Sheshi Kham
प्रेरित 3
येशुले तोलोअ अपाङ्गजन आसबेलन्या
तयोअ पत्रुस सनर यहुन्ना लाअका तिन बजे प्रार्थनाल बेलाक मन्दिरलं हिनज्याऔने। मन्दिर भितरलं पसिन्याङस बया नीस्यु बिन्ति आढोव, आजर्मिऊ कन्ज तोलोअ दुन्डाजन रुयाङ वुरस्यु लाङरा, ओटन दिनकाई मन्दिरलं सुन्दर मिन लेन्या झलापल ल्यौक नाएस्योरा। पत्रुस सनर यहुन्ना मन्दिरलं भितरलं पसिङा नेंलिज्यान्या रङस्यु ना दुन्डाले बया यांङचिन्ते ऐलेस्यु बिन्ति आढोव। पत्रुसले यहुन्ना सकाए नकाजन एखौऱ्या खिमस्यु ऐआढोव, “घेनल्यौदेए खिम्ते।” नकाने ल्योङन कोबाअ डोएन्या आस ढास्यु नकाले नेंलेऊदेए आब्याटौ।
तब पत्रुसले ऐआढोव, “ङासं चान्दी सनर सुन माल्दी, तर जो ङासं ले, नकाई ङा नङजन यांना, नासरतला येशु ख्रीस्टल मिनतन नङ च्याङस्यु बान्ते।” पत्रुसले दुन्डाल दाइन्या कुई कोलोअस्यु नकाजन आसचोटौ, ओटन ओचोएटै नकाल आखङला गुलिगान्ठाल तागत रांऔ। ओटन नका जरू सोस्यु च्याङौ ओटन बाऔ तअसिऊ, ओटन बाऔयन उफ्रिऊयन सनर परमेस्वरलं सुति ढाऔयन नकानेसं मन्दिरलं पसिऊ। जब सोगल रुयाङयाङै नकाजन आबाज्यान्या सनर परमेस्वरलं प्रसम्सा आढाज्यान्या रांरङौ। तब रुयाङै नकाजन मन्दिरला चान्या झलापल वङ्क चुङस्यु बया नीन्या ईका ज्या लेस्यु रांशहौ, ओटन नकाल यर्त आताइन्या घटना रङस्यु नकाङ अचम्मै ताइवाङ।
मन्दिरलं पत्रुसलं सिक्छ्या
नका रु पत्रुस सनर यहुन्नानेंल छिनछिन आबारिन्या रङस्यु सोगल रुयाङ भ्याई अचम्म मानिस्यु सोलोमन मिनला पटाहाल तचोएकै नकाङल्योङ चोएस्यु रांवाङ। जब पत्रुसले ईका आरङौ “ऐ इस्राएलला रुयाङ, ईका छेनत जे नैकाम अचम्म जेमानिचिऊ? अथाबा गे घेनमिइज सक्ति या भक्तिङन इकाजन बान्या घेनजाएन्याङमन लेस्यु दानाङ खिमज्याच्यो? अब्राहाम, इसहाक सनर याकूबल परमेस्वर, गे शाखाल परमेस्वरले आमि सेबक येशुजन महिमित आजाटौ, जोजन जे कोलोकौ जेपरिङचिऊ, ओटन पिलातसले ओजन राइन्या निर्नय आढाऔक बै जे ओजन आहार्मै जेमाभन्चिऊ।1 तर जे पबित्र सनर धर्मि येशुजन असुइकार ढास्यु तोलोअ साइढवाजन राइन्या माग जेढोचिऊ,2 ओटन जिबन कर्ताजन जे जेसएचिऊ जोजन परमेस्वरले सिइकालतन जिङदा आजाटौ, गे इकाल साची लेया। येशुल मिनतन ढासिन्या बिस्वासले सनर ओलै मिनले जे जेरङन्या सनर जेशईन्या ईका रुजन बलल्या आजाटौ। ओल्योङन डोएसिन्या बिस्वासले ईका रुजन जे सोगलैल लेऊक बअबनाई आसबेलौ।”
“ओटन ऐ इस्राएली भाईयाङ सनर बैनाङ, ङाजन थाहै लेया कि जे अन्जानत नै जेल्चिऊ, ओटन जेमि शासकयाङै बै नैताइन्याई रांढोव। परमेस्वरलं ख्रीस्टले ओलजै दुख भोघिन्याई ताहा ऐलेस्यु सोगलै अगमबक्ताङल याह्लन रांछ्योङन्या अगमबानी ओले ऐलेस्यु पुरा आढोव। नैताइस्यु पस्चाताप ढोचिते ओटन परमप्रभु लेऊदेए वल्चिते, कि जे पाप छेमा ग्याताइत्या, ओटन परमप्रभुल ल्योङन आनन्दल बेला रांन्यालेया, प्रभुङन आत्मिक सामर्थला बेला रांन्यालेया, सनर ओले पैलाई जे नाल्ट आछेलन्या येशुजन परिङन्या लेया। परमेस्वरले ऐका कालखन्डकन्ज आमि पबित्र अगमबक्ताङल याह्लन आछ्योङन्या सोगलै जन्तुल फरि ताइन्या बेला आमाराऔ समन येशु स्वर्गल अबस्य लिज्यावपरिया। मोशाले ऐलेस्यु लेऊ, ‘परमप्रभु परमेस्वरले ङाजन आसच्यानौमन जे दाज्यू भाईयाङ सनर दिदीबैनाङ खार्लन तोलोअ अगमबक्ता जे नाल्ट सच्यानस्याचिवा। ओले जेजन जो पानस्याचिऊ ना सोगलै छेन जे थटौ परिया।3 ऐटाइन्या लेया, कि परमेस्वरले ना अगमबक्ताङल छेन माथएन्या सोगलै परानीयाङजन रुयाङतन अलक जाटौरा ओटन नकाङ नस्ट ताइन्यालेरा।’”4
“शमुएलतन रएस्यु नकाल छिन्टा सोगलै अगमबक्ताङ ज्वाएले छ्योङस्यु लेवाङ, ना सोगलैले आकाई दिनयाङल मुइस्यु लेरा। ओटन जे नका अगमबक्ताङल सनर नकाई योजनाला सन्तानयाङ ज्या, जो बाचा परमेस्वरले जेमि शाखा अब्राहामस ऐलेस्यु आढोव, ‘नमी सन्तानत सनर पिरथ्बीला सोगलै जाहानले आशिर्बाद डोएन्यालेरा।’5 जे स्वाट्टैजन जेमि दुस्टताङन होलस्यु जेजन आशिर्बाद योङालेस्यु परमेस्वरले आसेबकजन आसच्यानौ ओटन सोगलै हादेए जेल्योङ आपरिङौ।”
Source notes (5)
- Cross-reference प्रस्थान ३:१५
- Cross-reference मत्ती २७:१५-२३; मर्कुस १५:६-१४; लूका २३:१३-२३; यहुन्ना १९:१२-१८
- Cross-reference ब्यबस्था १८:१५; १८
- Cross-reference ब्यबस्था १८:१९
- Cross-reference उत्पत्ति २२:१८
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.