Katu Bible Literal Text
Maak 1
Tarnââp Taruuih Liêm ưng Chuôq Paq Manưih Jê-su, Akóón Yaang Pleng.
Kơi ơi bâân xaraq kalóóng bha-aar Ê-saai manưih đââng taruuih:
“Phaai lêi ađô, Aku kayua manưih đââng paraaq ưng Aku vôôiq toom mat Akóón,
ađó e dhoon kalơng ưng Akóón.
Ve mưi dhariêng dhaloong karơ kalóóng kruung vơng:
‘Phaai dhoon lơơi kalơng ưng Chuôq;
têêng đóng tapat nôôq kalơng ưng Ađó.’”
Jang ơi tơk têêng bap-teem kalóóng kruung vơng lơq truuih pachóóm pheep bap-teem ưng rau klôôq lóóm leq bâân lơơi matu. Plok parah Ju-đê lơq dyóp ngaai dhiq Jê-ru-sa-leem vôôiq tơk palơq ađó lơq piđó bâân ađó têêng bap-teem dhiq karuung Jô-đen xók đơơp truuih matu lơt ađêi. Jang nek xơp aau palơq xok kamel palơq xeet xaneet ng'kar praang tarveng ađêi; lơq đah amiit muônh lơq đơơk gayơơiq booiq.
Ađó truuih pachóóm kơi ađô: “Yaang ve mataai raman lơh aku xók tơk tatun aku; nek Yaang hơq aku kah đaang kóp buôn lêh tarlêi jêi ưng Ađó. Aku têêng bap-teem đóng adhi anó palơq đơơk, bơơi Ađó e têêng bap-teem đóng adhi anó palơq Chuôq Yaang Liêm.”
Tarnêêng yuur vaaih kalóóng nôôq tangêi achêk, ađek nek Chuôq Jê-su ơi bhral tââq Na-xa-reet mađó xưưq Ga-li-lê, lơq Ađó bâân Jang têêng bap-teem dhiq karuung Jô-đen. Lơq n'drươh, xók yuur tââq đơơk, Ađó lêi nôôq talaang pleng bâân talóng lơq Yaang Liêm dhaluônh jaq dhiq Ađó kơi achim paraap. Lơq mưi dhariêng tơk tââq pleng praaq: “Akóón nek Akóón nh'nhơr ưng Aku. Aku lóng iêm lóóm leq Akóón.”
N'drươh xong ađek, Yaang Liêm chut pađâh Ađó vôôiq leq kruung vơng. Ađó tơơt kalóóng kruung vơng puôn jêt tangêi, đơơp Sa-taan dharơơl galơơk. Ađó tơơt palơq adhah booiq, lơq nôôq dhơn Pleng têêng yaauq Ađó.
Xong xók Jang bâân takóóp, Chuôq Jê-su vôôiq tơk Ga-li-lê truuih pakah Taruuih Liêm ưng Yaang Pleng, lơq praaq kơi ađô: “Tangêi kaxe ơi dyóp, lơq katiêk ưng Yaang Pleng ơi tơk đan. Phaai klôôq lóóm lơq huuiq leq Taruuih Liêm.”
Xók vôôiq tring taring tóór taxiiq Ga-li-lê, Ađó lêi Si-môôn lơq En-rê, adhi ưng Si-môôn, xók trah jươl dhiq taxiiq, taai piđó nek manưih bâân kadhóóng. Chuôq Jê-su praaq palơq nhiđó: “Hêq vôôiq ting thêi, hayơq thêi e têêng adhi anó val xar têi trah jươl manưih.” N'drươh, xók ơi lơơi jươl lóóiq, nhiđó vôôiq ting Ađó. Xók vôôiq kơơq mưi n'lóóch kalơng dyơq, Ađó lêi Ja-kơ, akóón padruuih Xê-bê-đê, lơq Jang, adhi ưng ađó, nhiđó xók bươl jươl dhiq bhuông. N'drươh, xong xók Ađó dhaloong nhiđó, hayơq nhiđó yuur vôôiq ting Ađó, lơơi ama ađêi nek Xê-bê-đê tơơt lóóiq dhiq bhuông nek palơq nôôq manưih têêng makông.
Ađó mót kalóóng kanóón Ka-bê-na-um, lơq n'drươh xók ađek, kalóóng tangêi Sa-baat, xók ơi vôôiq mót đong gươl, Ađó tââp truuih pachóóm. Palââng kadrêq xâng leq paraaq pachóóm ưng Ađó, taai Ađó ơi pachóóm piđó kơi ve mataai eh rau kơi nôôq thêi pachóóm gani. N'drươh xók ađek, mưi manưih bâân yaang môôp bóq biêh xók tơơt kalóóng đong gươl ưng piđó, ađó ađek yuur lalơu, kơi ađô: “Jê-su Na-xa-reet ơơi, nôôq yi harau pâng kre tơk Amei? Eh lua Amei bhral buôn leng kaxiêt nôôq yi? Aku n'nal Amei nek ngaai — Yaang Liêm ưng Yaang Pleng!” Chuôq Jê-su trêh teng abhưi, kơi ađô: “Phaai parngau aq lơq gluh tââq manưih ađô!” Hayơq xong xók yaang môôp dhalươq ađó ađek kalơm, lơq lalơu karơ dhariêng, xong abhưi gluh tââq ađó ađô. Dyóp ngaai braaih kakhin, patơk mơ tamóh tapraaq palơq xóng piđó kơi ađô: “Chiên ađô nek hau? Mưi paraaq pachóóm tame ting mataai karơ! Tơk mơ ađó achêk trêh đóng yaang môôp lơq piđó xâng bóóp ađó achêk.” Hayơq taruuih leq Chuôq n'drươh tanđôôr dyóp leq tơk luch parah đan griêq Ga-li-lê.
N'drươh, xók gluh tââq đong gươl, piđó mót kalóóng đong Si-môôn lơq En-rê, nek palơq Ja-kơ lơq Jang. Xók achêk, yaya ưng Si-môôn xók ka-ai kahiir bêch dhiq dharââng, lơq piđó đâh praaq palơq Ađó leq amooq. Bhêêl tơk đan, pei kadhâng têi amooq, Ađó tơq amooq yuur, lơq ka-ai kahiir bil tââq amooq, hayơq amooq tââp têêng yaauq piđó.
Achêk hayơq, tơk habu blót, xong xók mat tangêi ơi xriêp, palââng đââng tơk đóng Ađó pabhơt nôôq ngaai ka-ai karuôq lơq nôôq manưih bâân abhưi bóq. Tabhơt kanóón ơi karong dhiq nham palóng. Ađó payươh bơk manưih bâân dhóóng ka-ai palơq dyóp rau ka-ai dreh, lơq viêng bơk abhưi, hơq Ađó kah đóng pheep nôôq abhưi yuur praaq taai piđó n'nal Ađó.
Mót vaar yayóng yayương, bhêêl pleng dyơq lóng kanam, xong xók yuur meh, Ađó gluh leq nguôi, vôôiq tơk mưi dham ranguôq rangóót, lơq dhiq dham ađek, Ađó gavơh nhan. Si-môôn lơq nôôq manưih tơơt palơq Ađó vôôiq chêk Ađó, lơq piđó bâân lêi Ađó, nek móón palơq Ađó kơi ađô: “Dyóp ngaai maar chik-chêk thêi.” Ađó kayua piđó: “Nôôq he phaai vôôiq leq lââng, kalóóng nôôq kanóón praang xirvir, buôn thêi kung truuih pachóóm dhiq ađek dyơq, taai thêi ơi tơk nek taai tarnêêng ađô.” Ađó vôôiq tơk plok luch parah Ga-li-lê, truuih pachóóm kalóóng nôôq đong gươl ưng dhanuôr manưih lơq viêng abhưi.
Xók achêk, mưi chanak ka-ai tơơt bhơơi tơk palơq Ađó, mââl nhan Ađó lơq chakoh takól, móón palơq Ađó, kơi ađô: “La thêi kiêng, thêi ve mataai têêng aku bâân sek.”
Lơq taai vaaih lóóm kayô ka-er, xók yuur charó têi ađêi, Chuôq kadhâng leq ađó, lơq praaq palơq ađó: “Aku kiêng. Phaai sek aq.” N'drươh nek, ka-ai tơơt bhơơi bil tââq ađó lơq ađó bâân sek.
Xong xók praaq parâng pató ađó, Chuôq n'drươh đóng ađó ađek vôôiq. Chuôq pató ađó ađek: “Phaai chagơn, amei óóq praaq marau marâ palơq dhơ dhangaai, bơơi phaai vôôiq, pakah ađêi palơq takóh kadhâng bhanuôih lơq phaai tapôông nôôq bhanuôih taai tarnêêng bâân sek ưng ađêi, nek tarnêêng hơq Môôi-se ơi truuih pachóóm, kơi mưi paraaq truuih đuui đóng piđó.” Dhơ kơi ađek, xong xók vôôiq lơh, ađó ađek tââp truuih đuui đóng bơk manưih lơq truuih taruuih ađô dyóp leq, tơk mơ Chuôq kah chóóm mót kalóóng mưi kanóón manưih bơk kơi chóóm pakah dyơq, hơq Ađó tơơt hót nguôi dhiq nôôq dham ranguôq rabaang, lơq dhanuôr manưih tââq dyóp dhiq dyơq xók tơk palơq Ađó.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.