Katu Bible Literal Text
Maak 8
Kalóóng nôôq tangêi ađek, vil ve mưi tanóói dhanuôr lóng bơk, lơq kah rau ve buôn cha, xong xók dhaloong nôôq môôn-đô ađêi, Chuôq praaq palơq piđó: “Thêi kayô ka-er tanóói dhanuôr ađô, ơi piđó bhiêk tơơt palơq thêi ơi pe tangêi aq hơq kah rau ve đóng cha châ. La thêi kayua đóng piđó val chô leq đong piđó palơq luônh ha-ul, nek piđó e charbươp chóók kalơng, hơq masôôq manưih kalóóng piđó ơi bhral tââq kanóón changaai bhlơng.” Nôôq môôn-đô Ađó ââi palơq Ađó kơi ađô: “Ngaai manưih dhiq đôk, tơơt dham bhahi bhatoong ađô, ve chóóm pei n'tââq hơq đóng tanóói dhanuôr kơi ađô cha beng kơq?” Ađó tamóh piđó: “Adhi anó ve n'đơq beq beng?” Piđó ââi: “Tapól beq.” Ađó kayua đóng tanóói dhanuôr tơơt leq katiêk, lơq xong xók pei tapól beq beng, ma-ơơn, Ađó pei veh hayơq pađơơp đóng nôôq môôn-đô ađêi buôn piđó ve chóóm đââng têêng yaauq, kơi achêk nek piđó pei dhoon đóng tanóói dhanuôr. Lơq piđó ve nôôq panong kadhóóng katưưiq, hayơq xong xók ma-ơơn leq piđó, Ađó kayua piđó kung nh'xóóng phơn kadhóóng ađô dyơq. Dhanuôr cha lơq bâân kabhôôq kajrê, hayơq piđó karong bâân tapól jong beng lêêk dyơq xưa. Xók achêk, ve mơ puôn ngaan manưih, hayơq Ađó đóng piđó chô. N'drươh, xong xók mót kalóóng bhuông palơq nôôq môôn-đô ađêi, Ađó vôôiq tơk parah Đa-ma-nu-tha.
Nôôq manưih Pha-ri-si tabhral lơq tââp tanââp tarkaai palơq Ađó, chêk-tabâân dhiq Ađó mưi karnal chrih tââq pleng, buôn klêêu Ađó. Xong xók hââm pađuôiq kalóóng lóóm karnóq ađêi, Ađó ââi: “Taai hau dhong nooi ađô chêk-tabâân karnal chrih? Lalua, aku praaq palơq nôôq pe, kah ve n'đó karnal chrih e bâân đóng leq dhong nooi ađô …” Hayơq xók ơi xooq lơơi piđó, mót lóóiq kalóóng bhuông, Ađó vôôiq chaang tóór hót tôôh.
Nôôq môôn-đô havil pei đââng beng, lơq piđó kah rau ve palơq ađêi kalóóng bhuông, chapiên mưi beq beng. Ađó praaq pahêch piđó kơi ađô: “Phaai chagơn! Phaai hêch leq piêng ưng manưih Pha-ri-si lơq piêng ưng Hê-rôôt.” Piđó tapraaq xóng piđó kơi chiên ađô nek taai piđó kah ve beng. Taai n'nal kơi achêk, Chuôq Jê-su praaq palơq piđó: “Hau adhi anó vil tarkaai taai chiên adhi anó kah ve beng? Adhi anó dyơq kah chóóm n'nal, lơq kung kah n'nal hơ? Ve lua lóóm adhi anó val xar ka-óng nhâng aq? Ve mat hơq adhi anó kah lêi hơ? Ve katór hơq adhi anó kah xâng hơ? Adhi anó kung kah hei hơ? Xók thêi veh xââng beq beng đóng xââng ngaan manưih, adhi anó ơi karong bâân n'đơq jong bing beng lêêk?” Piđó ââi palơq Ađó: “Majêt bơơr jong.” “Hayơq bhêêl tapól beq beng đóng puôn ngaan manưih, adhi anó karong bâân n'đơq jong bing beng lêêk?” Piđó ââi palơq Ađó: “Tapól jong.” Lơq Ađó praaq piđó: “Ng'kơi têêng hơq adhi anó dyơq kah n'nal?”
Piđó vôôiq tơk Bêêt-saai-đa, lơq palââng đââng tơk đóng Ađó mưi manưih kabaang, hayơq piđó nhan gavơh Ađó buôn Ađó ve chóóm kadhâng leq ađó ađek. Kadhâng têi manưih kabaang, Ađó chơơng ađó ađek gluh leq nguôi bhươl. Xong xók kathui đơơk havi leq mat ađó, lơơi têi ađêi dhiq ađó, Chuôq tamóh ađó: “Amei ve lêi dhơ dharau kah?” Chaling lêi, ađó ââi: “Aku lêi palââng hơq piđó thê kơi nôôq tââm n'lóóng xók vôôiq.” Tââq ađek, mưi chu dyơq, Chuôq lơơi têi dhiq mat ađó, hayơq ađó ađek lêi mre, mat lêi bâân yươh lơq ađó ve lêi dyóp rau kơi drêh dróói. Chuôq kayua ađó val chô leq đong ađêi, pató: “Óóq chô mót kalóóng bhươl.”
Chuôq Jê-su palơq nôôq môôn-đô ađêi vôôiq mót leq nôôq bhươl kanóón mađó Xê-xa-rê Phi-liip, lơq dhiq kalơng vôôiq, Ađó tamóh nôôq môôn-đô ađêi, praaq palơq piđó kơi ađô: “Palââng móón thêi nek ngaai?” Hayơq piđó praaq palơq Ađó, móón kơi ađô: “Jang Bap-tiit, sôôq lââng nek ‘Ê-li,’ hayơq sôôq lââng dyơq nek: ‘Mưi kalóóng nôôq manưih đââng taruuih.’” Ađó tamóh piđó: “Hayơq adhi anó móón thêi nek ngaai?” Hayơq bhêêl ââi bóóp, Phi-e-rơ ââi palơq Ađó: “Thêi nek Chuôq Paq Manưih.” Ađó pahêch piđó kơi piđó kah chóóm praaq palơq ngaai leq Ađó.
Lơq Ađó tââp pachóóm piđó kơi Akóón Manưih phaai đơơp bơk rau ka-ai karuôq, bâân m'peq lơơi taai nôôq takóh bhươl, nôôq takóh kala kadhâng bhanuôih palơq nôôq thêi pachóóm gani, lơq bâân leng chêt, hayơq mamông lóóiq xong pe tangêi. Ađó ơi móón paraaq ađô kơi drêh dróói. Phi-e-rơ, xong xók đââng Chuôq n'tua dhiq, tââp trêh kajơq Ađó. Bơơi, xók ơi palâh lóóiq lêi nôôq môôn-đô ađêi, Ađó trêh teng Phi-e-rơ kơi ađô: “Sa-taan tôôh, phaai róch xooq hót hóng aku! Taai amei kah lơơi lóóm ađêi kanóq tơk tarnêêng ưng Yaang Pleng, hơq chapiên tơk tarnêêng akóón manưih.” Xong xók dhaloong tanóói dhanuôr palơq nôôq môôn-đô ađêi, Ađó praaq palơq piđó: “La ngaai kiêng ting tapun aku, manưih ađek phaai m'peq lơơi ađêi kala, đuôl n'lóóng m'baang chatông ađêi lơq ting aku. Ơi la ngaai kiêng paq parmông ađêi, nek e têêng tabil ađó, hayơq manưih đu ơi taai aku lơq Taruuih Liêm e đơơp tabil parmông ađêi, nek e bâân paq ađó. Ơi hau malơơi đóng manưih bâân luch talaang katiêk hơq vil nek bil yaang ravaai ađêi? Manưih achêk ve chóóm harau pei kơi ve rau raxal palơq yaang ravaai ađêi? La ngaai kachiit mat leq Aku lơq paraaq ưng Aku kalóóng dhong nooi tapiing taniêt lơq matu lơt ađô, nek Akóón Manưih kung e kachiit mat leq manưih ađek xók Ađó bhral kalóóng brương cha-iil ưng Ama Ađó nek palơq nôôq dhơn pleng liêm.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.