Katu Bible Literal Text
Lu-ka 21
Xók ngơơq lêi, Ađó lêi nôôq manưih kavaan tapôông bhanuôih ưng piđó leq hôk đong bhanuôih. Hayơq Ađó lêi mưi amooq kamaai ngeeo achêk tapôông leq ađek bơơr đông jêên katưưiq. Lơq Ađó móón: “Alua, thêi móón palơq adhi anó kơi amooq kamaai ngeeo ađô ơi tapôông chrooq bơk lơh dyóp ngaai, ơi dyóp nak tôôh đââng tapôông chrooq nôôq bhanuôih tââq rau xưa raai ưng ađêi. Dyơq amooq ađô, tââq đu ngeeo ha-ul ưng ađêi, ơi tapôông luch drươp karvaan đu amooq ve.”
Xók nôôq manưih praaq leq đong bhanuôih, kơi đong bâân parcham paliêm palơq nôôq kalaat dhơl liêm kre lơq nôôq ađô đaak chik pagoop, nek Ađó móón: “Nôôq rau đu adhi anó xók lêi, e tơk tangêi đu mót bhêêl achêk, kah ve kaliêng dhơl e bâân lơơi tagơơn dhiq kaliêng dhơl lââng hơq kah bâân pakalơm.” Xók achêk, piđó tamóh Ađó kơi ađô: “Hayơq nek, thêi ơơi, n'đó bhêêl e ve nôôq tarnêêng ađek, lơq karnal hau xók nôôq tarnêêng achêk ravang vaaih?” Hayơq Ađó ââi: “Phaai chagơn đóng adhi anó óóq bâân galơơk chachââr. Ơi bơk nak e tơk vơn achak thêi, praaq: ‘Chênh nek Aku,’ lơq ‘Ganah marngi ơi đan.’ Óóq vôôiq ting piđó. Mat lââng, xók adhi anó xâng leq tarleng lơq tarvei tarlak, nek óóq kapơn, ơi nôôq tarnêêng achêk phaai vaaih laloom, dhơ kơi ađek, rau xariêq kah ơi nek dhalam bhêêl ađek.”
Tatun ađek, Ađó móón palơq piđó: “Dhanuôr ađô e yuur tajơl lóóiq dhanuôr lââng, lơq katiêk ađô jơl palơq katiêk tôôh. E ve dyơq nôôq dha-ơr katiêk gamak lơq bơk ha-ul króól, palơq bơk parluh dhiq bơk leq. E ve dyơq nôôq rau kakhin kapơn lơq nôôq karnal gamak tââq pleng. Bơơi laloom dyóp rau achêk, palââng e hayuur têi ưng piđó dhiq adhi anó lơq e kóóp janah adhi anó, xók kóóp pajaau leq nôôq đong gươl lơq đong kanam, kóóp đââng adhi anó tơk toom mat nôôq bhua lơq kuôn kadhâng xưưq ơi taai achak thêi. Rau ađek e xar xók bhêêl đóng adhi anó đââng truuih praaq. Hayơq kơi ađek, nek phaai kanóq dhiq lóóm adhi anó óóq ravang đóng tư paq ađêi, ơi thêi e đóng leq adhi anó bóóp praaq lơq rau tarbech galang đu tabhơt kabhuh brau tarjơl adhi anó kah chóóm jơl lóóiq môôiq ââi kataar bóóp dyơq. Bơơi adhi anó patơk mơ e bâân kóóp pajaau taai amêêq ama, adhi anó, kabhuh xóng lơq parjơơk, hayơq palââng e leng chêt masôôq manưih kalóóng adhi anó. Adhi anó e bâân dyóp nak dyââng lêi taai achak thêi. Hơq mưi n'dreh xok dhiq akoq adhi anó kung kah ve bil. Kalóóng rau đuôh jruôn parngau ưng ađêi, adhi anó e bâân ravaai ađêi.
Bơơi la nh'xók adhi anó lêi kanóón Jê-ru-sa-leem bâân taxavaang taai nôôq kabhuh linh, nek xók achêk phaai n'nal kơi rau rơh pahư kanóón ađô ơi đan vaq. Xók ađek, ngaai kalóóng xưưq Ju-đê, nek klôôn leq bôôl, ngaai tơơt kalóóng kanóón, phaai yuur xooq, lơq ngaai tơơt dhiq ruông, óóq mót leq kalóóng kanóón. Ơi ađôk nek nôôq tangêi chróót đóng dyóp paraaq ơi xaraq bâân tajaap. Bơơi, ayô đóng leq pađiil xók ve đađââng lơq nôôq pađiil xók đóng akóón mam kalóóng nôôq tangêi achêk! Ơi e ve bhrê hư gamak kalóóng xưưq, lơq pagrâ gamak n'toh dhiq dhanuôr ađô. Piđó e kalơm chêt raal pla bhươt lơq piđó bâân takóóp tơk leq dyóp katiêk, lơq kanóón Jê-ru-sa-leem e bâân nôôq dhanuôr katiêk lââng tađâq đóng tơk xók hơq ganah bhêêl ưng nôôq dhanuôr katiêk lââng bâân dyóp.
E ve nôôq karnal dhiq mat tangêi, mat kaxe lơq nôôq chatur xamenh, lơq rau nhok karnóq ưng nôôq dhanuôr tơơt dhiq katiêk kalóóng rau karaang kakhin taai dhariêng kariêh lalơu ưng taxiiq lơq ga-uul đơơk n'dhươi. Palââng rangat taai kakhin kapơn lơq đương nôôq bhrê hư ravang n'toh leq dhanuôr dhiq katiêk, ơi nôôq mataai karơ dhiq pleng e dha-ơr dhakơp. Tatun ađek, piđó e bâân lêi Akóón Manưih bhral jaq dhiq kalóóng garboq dhaluk palơq mataai karơ lơq tabah taklaaq gamak. Bơơi xók nôôq tarnêêng achêk tââp vaaih, nek yuur dyương lơq ngơơq payaal akoq ađêi, ơi đu paq jóói ưng adhi anó nôk xók tơk đan.”
Ađó truuih leq piđó mưi babi: “Nek lêi tââm tarung lơq tabhơt n'lóóng póóih. Mak xók piđó tame m'bhôk tamlóh, adhi anó n'nal, xók tư chamet lêi kơi nil hapaang ơi đan vaq. Kung kơi ađek, xók adhi anó lêi nôôq tarnêêng ađô vaaih, adhi anó phaai n'nal kơi katiêk ưng Yaang Pleng ơi đan. Alua, thêi móón palơq adhi anó kơi klaang đơơi ađô lalua e kah lơh đóng tơk xók dyóp rau tarnêêng tôôh vaaih. Pleng lơq katiêk e lơh bil, bơơi nôôq paraaq ưng thêi lalua e kah ve chóóm bil.
Bơơi phaai chagơn leq ađêi kala, đóng lóóm adhi anó yươq bâân têêng đóng pahaleng kalóóng chiên ơm cha, ból plơ lơq nôôq karaang đơơi ađôk, patơk mơ tangêi achêk ve chóóm parmat biêng dhiq adhi anó kơi biêng taglêh, ơi rau ađek e vaaih tơk leq dyóp nak mamông dhiq plok hóng katiêk. Bơơi phaai meh lóóm xók dyóp bhêêl, nhan gavơh hayơq đóng adhi anó ve dyóp praan đóng jalơh tabhơt nôôq rau ravang vaaih ađek, lơq đóng dyương toom mat Akóón Manưih.”
Kơi ađek nek xók tangêi, Ađó truuih pachóóm kalóóng đong bhanuôih, dyơq xók habu kanam, xong xók đơk leq bôôl nek đóók Ô-liiu, Ađó dhêi drơq hayum. Lơq dyóp ngaai tơk palơq Ađó xók yayóng marư rư đóng xâng Ađó dhiq kalóóng đong bhanuôih.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.