Katu Bible Literal Text
Maak 3
Ađó vil vôôiq mót leq đong gươl, lơq mưi chanak ve tapaang têi bâân adyóói xók tơơt dhiq ađek. Palââng choop lêi Ađó pagiit, ve kah Ađó e payươh manưih achêk kalóóng tangêi Sa-baat, hơq đóng piđó ve chóóm kaauq matu Ađó. Ađó kayua manưih ve tapaang têi bâân adyóói: “Phaai dyương leq pa-ô m'pơng.” Lơq Ađó tamóh piđó: “Tangêi Sa-baat chóóm pheep têêng liêm môôiq têêng môôp; paq manưih môôiq leng manưih?” Bơơi piđó parngau. Xong xók dhiêr mat lêi piđó palơq lóóm pagrâ, ka-ai karuôq taai rau nhâng lóóm ưng piđó, Ađó praaq palơq manưih padruuih: “Phaai yuôih pagluh tapaang têi ưng amei”. Ađó yuôih pagluh lơq tapaang têi ađó bâân kơi kaxu. Lơq bhêêl ơi gluh leq nguôi, nôôq manưih Pha-ri-si palơq nôôq manưih mađó kabhuh Hê-rôôt n'drươh tapraaq mangê karnóq jơl lóóiq Ađó, ng'kơi têêng buôn piđó ve chóóm leng Ađó.
Chuôq Jê-su palơq nôôq môôn-đô Ađó róch leq hót taxiiq, lơq mưi tanóói dhanuôr bơk bhlơng ơi ting vôôiq tââq Ga-li-lê, tââq Ju-đê, tââq Jê-ru-sa-leem, lơq tââq I-đu-mê nek palơq parah hót tóór tôôh karuung Jô-đen, kung kơi praang xirvir kanóón Ti-rơ lơq Si-đôôn. Ơi xâng n'nal n'đơq rau Chuôq têêng, mưi kabhuh ganơr bơk bhlơng ơi tóói tơk palơq Ađó. Ađó kayua nôôq môôn-đô ađêi pasam đóng mưi beq bhuông katưưiq ravang lơơi đóng Ađó ơi taai tanóói dhanuôr, buôn piđó yươq kaxiêq Ađó. Taai Ađó ơi payươh bơk manưih, tơk mơ la ngaai ve dhuôr ka-ai phaai paluôq pliên tơk griêq Ađó buôn ve chóóm xuui leq Ađó. Dhơ dharau dyóp xók nôôq yaang môôp lêi Ađó, piđó maar gim mat leq katiêk toom Ađó, lơq piđó lalơu kariêh, praaq kơi ađô: “Amei nek Akóón Yaang Pleng.” Chuôq praaq parâng trêh teng piđó buôn piđó yươq truuih pakah leq Ađó.
Ađó vôôiq đơk leq bôôl lơq dhaloong nôôq manưih đu chênh Ađó kiêng, lơq piđó tơk palơq Ađó. Ađó chaleq majêt bơơr chanak (nôôq manưih đu Ađó kung đóók nek nôôq sưưq-đô), buôn piđó tơơt palơq Ađó lơq buôn Ađó ve chóóm kayua piđó vôôiq truuih taruuih liêm, Kung kơi đóng mataai raman viêng abhưi. Ađó chaleq majêt bơơr chanak: Palơq Si-môôn, Ađó đóók kơơq achak nek Phi-e-rơ; Ja-kơ, akóón padruuih Xê-bê-đê, lơq Jang, adhi ưng Ja-kơ, nek nôôq manưih Ađó kung đóók kơơq achak nek Bô-a-neet, kiêng móón nek nôôq akóón padruuih ưng katiing kamlaaq; nek palơq En-rê, Phi-liip, Ba-thê-lê-mi, Ma-thi-ơ, Thô-ma, Ja-kơ akóón padruuih A-phê, Tha-đê, Si-môôn Xê-lôôt, lơq Ju-đa Ich-ka-ri-ôôt, kung nek manưih tamôôp Ađó.
Chuôq mót kalóóng mưi dhanong đong, lơq tanóói dhanuôr vil ting tóói pơh, tơk mơ Ađó palơq nôôq môôn-đô pamơ kah chóóm bâân cha beng. Xók nôôq manưih dharing tapóóng Chuôq xâng kơi achêk, piđó tơk buôn kóóp jư Ađó, ơi piđó móón kơi ađô: “Ađó achêk bhôh aq.” Nôôq thêi pachóóm gani, nek nôôq manưih vôôiq dhuônh tââq Jê-ru-sa-leem, móón kơi ađô: “Ađó ơi bâân Bê-êên-xê-buun bóq,” lơq kơi ađô: “Ganơơm takóh abhưi hơq Ađó ađek viêng abhưi.” Bơơi xók ơi dhaloong piđó tơk leq ađêi, Ađó praaq palơq piđó palơq babi: “Ng'kơi têêng Sa-taan ve chóóm viêng Sa-taan? La mưi katiêk bâân tablah tư tarjơl lóóiq chênh ađó, nek katiêk achêk kah chóóm dyương mưng dyơq. La mưi đong bâân tablah tư tarjơl lóóiq chênh ađó, nek đong achêk e kah chóóm mưng đươnh dyơq. Lơq la Sa-taan yuur vaaih tarjơl lóóiq chênh ađêi hơq bâân tablah, nek ađó kah chóóm dyương mưng, bơơi ơi tơk bhêêl chêt bil. Lalêi palơq tarnêêng tư tarjơl lóóiq chênh ađêi, xók ơi mót kalóóng đong ưng mưi manưih karơ praan, kah ngaai ve chóóm n'drooih pei drươp kavaan ưng ađó ađek laloom tââm ơi bâân choq manưih karơ praan achêk laloom, xong tatun ađek hayơq n'drooih pei đong ađó. Alua, aku móón nôôq pe, kơi dyóp matu lơt ưng akóón anaaq akóón manưih e bâân lơơi, pamơ dhơ dharau paraaq chôlô n'đó piđó yuur praaq, dhơ kơi ađek la ngaai praaq matu jơl lóóiq Chuôq Yaang Liêm, nek kah ve bâân lơơi matu tơk taluôn luôn, bơơi manưih achêk bâân mơk matu taluôn luôn.” Chuôq praaq kơi achêk taai piđó móón: “Ađó ađek bâân yaang môôp bóq.”
Amêêq Ađó palơq nôôq adhi ưng Ađó tơk, lơq xók dyương hót nguôi, piđó kayua manưih pató bóóp đóng Ađó, dhaloong Ađó gluh. Mưi kabhuh ganơr xók tơơt praang Ađó, lơq palââng móón palơq Ađó: “Lêi tôôh, amêêq thêi palơq nôôq adhi anó thêi dhiq nguôi, xók chik-chêk thêi.” Ââi lóóiq piđó, Ađó praaq: “Ngaai nek amêêq Aku lơq nôôq adhi anó Aku?” Hayơq xong xók hangiêk mat lêi nôôq manưih xók tơơt xirvir praang ađêi, Ađó praaq: “Phaai lêi ađô, amêêq aku lơq nôôq adhi anó aku! Ơi la ngaai têêng kơi kanóq kiêng Yaang Pleng, ađek nek adhi anó, mamóóq adhi, lơq amêêq Aku.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.