं।”2

17माहुले मीरंलाई राःडे येसु ज़ीःमलं उपसिव पानाज़ येसुलो उसिसराई ओललाई आव सात्रोलो ओबारेलं यापजोयो। 18येसुये नोरंलाई हैओडोवरं, “जे पनि अजं माबुझिव जिलिज़्याव? जो पाखाङाम मीलो उफुलं पसिये, नोये मीलाई बलेडे माचाव झोयो वार्ने जे जेमसन? 19कडालेकं नो उयुङलं माङ्क, उफुलं पसिये, होकाम पाखाडे पुलुये।” हैजैडे येसुये स्यान्टै ज़्याव भरिज़ चोखोले वार्डे हैओडोवरं।

20येसुये हैओडोवरं, “मी लेवटाम जो पाखाडे पुलुये होयेज़ मीलाई बलेडे माचाव झोयोये। 21कडालेकं मीलो युङलाम माचाव सुन्चीने, ब्यभिचार डोने, कुने, मी सैःने, छुटं मेमारं लेवडे नाने, 22लोभ, माचाव येःन, छल, कोभाज्याङ लेने, खिस, बिरोड, घ्योव झैसिने, मुर्ख पुलुये। 23एटाव स्यान्टै माचाव रोःरंज़ मीलो युङलाम पुलुडे मीलाई बलेरं।”

टोबो मेमालो उबिस्वास

मत्ती १५:२१-२८

24येसु नलाम पुलुडे टुरोस सोनो सिडोननि नेसान्डिडे नाडे टोबो ज़ीःमलं उपसिव। आलं ङाराव काङ्कायेज़ ठा टासनरंकं वार्डे हैओवारो, हैनि पनि मोसिडे मालेडुये। 25नो बेलाकंज़ टोबो मेमाये येसुलो ओबारेलं ओठोयो होकाम राडे येसुलो ओखङटं उफुलुप्सिव। नो मेमालो मेमा ओज़ालाई माचाव आत्माये क्योःडे ओनैज़्याव। 26नो मेमा सिरियाला फोनिके वार्ने पोलं जर्मीव लेव नो मेमा यहुडी मालेव। नो मेमाये येसुलाई मेमाङाज़ालो ओक्याङटाम ज़्याःरं हाइड्यो वार्डे बिन्ती ओडोव। 27येसुये नो मेमालाई हैओडोव, “ङाःडे छोऱ्या लुज़ारंलाई ज़्याव योरं, कडालेकं छोऱ्या लुज़ाराई याबरे रैडे काःरंलाई ख्याड्याने चाव माङ्कची।”

28नो मेमाये हैओडोव, “होज़ प्रभु, काःराई पनि छोऱ्या लुज़ाराई टेबलटाम मेलं यासंटेःव ज़्योरंसानि।”

29येसुये नो मेमालाई हैओडोव, “नङ ऐ नवारोयेज़ नज़ा यासम्डु। नज़ालो ओक्याङटाम ज़्याः पुलुडे यानाडु।”

30नो मेमा ज़ीःमकं ओनाकं के ओज़ालाई खाटंटं घ्याङसिडे उलिज़्याव ओडैनाव, ओक्याङटाम ज़्याः पुलुडे नाडे उलिज़्याव ओरोःङो।

येसुये भैरा सोनो लाटालाई ससोमोये

31होकाम येसु टुरोसलाम पुलुडे डस सहरलो ओछेत्रला डेकापोलिस येम टाडे सीडोनलो ओसान्डिलो ओमान्जलाग्यान टाडे गालील डहंलं ओनाव। 32नला मीराई टोबो ओना माठोयो सोनो ओयाः मापाङो मीलाई येसु लेवकं यारोयो, होकाम आवलो ओक्याङटं नकुइ नैडेगोयोके वार्डे बिन्ती याडोव।

33येसुये नो मीलाई माहुले मीराई याखार्लाम जामा होसैकं सुनसान पोकं लाङडे उकुइसै नोलो ओनालं झाडे ओयोव। होकाम ट्युल्डे नोलो ओसेटं छाप्डे ओयोव। 34होकाम स्वर्गडे रःङडे खेव ओसं चेङडे नोलाई, “इफ्फाता,” हैओडोव। आवलो ओमाने “ओफैसिकं।”3

35होपानाज़ नो मीलो ओना ओफैसिव, होसोनो नोलो ओसेलो ओबन्डन ओपलासिव होकाम नो चावसंज़ ओपाङो। 36“आव काङ्कालाईज़ हैटाडाच्यो” वार्डे येसुये नोरंलाई हैओडोवरं। जतिज़ मीरंलाई हैटालेच्यो डोवरं, नोरं झन-झन बनै बात्रा याडोव। 37मीरं बनै अचम्ब टाडे बक्क टाडे हैयावारो, “आवये स्यान्टै रोः ठीकंज़ डोज़्याव। आवये याना माठोयोरंलाई याना फैडे ओयोज़्यावरं यायाः मापाङोरंलाई पाङडुने समं झैज़्यावरं।”