Pakah Đóng Lêi 17

1Hayơq mưi kalóóng tapól dhơn pleng kadhâng tapól beq jahương, vôôiq tơk lơq praaq palơq aku kơi ađô: “Vôôiq nô leq, e aku đóng amei lêi rau xêi janah pađiil karơ têêng taniêt tapiing dyơq tơơt dhiq bơk jarhu đơơk, 2hơq kung palơq ađó, nôôq bhua dhiq katiêk ơi têêng lơt taniêt tapiing, dyơq dhanuôr tơơt dhiq katiêk nek ból plơ tââq buôh taniêt tapiing ưng ađó.” 3Chanak achêk đââng aku vôôiq kalóóng Yaang Liêm tơk mưi kruung vơng, hayơq aku lêi mưi pađiil parkan dhââng dhiq akóón adhah parhóm bhrôông ngót, kađôôq bing nôôq dhanóók đóók praaq chôlô, ve tapól akoq lơq majêt tagê. 4Manưih pađiil parkan ađek nek xơp kun aau parhóm pabhrơuq lơq bhrôông ngót, bâân xaraq paliêm palơq vaang, dhơl kiiq, palơq kaliêng ngok, dhiq têi ađó dyơq kadhâng mưi beq bhiim palơq vaang bing nôôq rau harek paper lơq nôôq rau anhuq tââq rau taniêt tapiing ưng ađêi, 5dyơq dhiq maang ađó bâân xaraq mưi dhanóók đóók: “Ba-bi-lôôn lalââp liêm gamak, akan ưng kabhuh têêng taniêt lơq nôôq rau harek paper ưng katiêk.” 6Hayơq aku lêi manưih pađiil parkan ađek dyơq ból plơ palơq ahaam ưng nôôq đu huuiq lơq palơq ahaam nôôq truuih đuui ưng Chuôq Jê-su, hơq lơh xók bâân lêi ađó ađek, aku hêq lêi palơq yuur chrih lêi kah yakơi. 7Chanak dhơn pleng praaq palơq aku: “Taai ng'kơi amei chrih lêi? Aku e móón đóng amei leq rau lalââp ưng pađiil parkan lơq ưng akóón adhah dyơq chơ ađó, nek akóón adhah ve tapól akoq lơq majêt tagê. 8Akóón adhah đu amei lêi n'loom ơi ve, xók ađôk kah ve, bơơi val ravang dharơ yuur tââq bóng luôh luông, nek ađó e vôôiq tơk dham chêt bil, hayơq dhanuôr tơơt dhiq katiêk, bơơi achak piđó kah bâân xaraq kalóóng Bha-aar Parmông, tââq xók tââp tavaaih, e chrih lêi bhêêl chalaang lêi akóón adhah taai n'loom ơi ve, xók ađôk kah ve, hayơq e dyơq tơk. 9Xók lóóm karnóq ve rau tabech galang kalóóng tarnêêng ađô: Tapól akoq nek tapól kakóóng, dhiq manưih pađiil parkan tôôh tơơt dhiq piđó, lơq piđó nek tapól chanak bhua: 10xââng bhua ơi preh hư, mưi bhua dyơq chaq jơr, mưi bhua lââng biêh kah ơi tơk. Lơq xók ađó tơk, ađó kajuq dhiq tanơơt kalóóng mưi ganah gađóq. 11Akóón adhah n'loom ơi ve bơơi xók ađôk kah ve, hơq chênh ađó nek chanak bhua đu takóól; bơơi ađó mađó leq tapól bhua tôôh, lơq dyơq vôôiq tơk dham chêt bil. 12Majêt beq tagê đu amei lêi nek majêt bhua, nôôq đu kah ơi bâân đơơp katiêk karuung, bơơi piđó e bâân đơơp kataai têêng bhua kalóóng mưi tangêi kung palơq akóón adhah. 13Nôôq bhua ađô ve makơi mưi lóóm karnóq, lơq piđó pađơơp praan karơ palơq têêng kala ưng ađêi đóng akóón adhah. 14Piđó e tavaaih tarjơl palơq Trưưu Akóón, hayơq Trưưu Akóón e đươk lơh piđó taai Ađó nek Chuôq ưng nôôq Chuôq, Bhua ưng nôôq bhua — lơq kung palơq Ađó nek nôôq manưih bâân tađaang dhaloong, bâân tachââih, lơq bhơt lóóm.” 15Chanak dhơn pleng praaq palơq aku: “Nôôq jarhu đơơk đu amei lêi, dhiq đu akan têêng taniêt dyơq tơơt, nek nôôq dhanuôr tơơt, nôôq tanóói manưih, nôôq katiêk karuung, lơq nôôq dhariêng paraaq. 16Majêt beq tagê đu amei lêi, palơq akóón adhah — piđó e gaam geet akan taniêt tapiing ađek, hayơq piđó e têêng ađó bâân m'bhraq lơơi lơq lalôh lalut, piđó e đah galuôn achak ađó, lơq e boh róh ađó palơq óih, 17Taai Yaang Pleng ơi đóng patơơt leq lóóm piđó đóng gluh kanóq kaniêng ưng Ađó đóng yuur têêng mưi kanóq kaniêng, lơq đóng pađơơp katiêk karuung piđó đóng akóón adhah patơk xók nôôq paraaq ưng Yaang Pleng e bâân jaap dhalam bing dyóp. 18Manưih pađiil parkan đu amei lêi nek kanóón gamak ve kadhâng akoq dhiq nôôq bhua ưng katiêk.”