Pakah Đóng Lêi 18

1Lơh nôôq tarnêêng ađek aku lêi mưi dhơn pleng lââng dhaluônh tââq pleng, ve mataai raman gamak bhlơng, lơq katiêk bâân tadyóól brương palơq cha-iil tabah ưng ađó achêk. 2Palơq dhariêng praaq dyóp grâ karơ, dhơn pleng achêk lalơu karơ, kơi ađô:

“Ba-bi-lôôn gamak preh hachươp aq!

Ađó ơi xar vaaih dham tơơt jaq ưng nôôq abhưi,

dham kadrêi kađơu ưng dyóp yaang anhuq,

lơq dham kadrêi kađơu ưng dyóp kabhuh achim nhơơp xrơơm, đaang harek paper.

3Taai tabhơt nôôq katiêk ơi ból plơ tââq buôh pagrâ leq rau taniêt tapiing ưng ađó,

nôôq bhua dhiq katiêk ơi têêng lơt taniêt tapiing palơq ađó,

kabhuh buôn baan dhiq katiêk ơi yuur karvaan ve praan karơ dhiq kalơng mamông huông hư ưng ađó.”

4Hayơq aku xâng mưi dhariêng lââng tââq pleng praaq:

“Dhanuôr Aku ơơi, phaai gluh tââq ađó,

đóng nôôq akóón yươq ting tapâng leq nôôq matu lơt ưng ađó,

lơq đóng nôôq akóón yươq phaai đơơp dhiq nôôq bhrê hư ưng ađó.

5Taai lơt ưng ađó ơi kaboq tagơơn patơk pleng,

lơq Yaang Pleng ơi hei lóóiq nôôq tarnêêng lơt aak ưng ađó.

6Phaai xêi palơq ađó kung kơi ađó ơi têêng,

lơq phaai chróót lóóiq lơh tabơơr chu, bơk lơh tabơơr ting nôôq tarnêêng têêng ưng ađó;

kalóóng bhiim đu ađó ơi tóóng, phaai đóng ađó bơk lơh tabơơr.

7Ađó ơi tư padyók payaal ađêi lơq mamông ramuôh ng'kơi,

nek phaai đóng ađó rau ka-ai karuôq lơq ranguôq rabaang kơi achêk.

Taai ađó praaq kalóóng lóóm ađó, kơi ađô:

‘Aku khe tơơt kơi mưi pađiil bhua,

aku eh rau nek pađiil kamaai,

lơq aku e kah ve mơ tarlum rau nhiim kalau.’

8Taai kơi ađek, kalóóng mưi tangêi, nôôq bhrê hư ưng ađó e bhral parmat:

chêt đok, kalau nhiim, ha-ul kró,

lơq ađó e bâân róh bil palơq óih,

taai Chuôq nek Yaang Pleng, Yaang praaq xêi ađó, nek Yaang bhơt mataai.”

9Nôôq bhua dhiq katiêk, nek nôôq đu têêng lơt taniêt tapiing lơq mamông huông hư palơq ađó, e nhiim griit lơq m'bhoonh pabhuk leq ađó bhêêl piđó lêi dya-dyuôl gayươk boh róh ađó, 10xók dyương tââq changaai taai kakhin kapơn rau jarnah achak ưng ađó, praaq:

“Ayô xangaat, ayô xangaat

đóng kanóón gamak Ba-bi-lôôn, kanóón dyóp grâ karơ!

Taai kalóóng mưi tangêi, rau xêi janah amei ơi tơk.”

11Hayơq nôôq buôn baan dhiq katiêk nhiim griit lơq kalau châq đóng ađó, taai kah dyơq ngaai kơl drươp ađô ưng piđó dyơq — 12đô-drươp palơq vaang, baak, dhơl kiiq, ngok-traai, bhaai lenh ramaanh, bhaai pabhrơuq, bhaai dhoh, bhaai bhrôông ngót, lơq dyóp rau n'lóóng galơu, dyóp đô-parvech palơq bhalưa aruôih, dyóp đô-parvech palơq n'lóóng bhơt kiiq, palơq kóng, palơq bhaxêi, palơq dhơl xariêng, 13palơq kêêq, parluk, dhaak galơu, janươu atang, janươu thum, buôh, nh'xiêng, amun mi ramaanh, aviq mi, tariiq karók, trưưu beeq, axeh lơq xe tarjơl, palơq têêng xól lơq ravaai akóón manưih. 14“Pale nil hapruôt ưng amei, rau rââm kiêng ưng ravaai, ơi xooq changaai tââq amei, dyóp rau laq lôh parbhôh lơơi lơq kadhok gayór ơi bil tich tââq amei, lơq piđó e kah ve mơ bâân lêi dyơq.” 15Nôôq buôn baan ưng nôôq rau đô-drươp ađô, nek nôôq đu ơi xar vaaih karvaan kabhôôq, e dyương róch changaai tââq ađó, nhiim griit, lơq kalau châq taai kakhin rau ka-ai jarnah ưng ađó,

16kơi ađô:

“Ayô xangaat, ayô xangaat đóng kanóón gamak

glêh xơp bhaai lenh ramaanh,

bhaai pabhrơuq, bhaai bhrôông ngót,

lơq bâân cham parliêm palơq vaang,

dhơl kiiq, ngok-traai,

17taai kalóóng mưi tangêi, rau karvaan kabhôôq liêm kra kơi ađek bâân hư bil.”

Dyóp kala jatau, dyóp tamóói vôôiq jatau tơk leq n'đó điq, nôôq vơq bhuông, palơq dyóp ngaai têêng tarnêêng taxiiq maar dyương tââq changaai,

18lơq dhaloong lalơu xók chalaang lêi gayươk boh róh ưng ađó, kơi ađô: “N'đó kanóón kơi kanóón gamak achêk?” 19Piđó vươk mariêk leq akoq ađêi, lơq dhaloong lalơu, nhiim griit, kalau châq, kơi ađô:

“Ayô xangaat, ayô xangaat kanóón gamak,

dhiq đu dyóp ngaai kalóóng ađó ve bhuông jatau

dhiq taxiiq ơi xar vaaih karvaan kabhôôq ve đô-drươp ađó,

taai kalóóng mưi tangêi, ađó ơi bâân pahư tabil.”

20(“Phaai bhuui marhaal leq ađó, pleng ơơi,

palơq nôôq đu huuiq, sưưq-đô, lơq manưih đââng taruuih,

taai Yaang Pleng ơi xêi lơt rau kaauq móón ưng nôôq pe palơq ađó!”)

21Hayơq mưi dhơn pleng grâ karơ hayôk bhangôh dhơl thê kơi tapal padhiêr gamak lơq m'peq leq taxiiq, praaq:

“Ting kơi ađô, kanóón gamak Ba-bi-lôôn

e bâân tampeq karơ chok leq,

lơq e kah ve mơ bâân chalaang lêi dyơq,

22dhariêng manưih peh tambhreh haak, dhariêng takóq taken,

đu plong aluôt, lơq manưih plong karyóól

e kah ve mơ bâân xâng tââq amei dyơq,

dyóp manưih têi ragêi

e kah ve mơ bâân lêi dhiq amei dyơq,

dhariêng tatap

e kah mơ ve bâân xâng tââq amei dyơq,

23kalaaq brương dhơu

e kah mơ ve taklaaq dyóól dhiq amei dyơq,

dhariêng chaxaau lơq mamaai

e kah mơ ve bâân xâng dhiq amei dyơq,

taai nôôq buôn baan ưng amei nek nôôq đu ve kataai karơ dhiq katiêk,

taai dyóp katiêk karuung ơi bâân galơơk chachââr taai raman abhô ưng amei.

24Ahaam ưng nôôq đââng taruuih palơq nôôq manưih huuiq,

lơq ưng tabhơt nôôq ngaai ơi bâân taleng chêt dhiq katiêk ơi bâân lêi dhiq ađó.”