Pakah Đóng Lêi 21

1Xong ađek, aku lêi pleng tame lơq katiêk tame, taai pleng đu tarnââp lơq katiêk đu tarnââp ơi lơh aq; hơq taxiiq nek kah vaaih dyơq. 2Hayơq aku lêi kanóón tabah liêm, nek Jê-ru-sa-leem tame, dhaluônh patââq Yaang Pleng m'piing pleng, bâân ravang ravưa kơi mưi panong mamaai cham dhiik, đóng leq kayiik ađêi. 3Aku xâng mưi dhariêng praaq karơ tââq tanơơt, kơi ađô: “Lêi tôôh! Pơơq pađơ ưng Yaang Pleng tơơt palơq akóón manưih, lơq Ađó e mamông palơq piđó, lơq piđó e nek dhanuôr Ađó, lơq chênh Yaang Pleng e tơơt palơq piđó. 4Ađó e dyuut bhơt đơơk mat tââq mat piđó, lơq akan chêt e kah vaaih dyơq, kung kah dyơq ranguôq rabaang, môôiq nhiim griit, hamôôiq ka-ai karuôq. Piđó e kah vaaih dyơq; taai nôôq tarnêêng laloom tââm ơi lơh aq.” 5Hayơq Yaang tơơt dhiq tanơơt praaq: “Lêi tôôh! Aku têêng tame dyóp rau.” Ađó kung praaq palơq aku: “Phaai xaraq lóóiq taai nôôq paraaq ađô nek đaang huuiq lơq alua dhalam.” 6Ađó kung kayua aku: “Nôôq tarnêêng achêk ơi xong! Aku nek An-pha lơq Ô-mê-ga, nek tââq tarnââp lơq tatun xariêq. Ngaai đu rahaal, Aku e đóng ơm kagóh tââq tóm đơơk parmông. 7Ngaai đu đươk e bâân đươi nôôq rau ađô, lơq Aku e nek Yaang Pleng ưng ađó, dyơq ađó e nek akóón Aku. 8Bơơi leq phơn nôôq đu ngôôk dyââng, đu kah ve lóóm huuiq, đu đaang harek paper, đu leng manưih, đu têêng taniêt, đu têêng tarnêêng gun raman, đu bhuôih a-ô kabhêi, palơq dyóp nôôq đu praaq chachââr, hơq dham ưng piđó nek kalóóng bóng bâân óch róh palơq óih lơq lưưu hunh, hơq ađek nek akan chêt đu bơơr.”

9Hayơq mưi kalóóng tapól dhơn pleng bhral, nek tââq nôôq đu ve tapól jahương kađôôq bing tapól bhrê hư tatun xariêq, lơq dhơn pleng achêk praaq palơq aku, kơi ađô: “Phaai vôôiq leq ađô, aku e đóng amei lêi mamaai, kađiêl ưng Trưưu Akóón.” 10Xong ađek, ađó đââng aku vôôiq kalóóng Yaang Liêm tơk mưi bhung kakóóng gamak lơq yaal, hayơq chaleq đóng aku kanóón tabah liêm Jê-ru-sa-leem dhaluônh jaq patââq Yaang Pleng dhiq pleng, 11ve cha-iil tabah ưng Yaang Pleng, bleh blơp ưng kanóón makơi kaliêng dhơl kiiq, kơi ngok dhơl bhóók chadhah pakơi pha-lê, 12pâng đươi kariing dhơl gamak lơq yaal, ve majêt bơơr palóng kariing palơq majêt bơơr dhơn pleng dhiq nôôq palóng, lơq nôôq achak bâân xaraq dhiq palóng, hơq ađek nek achak majêt bơơr kabhuh ưng nôôq akóón anaaq I-sơ-ra-êên. 13Pe palóng kariing tơơt hót mat blo, pe palóng kariing tơơt hót lóóm, pe palóng kariing tơơt hót hóng, lơq pe palóng kariing tơơt hót mat blót. 14Kariing dhơl kanóón ve majêt bơơr beq bhanơn, dhiq ađek nek majêt bơơr achak majêt bơơr sưưq-đô ưng Trưưu Akóón. 15Chanak dhơn pleng dyơq praaq palơq aku ve mưi n'dreh dhanang đang palơq vaang đóng ađó ve chóóm đang kanóón, nôôq palóng kariing kanóón lơq kariing dhơl kanóón. 16Kanóón bâân kanóq têêng dhaau phaaq; paryaal kagan ưng kanóón marđơq parbhươh ưng kanóón. Dhơn pleng achêk đang kanóón palơq n'dreh dhanang, đuôh majêt bơơr ngaan êt-ta-đơ: paryaal kagan, parbhươh lơq paryaal tadhơng ưng kanóón nek marmơ. 17Ađó kung đang kariing dhơl kanóón, kâng mưi hariêng puôn jêt puôn ku-đê ting dhanang đang ưng akóón manưih (bơơi kung nek ưng dhơn pleng). 18Parmaam têêng ưng kariing kanóón nek ngok bhóók chadhah, dyơq kanóón bhươh nek palơq vaang ngaq, kơi xamil tabah bhóók cha-iil. 19Nôôq bhlaang ưng kariing dhơl kanóón bâân paliêm parcham palơq dyóp rau dhơl kiiq. Bhlaang tarnââp nek ngok bhóók chadhah, đu bơơr nek ngok taviêng, đu pe nek ngok manaau, đu puôn nek ngok taviêng ngót, 20đu xââng nek bhrôông manaau, đu chapat nek dhơl taviêng bleh blơp, đu tapól nek ngok taviêng viêng, đu takóól nek ngok lakgal, đu takiêh nek ngok bhrôông bhangơm, đu majêt nek ngok taviêng ngót, đu majêt muui nek ngok bhrôông ngót, đu majêt bơơr nek ngok bhrôông bhrơuq. 21Majêt bơơr palóng kariing nek majêt bơơr kaliêng ahiêt; palơq dyóp ađó palóng kariing nek vaaih xar tââq mưi kaliêng hiêt i kơi ađek, dyơq kalơng bhươh kalóóng kanóón palơq vaang ngaq, thê xamil tabah bhóók chadhah. 22Aku kah lêi ve n'đó đong bhanuôih kalóóng kanóón, taai Chuôq nek Yaang Pleng, Yaang Bhơt Mataai palơq Trưưu Akóón nek đong bhanuôih ưng kanóón. 23Kanóón kah đươi ve mat tangêi môôiq mat bharương đóng dyóól brương leq kanóón, taai cha-iil tabah ưng Yaang Pleng dyóól brương kanóón, dyơq par-aang dhơu ưng kanóón nek Trưưu Akóón. 24Nôôq dhanuôr e vôôiq val ve taklaaq brương ưng kanóón ađek, lơq nôôq bhua dhiq katiêk đââng cha-iil tabah ađêi mót leq ađek. 25Bhluuch tangêi, nôôq palóng kariing kanóón kah ve mơ bâân kađơp, taai kah ve bhêêl kanam dhiq ađek. 26Akóón manưih e đââng cha-iil tabah lơq rau bhi chap ưng nôôq katiêk mót leq ađek, 27bơơi rau đu anhuq môôiq đu têêng tarnêêng đaang harek paper lơq dharơơl galơơk e kah ve mơ mót kalóóng kanóón, lơh tââq nôôq ngaai bâân xaraq kalóóng bha-aar parmông ưng Trưưu Akóón.