Skip to content
BibleKenya

Katu Bible Literal Text

Maak 4

Mưi chu dyơq, Ađó tââp tarnââp truuih pachóóm hót tóór taxiiq, lơq mưi tanóói dhanuôr bơk bhlơng karong lóóiq praang xirvir Ađó. Taai kơi achêk, Ađó ơi jađaang mót leq mưi beq bhuông dhiq taxiiq buôn tơơt dhiq ađek, hayơq luch tanóói dhanuôr tơơt dhiq tóór taxiiq. Chuôq pachóóm piđó bơk rau palơq babi, lơq kalóóng rau pató pachóóm ưng ađêi, Ađó praaq palơq piđó: “Phaai xâng nô! Tôôh, mưi manưih têêng hare vôôiq gluh chóói m'ma. Tarnêêng yuur vaaih xók ađó chóói haró, masôôq haró ruuh tóór kalơng lơq achim tơk chóh luch nôôq ađek. Nôôq kaliêng lââng ruuh dhiq dhơl dyriên, nek dhiq kah ve bơk katiêk mathuk, lơq ađó yuur chat n'drươh nek, taai kah n'lót dhơuq leq katiêk. Xók mat tangêi yuur blo, chanoh bâân parang klaaq róh, lơq taai kah ve riêh, hayơq piđó bâân rang vet. Nôôq lââng ruuh nham m'pơng nôôq nhanhuk axông, axông yuur chat kaxiêq garet ađó, lơq ađó kah vaaih pô pale rau chóóm. Nôôq kaliêng lââng dyơq ruuh dhiq katiêk liêm, ting kaliêng đââng tơk kaliêng kanuung, xók yuur chat hayơq bâân gamak, lơq ađó bóóng pale vaaih pe jêt, vaaih chapat jêt, lơq vaaih mưi hariêng.” Lơq Ađó praaq: “Ngaai ve katór buôn xâng, phaai xâng.”

Xók Chuôq tơơt n'tua mưi ađêi, nôôq manưih tơơt praang Ađó palơq majêt bơơr sưưq-đô tamóh Ađó leq nôôq babi ađek. Ađó praaq palơq piđó: “Rau đu lalââp leq katiêk ưng Yaang Pleng ơi bâân đóng leq adhi anó, bơơi palơq nôôq manưih nguôi, dyóp rau maar nek palơq babi,

buôn xók lêi, nek piđó bhiêk ve lêi, hơq kah chóóm lêi;

xók xâng, nek piđó bhiêk ve xâng, hơq kah chóóm n'nal,

e vaaih, piđó klôôq lóóm lơq matu bâân lơơi đóng piđó.”

Ađó praaq palơq piđó: “Adhi anó kah n'nal babi ađô alua? Kơi achêk nek ng'kơi têêng adhi anó n'nal paluch nôôq babi? Manưih chóói haró achêk chóói paraaq Yaang Pleng. Hayơq ađôk nek nôôq manưih hót tóór kalơng dhiq hơq paraaq Yaang Pleng bâân tachóói, hơq xók piđó xâng paraaq achêk, Sa-taan n'drươh tơk lơq n'drooih bil paraaq Yaang Pleng ơi bâân tachóói dhiq piđó. Kung kơi achêk, ađôk nek nôôq manưih dhiq dhơl dyriên xók bâân tachóói, chênh nek manưih hơq xók piđó xâng paraaq Yaang Pleng, n'drươh pơh đơơp paraaq Yaang Pleng palơq bhuui marhaal, hơq piđó kah ve riêh kalóóng ađêi hơq chapiên nek maxưưiq. Achêk nek xók bhrê hư môôiq kóóp janah yuur vaaih ơi taai paraaq Yaang Pleng, piđó n'drươh bil lóóm huuiq. Sôôq lââng nek nôôq manưih m'pơng nhanhuk axông bâân tachóói paraaq Yaang Pleng. Ađôk nek nôôq manưih xâng paraaq Yaang Pleng, hơq nôôq lóóm kanóq karaang leq đơơi ađôk lơq marlóóch ưng rau karvaan kabhôôq, palơq lóóm n'thaam kiêng bơk rau lââng mót kachóóq, garet phet paraaq Yaang Pleng lơq ađó val xar kah bóóng pale. Lơq ađôk nek nôôq manưih dhiq katiêk liêm bâân chóói paraaq Yaang Pleng, chênh nek nôôq manưih xâng paraaq Yaang Pleng lơq pei đơơp, hayơq vaaih pô bóóng pale, vaaih pe jêt, vaaih chapat jêt, lơq vaaih mưi hariêng.”

Chuôq móón piđó: “Dhơu bat aang eh rau buôn bâân patơơt dhiq hôk môôiq raal karum dharââng pâng kah? Kah alua buôn ađó bâân patơơt dhiq dyung dhơu alua? Ơi kah ve rau đu nek kadrêi lââp la eh rau nek buôn bâân tapakah, kung kah ve rau ơi yuur vaaih kơi đu lalââp hơq eh rau nek buôn đââng leq đu brương. La ngaai ve katór buôn xâng, phaai xâng.” Hayơq Chuôq praaq palơq piđó: “Phaai chamet rau adhi anó xâng. Adhi anó bang đang ting meen n'đơq, nek meen achêk e bâân bang đang đóng adhi anó lơq ađó e đóng lơh kơơq leq adhi anó dyơq. Ơi ngaai manưih ve nek ađó e bâân đóng leq manưih achêk, hayơq manưih kah ve, nek patơk mơ rau hơq manưih achêk ve, e bâân pei lơơi tââq ađó.”

Chuôq truuih: “Katiêk ưng Yaang Pleng nek kơi ađô: thê kơi mưi manưih tôôh chóói m'ma dhiq katiêk, ađó ađek bêch môôiq blââk, hayum môôiq tangêi, kaliêng m'ma bhiêk chamat lơq yuur gamak ng'kơi — chênh ađó kah n'nal. Katiêk vaaih pô bóóng pale ting kơi ưng ađó: laloom tââm nek tââm xơq, tatun ađek tơk kanuung aviq, hayơq kaliêng kóp haleng dhiq kanuung achêk. Hayơq xók nil aviq kriing rââk, ađó đâh pajaq pla kaliêm taai nil xóót ơi tơk.”

Lơq Ađó praaq: “Nôôq he ve chóóm marchơng katiêk ưng Yaang Pleng n'đó kơi, môôiq nôôq he ve chóóm pakah katiêk achêk palơq harau babi? Thê kơi kaliêng habhêi, nek kaliêng hơq xók bâân choh leq katiêk, biêh nek katưưiq tââm kalóóng tabhơt nôôq m'ma kaliêng dhiq katiêk, hơq xók ơi bâân choh xong, ađó yuur chat lơq val xar gamak lơh dyóp m'ma bhơơi kalóóng bhươn, lơq ađó chamat nôôq đóóng gamak, tơk mơ achim pleng ve chóóm têêng xaruh raal a-ô ađó.”

Palơq bơk babi kơi achêk, Ađó pachóóm paraaq Yaang Pleng đóng piđó, ting mơ dhanang piđó ve chóóm xâng n'nal; bơơi Ađó kah rau pachóóm đóng piđó hơq kah ve babi, dhơ kơi ađek xók tơơt panlei, Ađó lók dyóp rau đóng nôôq môôn-đô ađêi.

Kalóóng tangêi ađek, xók pleng ơi habu blót, Ađó praaq palơq piđó: “Nôôq he phaai chaang gan leq tóór hót tôôh.” Lơq xong xók xooq tââq tanóói dhanuôr, piđó đââng Ađó ting vôôiq palơq ađêi, taai Ađó biêh dyơq tơơt dhiq bhuông. Kung ve nôôq bhuông lââng ting Ađó. Mưi garnhuh adhiiq bó gamak bhlơng yuur vaaih lơq ga-uul bhiêk n'dhươi leq bhuông patơk mơ bhuông đan bâân bing đơơk. Hayơq chênh Ađó xók tơơt dhiq chađui bhuông, ganương ganôôiq bêch. Piđó payuur Ađó lơq móón palơq Ađó: “Thêi ơơi, thêi kah karaang nek nôôq he ravang chêt hơ?” Xong xók yuur blââk, Ađó trêh adhiiq lơq praaq palơq taxiiq: “Phaai parngau aq! Hangiêm aq!” Kơi achêk nek, adhiiq pat pruung, lơq ve hangiêm paluch. Ađó tamóh piđó: “Hau adhi anó kakhin? Adhi anó dyơq kah ve lóóm huuiq hơ?” Piđó bâân braaih kakhin palơq vaaih kakhin kapơn pabhlơng lơq piđó praaq xóng piđó: “Kơi achêk Manưih ađô nek ngaai, ơi patơk mơ adhiiq lơq taxiiq phaai xâng bóóp Ađó?”

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.