Pakah Đóng Lêi 16

1Hayơq aku xâng mưi dhariêng karơ tââq đong bhanuôih praaq palơq tapól dhơn pleng: “Phaai vôôiq lơq n'toh tapól jahương pagrâ ưng Yaang pleng leq katiêk.”

2Kơi ađek nek, chanak đu tarnââp vôôiq lơq n'toh jahương ađêi leq katiêk, nek bhih m'peh harek paper lơq têêng ka-ai karuôq avaaih bhral leq akóón manưih, nôôq đu ve karnal ưng akóón adhah, palơq nôôq đu bhuôih kakoh a-ô kabhêi ađó.

3Hayơq chanak đu bơơr n'toh jahương ađêi leq taxiiq, nek taxiiq vaaih xar ahaam, kơi ưng manưih chêt, lơq dyóp akóón anaaq mamông kalóóng taxiiq maar chêt.

4Hơq tơk chanak đu pe n'toh jahương ađêi leq nôôq karuung atông lơq tóm đơơk, nek piđó vaaih xar ahaam. 5Aku xâng dhơn pleng ưng đơơk praaq:

“Kakoh Yaang ađôk ve lơq ơi ve, nek Yaang Liêm,

Amei nek Bhơt Liêm taai Amei ơi xêi lơt nôôq tarnêêng ađô.

6Taai piđó ơi têêng tantoh ahaam ưng nôôq đu huuiq lơq nôôq đââng taruuih,

hayơq Amei ơi đóng piđó ơm ahaam;

Piđó alua đaang bhlơng.”

7Hayơq aku xâng baang bhanuôih praaq:

“Alua, kakoh Chuôq nek Yaang Pleng, Yaang Bhơt Mataai,

nôôq rau xêi lơt ưng Amei maar alua dhalam lơq bhơt liêm.”

8Hayơq chanak đu puôn n'toh jahương ađêi m'piing mat tangêi, nek ađó bâân pheep óch akóón manưih palơq óih. 9Kơi ađek nek akóón manưih bâân boh róh taai kuôq puih kah kơi, lơq piđó praaq tamôôp dhanóók ưng Yaang Pleng, Yaang ve mataai dhiq nôôq bhrê hư ađô, bơơi piđó kah mơ klôôq lóóm karnóq lơt đóng tapôông cha-iil tabah leq Ađó.

10Hayơq chanak đu xââng n'toh jahương ađêi dhiq tanơơt ưng akóón adhah, nek katiêk karuung ađó avaaih xar kanam kanheet, lơq akóón manưih kap n'taak ađêi taai ka-ai karuôq. 11Piđó praaq tamôôp Yaang Pleng dhiq pleng taai rau ka-ai karuôq ađêi lơq taai nôôq dham matóch ưng ađêi, kơi ađek bơơi piđó kah dhơ lóóm karnóq lơt leq nôôq tarnêêng ưng ađêi.

12Hayơq chanak đu chapat n'toh jahương ađêi leq karuung gamak Ơ-phơ-raat, nek đơơk karuung bâân hariêq góh đóng kalơng ưng nôôq bhua tââq charhóóng mat tangêi blo bâân tadhoon lơơi. 13Aku lêi gluh tââq bóóp akóón karông, tââq bóóp akóón adhah, lơq tââq bóóp manưih đââng taruuih chachââr, ve pe yaang anhuq thê kơi adyrum adyrok, 14Taai piđó nek yaang ưng nôôq abhưi yuur têêng bơk karnal chrih, hơq piđó tơk palơq nôôq bhua dhiq plok hóng katiêk đóng kaboq karong piđó đóng ganơt tarjơl mót tangêi gamak ưng Yaang Pleng, Yaang bhơt mataai. 15(“Lêi tôôh! Aku bhral kơi đu tatông! Phươk đóng manưih đương meh lơq jư paliêm aau yaal ađêi, đóng ađó yươq jađaang vôôiq lalôh lalut đu akóón manưih chalaang lêi rau đu kachiit ưng ađêi.”) 16Piđó kaboq karong palââng lóóiq dhiq dham bâân đóók nek Ha-ma-gê-đôn kalóóng paraaq Hi-baaq-laai.

17Hayơq chanak đu tapól n'toh jahương ađêi mót kalóóng parhââm, nek mưi dhariêng praaq karơ tââq tanơơt kalóóng đong bhanuôih tar-auq gluh, kơi ađô: “Tarnêêng ơi xong!” 18Kơi ađek nek vaaih bhral chaach kamlaaq, dhariêng ka-uôih palơq dhariêng grơm, lơq mưi dharơp dha-ơr katiêk gamak vaaih — dharơp dha-ơr katiêk achêk karơ bhlơng lơq gamak tơk mơ mưi dharơp kơi ađek kah ơi glêh vaaih patââq xók akóón manưih ve mat dhiq katiêk. 19Kanóón gamak bâân gluh tablah têêng pe phơn, lơq nôôq kanóón bhươh ưng nôôq katiêk hachươp halơm, lơq Ba-bi-lôôn gamak bâân hei lóóiq toom mat Yaang Pleng đóng pađơơp leq ađó bhiim buôh pagrâ dhuui dhaai ưng Ađó. 20Hayơq, dyóp kôông taxiiq maar xooq klôôn, lơq kah rau bâân lêi nôôq kakóóng bôôl. 21Nôôq khuk bó dhơl gamak jau mơ mưi ta-lơng tââq pleng n'toh leq m'piing akóón manưih, hayơq palââng praaq tamôôp Yaang pleng tââq bhrê hư bó dhơl, taai bhrê hư ađek alua nek kakhin kapơn bhlơng.