Skip to content
BibleKenya

Katu Bible Literal Text

Maak 6

Tââq dhiq ađek, Ađó ơi yuur vôôiq, hayơq chô tơk bhươl kanóón ưng ađêi, lơq nôôq môôn-đô ưng Ađó vôôiq ting Ađó. Tơk tangêi Sa-baat, Ađó tââp truuih pachóóm kalóóng đong gươl. Bơk manưih xâng bâân chrih lêi, praaq kơi ađô: “Nôôq paraaq truuih pachóóm ađô n'tââq pei pagluh? Đu tarbech galang ơi bâân đóng leq ađó ađô palơq nôôq raman chrih kơi đu tôôh yuur vaaih tââq têi ađó ađek nek ng'kơi? Eh dhơq ađô nek tadhươm têêng tarnêêng kóóch chan, akóón padruuih ưng Ma-ri, lơq anó padruuih ưng Ja-kơ, Jô-sê, Ju-đe lơq Si-môôn alua? Eh dhơq nôôq adhi pađiil ưng ađó achêk xók tơơt dhiq ađô m'pơng nôôq he alua?” Piđó bâân praaq tamôôp leq Ađó. Chuôq Jê-su praaq palơq piđó kơi ađô: “Manưih đââng taruuih nek kah hat rau bhi chap, chapiên dhiq xưưq xaang ađêi, kalóóng kabhuh xóng anó ađêi lơq dhiq manưih đong ađêi.” Ađó kah chóóm têêng dhơ dharau n'đó tarnêêng mataai raman dhiq ađek, chapiên Ađó ơi payươh ka-ai xók lơơi têi dhiq m'bưưiq bhlơng manưih ka-ai. Ađó lêi chrih ơi taai lóóm kah huuiq ưng piđó, hayơq Ađó vôôiq truuih pachóóm praang nôôq bhươl kanóón.

Ađó dhaloong majêt bơơr sưưq-đô lơq tââp kayua piđó yuur vôôiq, tabơơr chanak, Ađó kung đóng leq piđó mataai raman dhiq nôôq yaang môôp, lơq praaq pató piđó kơi óóq rau đââng ting xók vôôiq kalơng, chapiên mưi tarlââng giêl — kah beng, kah chadhung, kung kah jêên baak kalóóng xaneet tarveng — hơq ve đâq jêi dheep, lơq “Adhi anó óóq xơp bơơr aau.” Lơq Ađó kayua đóng piđó: “Hơq xók adhi anó mót leq kalóóng ngaai đong, phaai bhiêk tơơt dhiq ađek đóng tơk xók bhêêl adhi anó yuur vôôiq tââq đong achêk. Dhơ dhakơi n'đó dhiq kah pơh yaauq adhi anó, môôiq kah đơơp xâng adhi anó, nek xók xooq tââq ađek, phaai tapiêh puui dhiq dyung ađêi kơi đóng lêi jaklâk jơl piđó.” Kơi achêk nek, xong xók yuur vôôiq, piđó truuih pachóóm kơi dyóp ngaai kơng phaai klôôq lóóm. Piđó viêng bơk abhưi, lơq chadrươh xut dhơu đóng bơk manưih ka-ai lơq payươh piđó.

Kơi achêk hayơq, bhua Hê-rôôt ơi xâng đââr taruuih ađô, ơi tanđôôr achak Chuôq ơi val xar bơk ngaai n'nal, lơq palââng praaq kơi ađô: “Jang Bap-tiit ơi bâân têêng đóng mamông lóóiq tââq akan chêt, taai ađek nôôq raman chrih mataai karơ xók yuur têêng dhiq manưih ađô.” Hayơq nôôq manưih lââng praaq kơi ađô: “Ađó ađek nek Ê-li.” Hơq sôôq lââng dyơq praaq ađek nek: “Mưi manưih đââng taruuih, thê kơi mưi kalóóng nôôq yaang đââng taruuih.” Bơơi xók xâng kơi achêk, Hê-rôôt móón kơi ađô: “Jang, manưih hơq aku têch akoq, ađó achêk ơi bâân têêng đóng mamông lóóiq.” Ơi chênh Hê-rôôt, ơi kayua manưih, kóóp Jang lơq klooiq ađó kalóóng đong kanam leq tarnêêng Hê-rô-đia (kađiêl ưng Phi-liip, adhi padruuih bhua) ơi taai bhua ơi pei amooq ađek. Taai Jang ơi praaq palơq Hê-rôôt kơi ađô: “Alua nek lơt gani xók bhua pei kađiêl ưng adhi padruuih ađêi.” Bơơi Hê-rô-đia môôp lóóm ađó lơq kiêng leng ađó, bơơi amooq ađek kah chóóm, taai Hê-rôôt kakhin Jang, ơi n'nal ađó nek manưih bhơt liêm lơq liêm kre, hayơq bhua jư đóng ađó bâân yươq rau ha, dhơ xók xâng ađó praaq, bhlua lóng kadhaap lóóm, hơq bhua dyơq bhơt lóóm tameng xâng ađó. Hayơq xók tơk bhêêl xók kre dhalam, nek xók Hê-rôôt dhoon dhanah chana hei tangêi ađêi n'niên yaauq nôôq kuôn gamak ưng ađêi palơq nôôq bhalơng linh, lơq kabhuh têêng gamak parah Ga-li-lê, nek bhêêl ađek akóón pađiil Hê-rô-đia ưng bhua ơi bhadyaang mót, tanâât yayaq, lơq têêng Hê-rôôt palơq nôôq tamóói madhiq baang palơq bhua lóng iêm lóóm, hayơq bhua ơi praaq palơq akóón pađiil: “Phaai nhan tââq aku bhơt dhơ dharau akóón kiêng lơq aku e đóng ađó leq akóón.” Ađó praaq ng'kóh palơq pađiil kơi ađô: “Dhơ akóón nhan aku, tơk m'pơng katiêk karuung ưng aku, aku e kung đóng akóón.” Kơi achêk nek, xong xók gluh leq nguôi, akóón pađiil tamóh amêêq ađêi: “Akóón chóóm nhan harau?” Hayơq ađó ađek ââi: “M'beq akoq ưng Jang Bap-tiit.” N'drươh ađek, kalóóng đu tahươk tahơn xók palâh val lóóiq palơq bhua, akóón pađiil nhan: “Akóón kiêng nek n'drươh xók ađôk bhua đóng leq akóón m'beq akoq ưng Jang Bap-tiit lơơi dhiq pươih.” Dhơ val xar lóng ranguôq lóóm, bơơi bhua kah chóóm kah đóng ađó ơi taai paraaq ng'kóh ưng ađêi lơq nôôq tamóói xók tơơt madhiq baang palơq ađêi, hayơq bhua n'drươh, kayua linh kadhâng bhươt, kayua đââng akoq ưng Jang tơk, lơq xong xók gluh leq nguôi, ađó vôôiq têch akoq Jang kalóóng đong kanam. Ađó đââng akoq ưng Jang lơơi dhiq pươih lơq đóng ađó leq akóón pađiil, hayơq akóón pađiil đóng ađó lóóiq leq amêêq ađêi. Xók ơi xâng n'nal chiên, nôôq môôn-đô ưng Jang tơk, pei xaak ađó, lơq đââng ađó vôôiq tơp kalóóng ping.

Nôôq sưưq-đô nhoom lóóiq palơq Chuôq Jê-su, truuih đóng Ađó dyóp tarnêêng piđó ơi têêng lơq nôôq rau piđó ơi pachóóm. Ađó kayua piđó: “Chênh adhi anó phaai tư vôôiq tơk n'dhiq đu n'tua ranguôq rabaang, lơq phaai dhêi drơq maxưưiq.” Ơi ve lóng bơk manưih vôôiq lalơh manưih vôôiq val, lơq piđó patơk mơ kah ve nek bhêêl buôn chacha. Piđó palơq xóng piđó vôôiq dyók leq bhuông tơk mưi dhiq bhahi bhatoong. Bơk manưih ơi lêi piđó yuur vôôiq lơq đâh n'nal piđó, hayơq tââq plok nôôq charvaal, palââng ơi mandrươh mut dyung tơk ađek lơq tơk ađek laloom piđó. Xók ơi bhadyaang gluh tââq bhuông, Ađó lêi mưi tanóói dhanuôr lóng bơk, lơq Ađó vaaih lóóm kayô ka-er piđó taai piđó thê kơi trưưu kah ve manưih jư, hayơq Ađó tââp tanââp pachóóm piđó bơk rau. Bhêêl ađek ơi trê aq, hayơq xók tơk palơq Ađó, nôôq môôn-đô ưng Ađó móón kơi ađô: “Dhiq ađô nek dham bhahi bhatoong lơq bhêêl ađô habu hayum bhlơng aq. Nhan đóng dhanuôr yuur chô, buôn xong xók vôôiq mót nôôq bhươl kanóón praang xirvir ađôk, nek piđó ve chóóm tư kakơl ve rau buôn cha.” Bơơi xók ââi piđó, Ađó kayua: “Adhi anó phaai đóng piđó cha.” Piđó ââi palơq Ađó: “Xók ơi vôôiq, ve kơq nôôq yi ve chóóm đuôh kơl bơơr hariêng đơ-ni-ê beng hơq đââng đóng dhanuôr manưih cha hơ?” Kơi achêk hayơq, Ađó praaq palơq piđó: “Phaai vôôiq. Achêk lêi. Adhi anó ve n'đó mơ beq beng?” Xong xók achêk tamóh, piđó móón: “Xââng beq beng lơq bơơr panong kadhóóng.” Ađó kayua đóng pabhơt dhanuôr tơơt chok leq xar ting nhoom dhiq bhơơi taviêng. Piđó tơơt yuur blah nôôq nhoom blah xar mưi hariêng manưih lơq xar xââng jêt manưih. Xong xók kadhâng xââng beq beng lơq bơơr panong kadhóóng, chaling mat leq pleng, Ađó ma-ơ lơq pei veh beng hayơq pađơơp đóng nôôq môôn-đô ađêi buôn piđó đââng nh'xóóng leq dhanuôr, Ađó kung pei blah bơơr panong kadhóóng đóng dyóp ngaai. Piđó maar cha lơq bâân kabhôôq kajrê. Lơq piđó chââih karong bâân majêt bơơr jong bing nôôq paleh beng lêêk lơq kadhóóng. Nôôq manưih ơi cha beng dhơơm ve xââng ngaan manưih padruuih.

N'drươh, Ađó chut kayua nôôq môôn-đô ađêi bhadyaang dyók leq bhuông lơq vôôiq laloom chaang tóór hót tôôh, tơk Bêêt-saai-đa, dyơq xók Ađó đóng dhanuôr chô. Xók piđó ơi tââp vôôiq, Ađó vôôiq đơk leq bôôl buôn nhan gavơh. Tơk hayum, bhuông ơi dhiq m'pơng taxiiq, lơq Ađó tơơt mưi ađêi dhiq katiêk kakóóng. Lêi piđó xók tabhơt karơ chông vơq — taai xók adhiiq chachriik palơq piđó — nek pamơ bhêêl đan brương hayum achêk, Ađó vôôiq dyung dhiq m'piing taxiiq tơk dhiq piđó lơq Ađó kiêng jalơh piđó. Bơơi xók ve lêi Ađó bhadyaang vôôiq dhiq m'piing taxiiq, piđó ngóq kơi ađek nek abhưi, hayơq piđó reen dheek karơ, taai piđó maar ve lêi Ađó lơq bâân braaih kakhin. Bơơi n'drươh, Ađó praaq palơq piđó lơq móón piđó: “Phaai mưng lóóm! Nek thêi ađô! Óóq kakhin!” Ađó bhadyaang mót kalóóng bhuông palơq piđó lơq dhiiq n'dhương hangiêm, nôôq môôn-đô ve kakhin kapơn pabhlơng dhiq m'pơng kalóóng piđó. Taai piđó ơi kah n'nal leq mataai chrih paxar beng, klóóih leq ađek, lóóm piđó bhiêk dyơq nhâng karđiq.

Xók ơi chaang gan hót tóór tôôh, piđó vôôiq tơk Gê-nê-xa-rêêt lơq choq bhuông dhiq ađek. Xók piđó gluh tââq bhuông, taai đâh n'nal Ađó n'drươh, hayơq palââng vôôiq mut plok xưưq achêk lơq tââp glâk nôôq manưih pâng ka-ai dhiq dharââng tơk dham hơq piđó xâng kơi Ađó xók dhiq ađek. Hơq dhơ tadhiq Ađó vôôiq mót, kalóóng nôôq bhươl, môôiq kalóóng kanóón manưih bơk môôiq kalóóng kanóón manưih m'bưưiq, dhanuôr maar đââng nôôq manưih ka-ai tabêch dhiq dham kalơng chơơq lơq nhan Ađó buôn kah mơ lââng piđó ve chóóm xuui leq xrooi aau ưng Ađó, lơq mak ngaai manưih đu xuui leq Ađó maar bâân yươh ka-ai.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.