Skip to content
BibleKenya

Sheshi Kham

प्रेरित 4

यहूदीयाङै घिन्या अदालतल लेऊक पत्रुस सनर यहुन्ना

पत्रुस सनर यहुन्ना रुयाङस नेंछ्योङज्याऊक, पुजाउरोयाङ सनर मन्दिरला कप्तान ओटन सदुकीयाङ बै नकाने ल्योङ रांवाङ। “प्रेरितयाङै जनताङजन ह्युउकौयन, येशुत सिन्या रुयाङ पुनरुत्थान ताइरा ऐराढोवकाले ओयाङ भ्या बिचलित ताइवाङ।” तब ओयाङै नकानेजन राकोलोकौ, ओटन तयोअका छिम समन कैदल रांनाटौ, दानाङभन्या नवाए बेला ओइ ताइस्यु लेऊ। तर बचन थएन्याङ मध्य तबर रुयाङै बिस्वास रांढोव, ओटन नकाङल बगाल बदिस्यु छ्योअ पास हजार ताइवाङ।

तयोअछिम्क नकाङल शासकयाङ ओटन अगवाङ सनर शास्त्रीयाङ यरुशलेमल दुउसिस्यु लिज्यावाङ। मुख्या पुजाउरो हन्नास, कैयाफा, यहुन्ना, अलेक्जेन्डर सनर मुख्या पुजाउरोल जाहानयाङ जम्मै नल लिज्यावाङ। नकाङै पत्रुस सनर यहुन्नाजन खार्ल सच्यानस्यु रांगिनौ, “नै सक्तिङन अथाबा काङ्काल मिनत झेन ईका झेनढोचिनु।”

तब पबित्र आत्माले भरिसिस्यु पत्रुसले नकाङजन ऐआढोवाङ, “ऐ रुयाङल शासकयाङ सनर अगवाङ, आछिम गे तोलोअ दुन्डा रुत तोलोअ चान्या काम गेढान्या बारेल ना नैति उपायले बेलौ ऐलेस्यु गिन्सिन्कन, जे सोगलैजन सनर इस्राएलला सोगल रुयाङजन थाह ग्याताइत्या, कि जो क्रूसतं जे केपन्या सनर परमेस्वरले सिन्यातन जिङदा आजाएन्या, ओइ नासरतला येशु ख्रीस्टल मिनता सक्तितन ईका रु जेल्यौकै बेलस्यु च्याङज्याया। ‘येशु नका तोलोअ ऐटाइन्या लुङ हो, जोल बारेल पबित्र शास्त्रल ऐटाइन्या सरसिज्याया, कि जो लुङजन जे कुर्मियाङै जेक्याइचिऊ नाजै आकअ ङएटा सुरलुङ ताइस्यु लेया।’1 अपुर काङ्काईत मुक्ति माल्दी, दानाङभन्या गे मुक्ति डोटौ नाल्ट नमत न्युउला रुयाङजन छुट्टै नैज मिन यांस्यु माल्सिदी।”

जब नकाङै पत्रुस सनर यहुन्नाल साहस रांरङौ, ओटन इकाने अनपर सनर सोझा रुनें रैस ऐलेस्यु रा:सनौ, तब नकाङ छक्कै परिवाङ, ओटन इकाने येशु सकाए लिज्याऔने लेस्यु नकाङै रा:सनौ। जब आसबेलन्या रुजन इकानेसं आच्याङज्यान्या रांरङौ, तब नकानेल बिपक्छेल नकाङ नैज छ्योङौ रांमाढुदुऊ। ऐताइस्यु नकानेजन यहूदीयाङै घिन्या अदालतङन बाहेर हिनन्या आग्या यांस्यु नकाङै ऐलेस्यु रारांल छ्योङवाङ, “इकानेजन आब गे कैढान्याने? दानाङभन्या मछ्युजै इकानेतन तोलोअ अचम्मला काम ताइस्यु लेया ऐलेन्या यरुशलेमल चुङन्या जम्मैजन थाह ताइस्यु लेया, ओटन गे अहअ लेऊ माढुदुइदी। तर ईका छेन जनताङ ल्योङ ताफैलित्या लेस्यु ‘फरि येशुल मिनतन काङ्काई रु सकाए झेन नैज ताछ्योङचिन’ ऐढान्याने रांचिते गे इकानेजन चेताउनी यांन्याई ताहा।”

ओटन नकानेजन खुल्स्यु “आबकन येशुल मिनङन ताछ्योङचिन ओटन नैज सिक्छ्या तायोंचिन” ऐलेस्यु नकाङै आग्या रांयोव।

तर पत्रुस सनर यहुन्नानेंले नकाङजन जबाक नेंयोवाङ, “परमेस्वरलं बचन थटौभन्या जे छेन थएन्या परमेस्वरलं नजर त ठिक लेऊसन मालेऊ, जे जेईज निर्नय ढोचिते। दानाङभन्या घोन घेनरङन्या सनर घेनथएन्या छेनयाङ घोन माछ्योङस्युकने ढुदुउज माढुदुचिदी।”

नकाङै सजाय यांन्या नैज उपाय मालस्यु नकानेजन अझ भ्याई धम्काईस्यु राराहौ, दानाङभन्या जो घटना घटिस्यु लेऊ नकाल नाल्ट सोगल रुयाङै परमेस्वरलं प्रसम्सा ढाज्यावाङ। दानाङभन्या जो रु अचम्मला कामङन बेलन्या ताइस्यु लेऊ, नकाल उमेर चालिस बर्सतन यादेए लेऊ।

बिस्वासीयाङलं प्रार्थना

ओटन नलन छुटकारा डोएस्यु पत्रुस सनर यहुन्नानेंले नेंन्हाएयाङ ल्योङ रांऔने, ओटन मुख्या पुजाउरोयाङ सनर सेरयाङै रांछ्योङन्या सोगलै छेन ओयाङजन नेपानस्योवाङ। जब बिस्वासीयाङै ईका राथटौ, तब नकाङ तचोएकै परमेस्वर लेऊदेए घिन्या ग़ाले कलिऊस्यु ऐलेवाङ, “अं प्रभु, जोले स्वर्ग, पिरथ्बी, समुन्दर सनर नल लेन्या सोगल खाल्ला जन्तु स्रिस्टी नजाएनु,2 जोले पबित्र आत्माङन आसेबक गे शाखा दाऊदल याह्‌लन ऐलेऊ,3 ‘गैरयहूदीयाङ दानाङ रायिङचो, ओटन रुयाङै माताइन्या छेनयाङ दानाङ यिङन्या धोर?

परमप्रभुल बिरोदल सनर ओलं अबिसिक्त जनल बिरोदल पिरथ्बीला रययाङ च्याङवाङ,

ओटन शासकयाङ तचोएकै जम्मा ताइवाङ।’4

दानाङभन्या मछ्यु नङ अबिसेक नढान्या, पबित्र नसेबक येशुल बिरोदत हेरोद सनर पन्तियस पिलातस नेंलोअनें ओटन गैरयहूदीयाङ सनर इस्राएलीयाङ सकाए ईकाइ सहरल दुउसिस्यु लेवाङ।5 नकाई ढाऔ नाल्ट नमी सक्तिङन सनर नयोजना अनुसार हाकन्जै ठहराइस्यु नल्‌नु। आब औ परमप्रभु, नकाङल धम्कीयर्त नजर लाइते, ओटन नमी सेवाऱ्याङजन पुरा साहस सकाए न बचन छ्योङौ योंवरते, ओटन सबेलौ नाल्ट नङ न कुई फैलाइते, न पबित्र सेबक येशुल मिनङन अचम्मला अचम्मला कामयाङ सनर कामयाङ ग्याताइरत्या।”

नकाङै प्रार्थना ढास्यु खेम्‌रापाइनाई नकाङ रादुउसिन्या पोल थरंर ताहौ, ओटन नकाङ सोगल पबित्र आत्माले भरपुर ताइवाङ, ओटन नकाङै साहस सकाए परमेस्वरलं बचन छ्योङवाङ।

बिस्वासीयाङै रा:सम्पत सअता रांजाटौ

ओटन बिस्वास ढान्याङल बगाल सोगलै तोलोअ यिङ सनर तोलोअ आत्माला ताइस्यु लेवाङ, ओटन नकाङ मध्य काङ्काईले बै आसम्पतलं नैज जन्तु ईका ङामि ज्या ऐमाल्दा, तर नकाङल सोगलै जन्तु सअता लेऊ।6 नका प्रेरितयाङै भ्याई सक्तिसकाए प्रभु येशुल पुनरुत्थानल साची यांज्यावाङ, ओटन नकाङ सोगलैयर्त परमेस्वरलं घिन्या अनुग्रह लिज्याऔ। नकाङ मध्य काङ्काईजन नैज छेनल अभाब मापरिडा, दानाङभन्या ज्वाए येङखेए या झिमबन लेऊ ना खसमयाङै यएस्यु नकाल येए प्रेरितयाङ ल्योङ होनन्याढोरा, नका प्रेरितयाङल हाक नाएरा, ओटन जोजन जो जन्तुल अभाब ताह, ना नकाङजन भाअस्यौरा।

आब साइप्रस देसला लेबी कुलला योसेफ, जोजन प्रेरितयाङै बारनाबास ऐलेस्यु मिन रानाएस्योव (जोल अर्थ उत्साहलं ज़ा हो), ईकाइ योसेफले आयेङ आयटौ ओटन ना रकम हिनस्यु प्रेरितयाङल हाक आनाएस्योवाङ।

Source notes (6)
  1. Cross-reference भजनसङ्ग्रह ११८:२२; दानियल २:३४-३५
  2. Cross-reference प्रस्थान २०:११; नहेम्याह ९:६; भजनसङ्ग्रह १४६:६
  3. Cross-reference भजनसङ्ग्रह २:१-२
  4. Cross-reference भजनसङ्ग्रह २:१-२
  5. Cross-reference मत्ती २७:१-२; मर्कुस १५:१; लूका २३:१; यहुन्ना १८:२८-२९; यशैया ६१:१
  6. Cross-reference प्रेरित २:४४-४५

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.