Maak 2

1Xók val mót lóóiq kalóóng kanóón Ka-bê-na-um lơh bơơr pe tangêi, dhanuôr manưih bâân xâng kơi Ađó dyơq tơơt dhiq đong. 2Lơq bơk manưih ơi karong tơk mơ kah ve dhiq dyơq, patơk mơ dhiq palóng mót gluh kung kah, hayơq Ađó pachóóm paraaq Yaang Pleng đóng piđó. 3Masôôq manưih tơk palơq Ađó, đââng ting mưi manưih rabóót dyung têi, bâân glâk tââq puôn nak. 4Taai kah chóóm tơk đan Chuôq ơi taai manưih ganơr, piđó n'drơh jarpơơq pađơp nham dhiq Chuôq tơơt, lơq xong xók têêng luôh luông, piđó xua padhaluônh dharââng đu manưih rabóót dyung têi dyơq bêch. 5Xók ơi lêi lóóm huuiq ưng piđó, Chuôq Jê-su praaq palơq manưih rabóót dyung têi: “Akóón ơơi, matu lơt akóón ơi bâân talơơi!” 6Bơơi nôôq thêi pachóóm gani dyơq tơơt dhiq ađek praaq kalóóng lóóm piđó: 7“Hau manưih ađô vil praaq kơi achêk? Ađó ađô alua chôlô! Ngaai ve mataai lơơi matu chapiên mưi ađó Yaang Pleng?” 8N'drươh, taai Chuôq Jê-su ơi n'nal kalóóng lóóm yaang ađêi kơi piđó xók tư kanóq dhiq lóóm kơi achêk, Ađó praaq palơq piđó: “Hau nôôq pe vil kanóq nôôq rau ađek kalóóng lóóm? 9Hau rau đu nek khe lơh đóng praaq palơq manưih rabóót dyung têi, ‘Matu lơt amei ơi bâân talơơi!’ môôiq praaq ‘Phaai yuur dyương, hayuur dharââng amei yuur lơq bhadyaang vôôiq!’? 10Bơơi buôn nôôq pe n'nal kơi Akóón Manưih dhiq katiêk ađô ve mataai lơơi matu”, Ađó praaq palơq manưih rabóót dyung têi: 11“Aku yua amei phaai yuur dyương, hayuur dharââng ưng amei yuur, lơq chô leq đong ađêi.” 12Kơi achêk nek xong xók yuur dyương hơq n'drươh hayuur dharââng yuur, ađó ađek vôôiq gluh toom mat dyóp ngaai, tơk mơ dyóp ngaai maar chrih lêi lơq bhi haanh Yaang Pleng, móón kơi ađô: “Nôôq he kah glêh mơ lêi tarnêêng kơi achêk.”

13Ađó vil vôôiq gluh tóór taxiiq, lơq pabhơt tanóói dhanuôr tơk palơq Ađó, hayơq Ađó truuih pachóóm piđó. 14Xók bhêêl vôôiq lalơh, Ađó lêi Lê-vi, akóón padruuih ưng A-phê, xók tơơt dhiq đong pagoop jêên, nek Chuôq móón ađó: “Hêq ting thêi!” Xong xók yuur dyương, ađó ting Chuôq.

15Tarnêêng yuur vaaih bhêêl Chuôq xók cha vaar dhiq đong ađó, bơk manưih pagoop jêên kung kơi manưih ve matu ting tơơt cha palơq Chuôq Jê-su lơq nôôq môôn-đô Ađó, taai bơk manưih kung ơi ting Ađó. 16Xók nôôq thêi pachóóm gani mađó kabhuh Pha-ri-si lêi kơi Ađó tơơt cha palơq nôôq manưih ve matu lơq kabhuh pagoop jêên, piđó móón palơq nôôq môôn-đô Ađó: “Hau ađó ađek cha nek palơq kabhuh pagoop jêên lơq manưih ve matu?” 17Xong xók xâng paraaq ađek, Chuôq Jê-su praaq palơq piđó: “Manưih khe karơ kah ve đươi leq manưih payươh; bơơi nek manưih ka-ai dreh. Aku kah bhral buôn dhaloong manưih bhơt liêm, hơq nek manưih ve matu.”

18Hayơq nôôq môôn-đô ưng Jang lơq manưih Pha-ri-si xók điêng cha, piđó kung tơk lơq tamóh Ađó: “Taai hau rau hơq môôn-đô ưng Jang lơq môôn-đô ưng manưih Pha-ri-si điêng cha, bơơi môôn-đô ưng thêi kah điêng cha?” 19Chuôq Jê-su praaq palơq piđó: “Tamóói tơơt bhiêk nhan akóón kah chóóm điêng cha tơk xók chaxaau dyơq tơơt palơq piđó, pâng kah? Hơq mơ đươnh piđó ve chaxaau tơơt palơq ađêi, nek piđó kah chóóm điêng cha. 20Bơơi nôôq tangêi e tơk, nek bhêêl hơq chaxaau ơi bâân đââng vôôiq tââq piđó, nek xók achêk, piđó e điêng cha kalóóng nôôq tangêi ađek. 21Kah ngaai bươl mưi tala bhaai tame leq m'beq aau ti, bơơi la kơi ve ngaai têêng kơi achêk, nek têêng tachatang taheek phơn rabươl dhiq aau, dham bhaai tame palơq bhaai ti, hayơq dham taheek val vaaih môôp lơh. 22Kah ngaai kađôôq buôh tame kalóóng aluui ng'kar ti, bơơi la kơi ve ngaai têêng kơi achêk, nek buôh e têêng pađóh aluui ng'kar, hayơq miq buôh lơq aluui ng'kar maar bâân hư, klóóih leq ađek, buôh tame tơơt kalóóng aluui ng'kar tame.”

23Tarnêêng yuur vaaih leq tangêi Sa-baat, xók Ađó vôôiq kóh lalơh nôôq hare aviq, nôôq môôn-đô Ađó tââp xruôt kanuung aviq mi xók bhêêl vôôiq kalơng. 24Manưih Pha-ri-si móón palơq Ađó: “Lêi tôôh, hau kabhuh piđó têêng rau kah chóóm pheep kalóóng tangêi Sa-baat?” 25Ađó ââi piđó: “Nôôq pe kah ve glêh đok tarnêêng Đa-viit — bhua lơq nôôq manưih ting vôôiq palơq ađêi, ơi têêng xók bhua ve kiêng đươi lơq ha-ul alua? 26Ng'kơi hơq ađó ơi vôôiq mót đong Yaang Pleng kalóóng đơơi takóh kadhâng bhanuôih A-bia-tha lơq cha beng ơi bhuôih, nek beng kah chóóm pheep cha, chapiên nôôq takóh kadhâng bhanuôih, lơq ađó kung nh'xóóng đóng nôôq manưih xók tơơt nek palơq ađêi.” 27Chuôq praaq palơq piđó: “Tangêi Sa-baat bâân yuur tavaaih taai akóón manưih, bơơi eh rau akóón manưih taai tangêi Sa-baat. 28Taai kơi achêk, Akóón Manưih nek Chuôq, chênh bhơt ưng tangêi Sa-baat.”