Maak 5

1Hayơq piđó vôôiq tơk tóór taxiiq hót tôôh, tơk parah katiêk Jê-ra-sê. 2Xók Ađó gluh tââq bhuông, n'drươh mưi chanak bâân yaang môôp bóq gluh kêch Ađó tââq ping xaal. 3Manưih ađô ve dham tơơt mamông kalóóng nôôq ping xaal, lơq kah ngaai ve đuôh kadhâng jư ađó ađek chóóm dyơq, patơk mơ pei tarlêi bhaxêi kung kah chóóm, 4taai bơk chu ađó bâân taklooiq palơq kanum lơq xiêng, hơq tarlêi bhaxêi nek bâân ađó rươt tatươt, hayơq kanum nek bâân m'poh bhriq, lơq kah ngaai karơ đuôh buôn kadhâng ađó ađek. 5Tóóng luch tangêi lơq hayum kalóóng nôôq bóng ping lơq dhiq nôôq bôôl booiq, ađó ađek gavơơu lalơu lơq gareh iêt achak ađêi palơq dhơl lơp huuch. 6Xók lêi Chuôq Jê-su tââq changaai, ađó mut tơk lơq gim mat leq katiêk toom Chuôq. 7Karơ dhariêng gavơơu lalơu, ađó ađek praaq: “Jê-su ơơi, Akóón ưng Yaang Pleng Bhơt Yaal, aku ve rau pâng kre palơq Amei? Aku nhan gavơh Amei ng'kóh toom Yaang Pleng, óóq têêng janah aku.” 8Taai Chuôq biêh ơi kayua đóng ađó, kơi ađô: “Yaang môôp tôôh, phaai gluh tââq manưih ađô.” 9Chuôq tamóh ađó: “Amei hau achak?” Ađó ââi palơq Chuôq: “Achak aku nek Kabhuh Linh, ơi nôôq yi bơk.” 10Hayơq abhưi bhiêk yayeen nhan gavơh Ađó kơi Amei óóq viêng nôôq piđó gluh tââq parah ađek. 11Xók achêk, dhiq ađek ve mưi kanan adhââk lóng bơk xók bâân paloh cha dhiq bôôl, 12hayơq piđó nhan panhel Chuôq, kơi ađô: “Nhan kayua đóng nôôq yi mót kalóóng kanan adhââk, buôn nôôq yi ve chóóm jaq leq piđó.” 13Ađó đóng pheep piđó, lơq xók ơi gluh nek nôôq yaang môôp jaq leq kanan adhââk, hayơq kanan adhââk — pađơq mơ bơơr ngaan panong — tââq bhung bôôl harluông đâh leq taxiiq lơq chêt thaleng dhiq taxiiq. 14Nôôq manưih jư adhââk mut xooq lơq truuih lóóiq tarnêêng achêk kalóóng kanóón bơk dhanuôr lơq dhiq kanóón manưih m'bưưiq, hayơq bơk manưih pơh tơk buôn lêi hau tarnêêng ơi yuur vaaih. 15Piđó tơk palơq Chuôq Jê-su lơq lêi manưih bâân abhưi bóq — nek manưih glêh bâân Kabhuh Linh abhưi mót bóq — xók tơơt dhiq ađek, chóóm xơp n'đóh tư têêq lơq tơơt kalóóng akoq abôk n'taach, nek piđó lóng kakhin kapơn. 16Nôôq manưih ơi lêi truuih lóóiq đóng piđó tarnêêng ơi yuur vaaih n'đó kơi leq manưih bâân abhưi bóq lơq chiên leq kanan adhââk. 17Lơq piđó pơơh bóóp nhan Ađó xooq tââq xưưq xaang ưng ađêi 18Xók Ađó bhadyaang mót leq bhuông, manưih ơi glêh bâân abhưi bóq nhan panhel Ađó buôn ađêi ve chóóm tơơt palơq Ađó. 19Chuôq kah đóng pheep ađó, bơơi kayua đóng ađó: “Phaai chô leq đong amei, tơk palơq nôôq kabhuh ưng amei hơq truuih lóóiq đóng piđó tarnêêng gamak Chuôq ơi têêng dhiq amei lơq ng'kơi Ađó ơi pakah lóóm kayô ka-er amei.” 20Lơq hayơq, ađó gluh vôôiq lơq tââp truuih đuui kalóóng xưưq Đê-ka-bô-lơ tarnêêng gamak ng'kơi đu Chuôq Jê-su ơi têêng đóng ađêi, lơq dyóp ngaai maar chrih xâng.

21Xong xók Chuôq Jê-su tơơt dhiq bhuông chaang gan tóór hót tôôh machu dyơq, mưi tanóói dhanuôr bơk bhlơng karong kaboq lóóiq praang Ađó, lơq Ađó xók tơơt dhiq tóór taxiiq. 22Tôôh, mưi kalóóng nôôq manưih jư lêi đong gươl, achak nek Jaai-ru, vôôiq tơk, lơq xók lêi Chuôq, ađó chakoh takól dhiq dyung Chuôq. 23Ađó panhel nhan gavơh Chuôq hơq praaq kơi ađô: “Akóón pađiil katưưiq ưng aku xók lóng ngơn bhlơng. Nhan Chuôq tơk buôn Chuôq lơơi têi dhiq ađó hơq đóng ađó ve chóóm bâân yươh lơq bâân mamông.” 24Kơi achêk nek Chuôq vôôiq palơq ađó, mưi tanóói dhanuôr lóng bơk kung vôôiq ting Ađó lơq kaxiêq praang xirvir Ađó.

25Ve mưi pađiil pakan ơi bâân dhuôr hóói ahaam majêt bơơr kamó, 26ơi đơơp jarnah ka-ai kuôq bơk taai bơk manưih payươh lơq ơi pagluh sek dyóp rau karvaan ađêi, hơq kah rau đââng lóóiq malơơi, bơơi klóóih leq ađek, ka-ai dyơq xar ngơn lơh, 27xong xók xâng leq Chuôq Jê-su, nek xók tơk đan hót hóng Chuôq m'pơng tanóói dhanuôr bơk, ađó rapơq leq aau Chuôq. 28Ơi ađó kanóq kơi ađô: “La aku chapiên rapơq leq aau Chuôq giêl nek aku e bâân yươh.” 29N'drươh, ka-ai ahaam hóói ưng ađó pat lóóiq, lơq ađó chóóm n'nal dhiq achak ađêi, kơi achak ađêi ơi bâân yươh tââq ka-ai. 30N'drươh, Chuôq Jê-su, bâân n'nal dhiq chênh ađêi nek mataai raman tââq ađêi ơi yuur gluh, hayơq palâh lóóiq m'pơng kabhuh ganơr, Ađó tamóh kơi ađô: “Ngaai ơi xuui leq aau ưng aku?” 31Nôôq môôn-đô Ađó móón palơq Ađó: “Thêi lêi kabhuh ganơr xók paliên kaxiêq thêi, hơq thêi dyơq tamóh: ‘Ngaai xuui leq aku’ hơ?” 32Chuôq dyơq xók lêi praang buôn lêi ngaai ơi têêng rau ađek. 33Xók achêk, manưih pađiil pakan, taai ơi xar kakhin kapơn lơq hayer papreh, n'nal tarnêêng ơi yuur vaaih đóng ađêi, hayơq ơi tơk, gim mat leq katiêk toom Chuôq lơq truuih lóóiq đóng Chuôq pabhơt rau lalua. 34Bơơi Chuôq praaq palơq ađó: “Akóón pađiil ơơi, lóóm huuiq akóón ơi payươh akóón. Phaai vôôiq kalóóng yươq rau ha lơq bâân yươh karơ tââq dhuôr ka-ai ưng akóón.”

35Kalóóng bhêêl Ađó dyơq xók praaq, ve nôôq manưih tââq đong ưng manưih jư lêi đong gươl tơk truuih kơi ađô: “Akóón pađiil ưng amei ơi chêt. Hau hayơq têêng panhok thêi dyơq?” 36Bơơi xók bâân xâng paraaq piđó móón, Chuôq Jê-su móón manưih jư lêi đong gươl: “Óóq kakhin. Chapiên mưi huuiq giêl.” 37Ađó kah đóng pheep ngaai lââng ting vôôiq palơq ađêi chapiên Phi-e-rơ, Ja-kơ lơq Jang, adhi Ja-kơ. 38Ađó vôôiq tơk đong ưng manưih jư lêi đong gươl lơq lêi lum nhôôn nhaauq palơq nhiim griit lơq lalơu lalaang ka-uôih bhangơr. 39Xók bhadyaang mót, Ađó praaq palơq piđó: “Hau nôôq pe ranguôq rangóót lơq nhiim griit? Akóón paniên yươq chêt, hơq ađó bêch giêl.” 40Kơi achêk nek kabhuh piđó kachang ajóóch Ađó, bơơi xók ơi chuih bhơt kabhuh piđó gluh leq nguôi, Ađó đââng ting ama, amêêq ưng akóón paniên lơq nôôq manưih vôôiq palơq Ađó, hayơq Chuôq Jê-su tơk dham akóón paniên bêch. 41Xong xók kadhâng têi akóón paniên, Ađó kayua akóón pađiil: “Ta-li-tha, kum!” paraaq achêk nek bâân lóók nek: “Akóón pađiil katưưiq, aku kayua akóón phaai yuur blââk.” 42N'drươh, akóón pađiil yuur tơơt lơq bhadyaang vôôiq (taai ơi đuôh majêt bơơr tuôi), lơq nôôq manưih dhiq ađek lóng kadrêq lêi, lêi chrih pabhlơng. 43Ađó praaq pagat pató piđó kơi kah mưi ngaai chóóm n'nal tarnêêng ađô, lơq Ađó kayua piđó đóng akóón pađiil cha.