Pakah Đóng Lêi 22

1Xong ađek, dhơn pleng achêk chaleq đóng aku karuung đơơk parmông, bleh blơp kơi pha-lê, hóói gluh tââq tanơơt ưng Yaang Pleng lơq ưng Trưưu Akóón, 2dhiq pa-ô m'pơng kalơng bhươh ưng kanóón. Phơn hót ađô lơq hót tôôh ưng karuung nek n'lóóng parmông đóng gluh majêt bơơr rau pale, vaaih cheeh gluh pale ưng n'lóóng mak mơ ting kaxe, dyơq axơq ưng n'lóóng koom leq tarnêêng payươh ka-ai ưng nôôq katiêk. 3E kah dyơq rau tóh đua n'đó dyơq, lơq tanơơt ưng Yaang Pleng lơq ưng Trưưu Akóón e tơơt kalóóng kanóón, dyơq nôôq dhơn ratơơq Ađó e têêng yaauq Ađó. 4Piđó e lêi mat Ađó, lơq dhanóók Ađó tơơt dhiq maang piđó. 5E kah vaaih hayum dyơq, akóón manưih kah ve kiêng đươi leq taklaaq dhơu môôiq taklaaq mat tangêi, taai Chuôq nek Yaang Pleng e dyóól brương dhiq piđó, lơq piđó e kadhâng akoq patơk nh'chró, taluôn luôn.

6Hayơq dhơn pleng achêk praaq palơq aku: “Nôôq paraaq ađô nek đaang huuiq lơq lalua dhalam. Chuôq, nek Yaang Pleng ưng lóóm karnóq nôôq manưih đââng taruuih, ơi kayua dhơn pleng Ađó pakah đóng nôôq dhơn ratơơq Ađó nôôq tarnêêng phaai vaaih tơk kơi đâh dyaq.” 7“Lêi tôôh! Aku dyơq bhral kơi đâh bhlơng! Phươk đóng manưih huuiq jư nôôq paraaq manưih đââng taruuih ưng bha-aar ađô.”

8Aku, nek Jang, kung nek manưih lêi lơq xâng nôôq tarnêêng ađô. Xók aku ơi xâng lơq lêi, aku pađam achak leq katiêk đóng bhuôih kakoh dhalam dyung ưng dhơn pleng, nek đu pakah đóng aku nôôq tarnêêng achêk. 9Hayơq dhơn pleng achêk praaq palơq aku: “Óóq têêng kơi ađek! Aku nek manưih markơi têêng dhơn ratơơq palơq amei, lơq palơq nôôq adhi anó ưng amei, nek nôôq đââng taruuih, palơq nôôq ngaai huuiq jư nôôq paraaq ưng bha-aar ađô. Phaai bhuôih kakoh Yaang Pleng!”

10Hayơq ađó yua aku: “Óóq let kiêr nôôq paraaq taruuih ưng bha-aar ađô, taai ganah dyơq tơơt đan aq. 11Đu kah liêm, phaai bhiêk kah liêm. Đu anhuq, phaai bhiêk anhuq. Manưih bhơt liêm, phaai bhiêk têêng rau bhơt liêm. Ngaai sek tabah, phaai bhiêk bâân tavaaih liêm.” 12“Lêi tôôh! Aku dyơq bhral kơi đâh bhlơng, lơq phơn chaner ưng Aku ting vôôiq palơq Aku, đóng chróót leq dyóp ngaai kơi nôôq tarnêêng têêng ưng manưih ađek nek ng'kơi. 13Aku nek An-pha lơq Ô-mê-ga, nek tââq tarnââp lơq tatun xariêq, nek tââp vaaih lơq gluui parluch. 14Phươk đóng nôôq manưih pươh aau yaal ađêi đóng piđó e bâân khin tơk n'lóóng parmông, lơq vôôiq lơh nôôq palóng kariing mót kalóóng kanóón. 15Hót nguôi kanóón nek kabhuh anuq, kabhuh têêng gun raman, đu têêng taniêt, đu leng manưih, đu bhuôih a-ô kabhêi, palơq dyóp manưih kiêng marlóóch lơq têêng rau galơơk chachââr.

16Aku, nek Jê-su, ơi kayua dhơn pleng ưng Aku đóng truuih taruuih leq akóón nôôq tarnêêng achêk palơq nôôq akóón dhơn Chuôq. Aku nek tââm tu lơq akóón chachau ưng Đa-viit, nek charo yayóng brương cha-iil.”

17Yaang Liêm lơq MaMaai praaq: “Phaai tơk!” Ngaai xâng, kung phaai praaq: “Phaai tơk!” Ngaai rahaal, phaai tơk. Ngaai kiêng, phaai pei đơơp đơơk parmông đóng kagóh.

18Aku truuih đuui đóng dyóp ngaai xâng nôôq paraaq manưih đââng taruuih ưng bha-aar ađô, kơi ađô: La ngaai trul leq piđó, nek Yaang Pleng e trul leq manưih ađek nôôq bhrê hư bâân xaraq kalóóng bha-aar ađô. 19La ngaai kut heek tââq nôôq paraaq ưng bha-aar manưih đââng taruuih ađô hayơq Yaang Pleng e tabil phơn ưng manưih ađek tââq n'lóóng parmông lơq kalóóng kanóón tabah liêm bâân xaraq kalóóng bha-aar ađô.

20Yaang têêng truuih nôôq tarnêêng ađô praaq: “Alua! Aku dyơq bhral kơi đâh bhlơng.” A-meen! Kakoh Chuôq Jê-su, nhan phaai bhral!

21Nhan ơơn phươk liêm ưng Chuôq Jê-su tơơt palơq nôôq manưih huuiq. A-meen.