Pakah Đóng Lêi 20

1Hayơq aku lêi mưi dhơn pleng dharơ dhaluônh tââq pleng, kadhâng kaliêng kliêng ưng bóng luôh luông lơq mưi tarlêi xiêng gamak kalóóng têi ađêi. 2Ađó pei kóóp akóón karông, nek akóón kaxênh hanua, hơq ađek nek abhưi, môôiq Sa-taan, hayơq kađaai ađó lóóiq kalóóng mưi ngaan kamó. 3Dhơn pleng m'peq ađó mót bóng luôh luông, hayơq kađơp lơq let kiêr dhiq ađó, đóng ađó kah dyơq galơơk chachââr nôôq katiêk dyơq patơk xók mưi ngaan kamó bâân xong bhơt. Xong ađek, ađó phaai bâân yuur paloh kalóóng mưi ganah gađóq.

4Hayơq aku lêi nôôq tanơơt, palơq nôôq manưih tơơt dhiq ađek, lơq mataai praaq xêi ơi bâân đóng leq piđó, palơq ravaai ưng nôôq manưih ơi bâân gôh tuôr taai truuih đuui ưng Chuôq Jê-su lơq taai paraaq ưng Yaang Pleng, lơq ưng tabhơt nôôq ngaai kah bhuôih kakoh akóón adhah môôiq a-ô kabhêi ađó, kung kah đơơp kanal ưng ađó dhiq maang môôiq dhiq têi ađêi, piđó mamông lóóiq lơq kadhâng akoq kung palơq Chuôq Paq Manưih kalóóng mưi ngaan kamó. 5(Sôôq dyơq lóóiq kalóóng nôôq manưih chêt nek kah mamông lóóiq patơk xók luch bhơt mưi ngaan kamó.) Ađek nek rau mamông lóóiq đu tarnââp. 6Phươk liêm lơq tabah liêm đóng ngaai manưih ve phơn kalóóng rau mamông lóóiq đu tarnââp! Akan chêt đu bơơr kah ve rau kataai dhiq nôôq manưih achêk, bơơi piđó e nek takóh bhanuôih ưng Yaang pleng lơq ưng Chuôq Paq Manưih, lơq e palơq Ađó kadhâng akoq kalóóng mưi ngaan kamó.

7Hayơq xók mưi ngaan kamó bâân xong bhơt, Sa-taan e bâân paloh tââq karól ưng ađó, 8Hayơq ađó e vôôiq gluh blơp chachââr nôôq katiêk tơơt puôn charhóóng dhiq katiêk, dhanuôr Goot lơq dhanuôr Ma-goot, đóng karong maleq piđó lóóiq đóng tarvei tajơl. Sôôq linh ưng piđó pakơi xuôr taxiiq. 9Piđó pajươk đơk plok dyóp leq dhiq katiêk lơq xavaang đong jơơng ưng nôôq manưih huuiq palơq kanóón bơk nh'nhơr, hayơq óih dhuônh tââq pleng lơq boh róh piđó. 10Hayơq abhưi, đu dharơơl galơơk piđó, bâân m'peq leq bóng óih lơq lưưu hunh, đu akóón adhah palơq manưih đââng taruuih chachââr tơơt dhiq kalóóng ađek, lơq piđó e bâân jarnah achak tangêi lơq hayum patơk nh'chró, taluôn luôn.

11Xong ađek aku lêi mưi tanơơt bhóók gamak lơq Yaang tơơt dhiq tanơơt, katiêk lơq pleng klôôn xooq tââq rau ve mat ưng Ađó, bơơi kah n'đó dhiq bâân koom đóng piđó. 12Hayơq aku lêi nôôq đu chêt, bhơt taha lơq paniên, dyương toom tanơơt, lơq nôôq bha-aar bâân talương, hayơq mưi bha-aar lââng bâân talương, ađek nek Bha-aar Parmông. Đu chêt bâân xêi lơt ting nôôq rau bâân xaraq lóóiq kalóóng nôôq bha-aar achêk, ting mơ nôôq tarnêêng ưng piđó. 13Taxiiq đââng pajaau nôôq đu chêt kalóóng taxiiq, akan chêt lơq maraaih pajaau đââng nôôq đu chêt dhiq piđó, lơq ting chanak manưih bâân xêi ting lơt mơ nôôq tarnêêng têêng ưng piđó. 14Hayơq akan chêt lơq maraaih bâân m'peq leq bóng óih. Ađôk nek akan chêt đu bơơr, nek bóng óih. 15La ngaai đu bâân chamet lêi kah bâân xaraq kalóóng Bha-aar Parmông, hơq ađó ađek bâân tampeq leq bóng óih.