Maak 7

1Nôôq manưih Pha-ri-si palơq nôôq thêi pachóóm gani, ơi tơk tââq Jê-ru-sa-leem, xók karong lóóiq praang xirvir Ađó. 2Taai ơi lêi masôôq môôn-đô ưng Ađó, xók piđó cha beng palơq tapaang têi anhuq, hơq nek kah raau. 3(Ơi manưih Pha-ri-si kung kơi tabhơt manưih Jo Thaaiq maar kah cha vaar la kah raau têi ađêi pagiit, taai xâng katiêu pachóóm bóóp ưng abhươp ama; 4lơq rau đââng tââq chơơq chô, piđó kah cha la kah raau sek, lơq dyơq bơk rau lââng hơq piđó ơi pei đơơp buôn ting đuui: tarnêêng raau choom dhia, goq góói, lơq nôôq ađô karđôôq palơq kóng.) 5Nôôq manưih Pha-ri-si lơq thêi pachóóm gani tamóh Chuôq: “Taai ng'hau môôn-đô ưng thêi kah mamông ting pachóóm bóóp ưng abhươp ama, hơq vil cha beng palơq têi kah raau?” 6Bơơi xók ââi bóóp piđó, Ađó móón kơi ađô: “Ê-saai praaq taruuih Yaang Pleng lóng dhalam leq nôôq manưih paliêm pakre hót nguôi nôôq pe. Kơi ve xaraq nô kơi:

‘Dhanuôr ađô bhi chap aku dhiq koq bưưr tu n'taak

bơơi lóóm ưng piđó nek bhlưa changaai tââq aku.

7Hayơq piđó bhuôih haanh aku kơi kah malơơi,

xók pachóóm nôôq rau gani ưng akóón manưih kơi ngóq nôôq gani.’

8M'peq lơơi paraaq râng ưng Yaang Pleng, nôôq pe jư ting đu ti ưng akóón manưih.” 9Lơq Ađó praaq piđó: “Nôôq pe alua tarbech kah đươi paraaq râng ưng Yaang Pleng buôn xâng jư đu ti ưng ađêi! 10Ơi Môôi-se pachóóm: ‘Phaai bhi chap ama ađêi palơq amêêq ađêi,’ lơq ‘Manưih đu tóh ama môôiq amêêq, manưih ađek phaai đơơp xariêq palơq akan chêt.’ 11Bơơi nôôq pe móón: ‘La mưi nak praaq palơq ama môôiq amêêq ađêi: “Hayơq rau đu ama amêêq đaang bâân paar gamang tââq akóón nek Ko-baan (chênh nek bhanuôih tapôông leq Yaang Pleng),”’ 12nek nôôq pe kah đóng pheep manưih ađek têêng dhơ dharau đóng ama môôiq amêêq ưng ađêi dyơq, 13têêng paraaq ưng Yaang Pleng xar kơi kah rauriq palơq đu ti ưng nôôq pe hơq nôôq pe ơi truuih lóóiq, lơq nôôq pe têêng bơk rau makơi kơi achêk.” 14Lơq xong xók vil dhaloong dhanuôr manưih tơk, Ađó praaq palơq piđó: “Tabhơt adhi anó phaai xâng aku lơq phaai n'nal: 15Kah ve rau tââq hót nguôi mưi nak mót kalóóng manưih achêk hơq ve chóóm têêng anhuq manưih achêk; bơơi nôôq rau tââq hót kalóóng gluh tââq ađó hayơq nek nôôq rau têêng anhuq palââng.” 16(La ngaai ve katór buôn xâng, phaai xâng.)

17Xók Ađó vôôiq mót leq đong, changaai tââq manưih ganơr, nôôq môôn-đô Ađó tamóh Ađó leq babi. 18Ađó praaq palơq piđó: “Kơi achêk hơq adhi anó kung kah ve rau n'nal hơ? Adhi anó kah n'nal lêi kơi dyóp rau tââq hót nguôi mót kalóóng mưi nak kah chóóm têêng anhuq manưih achêk chóóm hơ? 19Taai ađó yươh vôôiq mót leq kalóóng lóóm manưih, hơq nek mót leq luônh, hayơq bâân pagluh leq kalóóng đong kapóóng (chóóm n'nal nek dyóp tarmông maar sek se.)” 20Bơơi Ađó praaq kơi ađô: “Rau gluh tââq manưih hayơq nek rau têêng anhuq palââng. 21Ơi dhiq hót kalóóng, yuur vaaih tââq kalóóng lóóm akóón manưih, vaaih gluh nôôq karnóq aak, tapiing taniêt, tatông papei, leng manưih, 22têêng tapiing, n'thaam, lóóm aak, chachââr galơơk, ơm cha xaxưa, akóón mat makhinh, tóh đua, i-thi, pacha lóóm. 23Dyóp rau aak ađô tââq hót kalóóng vaaih gluh lơq piđó têêng anhuq palââng.”

24Hayơq xók yuur dyương tââq ađek, Ađó vôôiq tơk parah Ti-rơ lơq Si-đôôn, lơq xók ơi mót leq kalóóng mưi dhanong đong, Ađó kah kiêng ngaai n'nal, hơq kah đuôh palââp ađêi chóóm. 25Bơơi n'drươh, mưi pađiil parkan tôôh, nek manưih ve akóón pađiil katưưiq ưng ađó bâân yaang môôp bóq, taai ơi xâng leq Ađó, hayơq xók tơk, ađó pađam chak dhiq dyung Ađó. 26Xók achêk, manưih pađiil parkan achêk nek manưih Hi-laap, dhong nooi Si-rô-phê-ni-xi, lơq ađó nhan gavơh Chuôq buôn Ađó viêng abhưi gluh tââq akóón pađiil ađêi. 27Ađó praaq palơq pađiil: “Laloom tââm, phaai lơơi akóón anaaq bâân cha đóng kabhôôq kơ, ơi lalua nek kah liêm xók pei beng ưng akóón anaaq lơq m'peq đóng anuq akóón.” 28Bơơi ađó ââi lóóiq lơq móón palơq Chuôq: “Pâng kơi achêk, Chuôq ơơi, lơq nôôq anuq akóón dhiq raal baang cha tââq nôôq beng lêêk ưng akóón anaaq.” 29Kơi achêk nek Chuôq kayua ađó: “Taai paraaq ađô, amei phaai chô aq. Abhưi ơi gluh tââq akóón pađiil ưng amei.” 30Xók val chô tơk đong ađêi, ađó lêi akóón paniên bêch dhiq dharââng, lơq abhưi ơi gluh xooq.

31Lơq mưi chu dyơq, xong xók xooq tââq parah Ti-rơ, Ađó vôôiq kóh pagan kanóón Si-đôôn tơk taxiiq Ga-li-lê, tơk dhiq m'pơng parah Đê-ka-bô-lơ. 32Palââng đââng tơk đóng Ađó mưi manưih tung lơq kabróól, hayơq piđó nhan gavơh Ađó, hơq đóng Ađó lơơi têi dhiq ađó ađek. 33Xók ơi tư ađêi đââng manưih achêk gluh tââq manưih ganơr, Chuôq lơơi nôôq kabró têi ađêi leq bơơr bóng katór ađó, lơq xók kathui havi xong, Chuôq xut leq n'taak ađó. 34Lơq chaling mat leq pleng, Chuôq hââm pađuôiq, hayơq praaq palơq ađó: “Ep-pha-ta,” (kiêng móón nek: “Phaai lóng aq!”). 35Kơi achêk nek katór ađó achêk bâân tarlóng, kadhaap dhiq n'taak ađó bâân taplók, lơq ađó tââp tanââp praaq drêh dróói. 36Ađó pagat piđó buôn piđó kah praaq palơq ngaai. Bơơi Ađó dhaang pagat piđó n'đó mơ, piđó vil dhaang yuur truuih taruuih achêk bơk lơh mơ achêk. 37Palââng chrih lêi bhlơng, praaq kơi ađô: “Ađó achêk ơi têêng dyóp tarnêêng lalua liêm kre. Patơk mơ, ađó achêk têêng đóng manưih tung chóóm xâng lơq manưih a-ơp chóóm praaq.”