Skip to content
BibleKenya

Katu Bible Literal Text

Pakah Đóng Lêi 19

Lơh nôôq tarnêêng achêk, aku xâng dhariêng pakơi dhariêng praaq karơ ưng mưi tanóói manưih bơk bhlơng dhiq pleng, kơi ađô:

“Ha-lê-lu-ja!

Rau paq jóói, cha-iil tabah lơq mataai raman chô leq Yaang Pleng nôôq he,

taai nôôq rau xêi lơt ưng Ađó nek alua dhalam lơq bhơt liêm,

tââq Ađó ơi xêi lơt kamór karơ têêng taniêt

hơq nek đu têêng môôp lơt katiêk palơq keen têêng taniêt ưng ađó.

Chuôq ơi chróót bharang đóng ahaam ưng nôôq dhơn ratơơq Chuôq,

tââq têi kamór ađek.”

Hayơq piđó praaq chu đu bơơr, kơi ađô:

“Ha-lê-lu-ja!

Garyươk tââq dham ađó bhiêk yuur par patơk nh'chró, taluôn luôn.”

Bơơr jêt puôn takóh bhươl lơq puôn panong akóón adhah pađam achak leq katiêk lơq bhuôih kakoh Yaang Pleng, Yaang dyơq jaq dhiq tanơơt, kơi ađô:

“A-meen. Ha-lê-lu-ja!”

Mưi dhariêng praaq tââq tanơơt yuur praaq, kơi ađô: “Phaai babóóch haanh Yaang Pleng nôôq he, tabhơt nôôq dhơn ratơơq Ađó ơơi, lơq nôôq manưih bhi kakhin Ađó, manưih paniên lơq manưih taha!”

Hayơq aku xâng dhariêng praaq pakơi dhariêng xanuul ưng tanóói manưih bơk bhlơng, thê dhariêng ưng bơk jarhu đơơk, lơq thê kơi dhariêng grơm karơ, kơi ađô:

“Ha-lê-lu-ja!

Taai Chuôq nek Yaang Pleng ưng nôôq he, nek Yaang Bhơt Mataai, kadhâng akoq.

Nôôq he phaai bhuui marhaal, yayar tatơq,

lơq tapôông cha-iil tabah leq Ađó

taai bhiêk đaam ưng Trưưu Akóón ơi tơk,

lơq mamaai ưng Ađó ơi ravang ravưa ađêi xong aq,

rau bâân đóng leq ađó ađek nek ađó bâân paxơp panđóh palơq bhaai lenh ramaanh

brương braang bhóók tabah”

(taai bhaai lenh ramaanh nek nôôq tarnêêng bhơt liêm ưng nôôq đu huuiq).

Hayơq dhơn pleng chêk praaq palơq aku: “Phaai xaraq: Phươk đóng leq nôôq manưih bâân kayua tơơt bhiêk đaam Trưưu Akóón.” Chanak achêk kung praaq palơq aku: “Ađôk nek nôôq paraaq lalua dhalam ưng Yaang Pleng.” Aku chakoh takól dhiq dyung dhơn pleng achêk đóng bhuôih kakoh ađó, bơơi ađó praaq palơq aku: “Óóq têêng kơi ađek! Aku nek manưih kung têêng dhơn ratơơq kơi amei lơq nôôq adhi anó ưng amei, nek nôôq manưih ve paraaq taruuih ưng Chuôq Jê-su. Phaai bhuôih kakoh Yaang Pleng, taai paraaq taruuih ưng Chuôq Jê-su nek lóóm kanóq ưng paraaq manưih đââng taruuih.”

Hayơq aku lêi pleng yuur tarlóng, lơq lêi tôôh, mưi panong axeh bhóók, lơq Yaang dhââng dhiq ađó bâân đóók nek kah tadhơ lơq lalua dhalam, Ađó praaq xêi tarvei tarjơl ting paraaq bhơt liêm. Mat Ađó kơi par-aang óih, bơk panơơng charnap m'piing akoq Ađó, ve mưi dhanóók bâân xaraq bơơi kah ngaai n'nal lơh tââq chênh Ađó. Ađó xơp mưi aau chaguôk tươm kalóóng ahaam, lơq dhanóók Ađó bâân đóók nek Paraaq ưng Yaang Pleng. Nôôq kabhuh linh m'piing pleng ting vôôiq Ađó dhiq axeh bhóók, xơp bhaai lenh ramaanh bhóók lơq sek tabah. Mưi pala bhươt xaan lơp yuur gluh tââq bóóp Ađó, đóng palơq ađó Chuôq tarjơl nôôq katiêk, hayơq Ađó e kadhâng akoq piđó palơq mandreh tarlââng bhaxêi, lơq Ađó đâq goq galiq buôh kađôôq ganhuh pagrâ janah dhuui dhaai ưng Yaang Pleng, Yaang Bhơt Mataai. Ađó ve mưi dhanóók achak bâân xaraq dhiq aau chaguôk lơq dhiq malau Ađó: “Bhua ưng nôôq bhua, lơq Chuôq ưng nôôq chuôq.”

Hayơq aku lêi mưi dhơn pleng dyương kalóóng mat tangêi, lơq ađó achêk yuur dhaloong palơq mưi dhariêng karơ, kung tabhơt nôôq m'ma achim dyơq par m'piing pleng, kơi ađô: “Vôôiq leq ađô, phaai kaboq karong đóng vaar bhiêk gamak ưng Yaang Pleng, đóng đah adhah nôôq bhua, adhah nôôq kuôn gamak, achak nôôq đu grâ karơ, adhah kabhuh axeh lơq linh dhââng dhiq piđó, kung palơq adhah ưng dyóp ngaai, kah rathaai lơq têêng xól, bhơt paniên lơq taha.”

Hayơq tơk, aku lêi akóón adhah lơq nôôq bhua dhiq katiêk palơq kabhuh linh ưng piđó bâân nhoom karong lóóiq đóng tavaaih tarjơl palơq Yaang dhââng hóng axeh lơq palơq kabhuh linh ưng Ađó. Hayơq akóón adhah bâân takóóp, kung palơq ađó nek đââng taruuih chachââr, đu yuur têêng toom mat ađó nôôq kanal chrih, ve ađek hơq ađó bhlơp galơơk nôôq đu ơi đơơp kanal ưng akóón adhah lơq nôôq đu bhuôih kakoh a-ô kabhêi ađó. Miq bơơr xók dyơq mamông bâân m'peq leq bóng óih bâân óch róh palơq lưưu hunh. Phơn dyơq lóóiq kalóóng kabhuh piđó hơq bâân taleng chêt palơq pla bhươt ưng Yaang dhââng hóng axeh, nek pla bhươt gluh tââq bóóp Ađó, lơq tabhơt achim brih bâân kabhôôq kajrê tââq adhah kabhuh piđó.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.