Katu Bible Literal Text
Lu-ka 20
Tarnêêng vaaih leq mưi tangêi tôôh, xók Ađó dyơq pachóóm manưih dhanuôr kalóóng đong bhanuôih lơq truuih Taruuih Liêm, nôôq takóh kala kadhâng bhanuôih lơq nôôq takóh pachóóm gani palơq nôôq takóh bhươl vôôiq mót. Piđó móón palơq Chuôq Jê-su kơi ađô: “Nhan đóng nôôq yi n'nal n'đó tââq kataai xanêi đu hơq amei têêng nôôq tarnêêng ađô, môôiq ngaai nek manưih ơi pajaau leq amei kataai xanêi ađô.” Bơơi đóng ââi, Ađó praaq palơq piđó: “Aku kung e tamóh nôôq pe mưi xayar, nek móón đóng aku: Pheep bap-teem ưng Jang nek tââq pleng môôiq tââq akóón manưih?” Kơi ađek nek piđó tapraaq xóng ađêi, móón kơi ađô: “La nôôq he móón: ‘Tââq pleng,’ ađó ađek e tamóh: ‘Kơi ađek hau nôôq pe kah huuiq ađó?’ Dyơq la nôôq he móón: ‘Tââq akóón manưih,’ nek luch manưih dhanuôr e glơm dhơl nôôq he, ơi manưih dhanuôr maar huuiq Jang nek manưih đââng taruuih.” Lơq hayơq piđó ââi kơi piđó kah n'nal nek n'tââq. Chuôq Jê-su praaq palơq piđó: “Aku kung kah đóng nôôq pe n'nal n'đó tââq kataai xanêi aku têêng nôôq tarnêêng achêk.”
Hayơq Ađó tââp truuih babi ađô đóng manưih dhanuôr: “Mưi nak tôôh choh mưi bhươn nho, lơq đóng nôôq manưih choh nho vaq ađó, hayơq vôôiq tơk leq xưưq lââng kalóóng mưi ganah đươnh. Tơk nil xóót leh, ađó kayua mưi dhơn ratơơq tơk palơq kabhuh choh nho đóng piđó e pagoop leq ađó pei tââq pale bhakó ưng bhươn nho. Bơơi xong xók m'bhiiq vei, kabhuh choh nho ơi đuôi ađó ađek chô têi kagóh. Ađó dyơq bhiêk kayua mưi dhơn ratơơq lââng tơk, bơơi ađó ađô kung kơi ađek, piđó ơi đuôi ađó chô têi kagóh xong xók m'bhiiq vei lơq praaq tamôôp. Hayơq ađó lóóiq kayua dyơq dhơn ratơơq đu pe tơk, bơơi kabhuh ađek kung m'bhiiq ađó ađek bâân bhrê, m'peq leq nguôi. Hayơq nek, kala bhươn nho móón: ‘Aku ng'kơi têêng ađôk? Aku e kayua akóón padruuih nh'nhơr ưng aku tơk. Nh'jau, piđó e bhi chap ađó.’ Bơơi xók kabhuh choh nho lêi akóón ađek, piđó tapraaq xóng piđó, kơi ađô: ‘Ađô nek manưih đơơp drươp karvaan. Nôôq he phaai leng ađó, đóng drươp karvaan ađô ve chóóm e xar ưng nôôq he.’ Lơq xong xók m'peq ađó ađek gluh leq nguôi bhươn nho, kabhuh ađek leng ađó. Kơi ađek nek, kala bhươn nho e ng'kơi têêng palơq kabhuh ađek? Ađó achêk e tơk leng luch kabhuh choh nho ađô lơq pajaau bhươn nho leq manưih đu lââng.” Xók xâng kơi ađek, piđó móón: “Nhan đóng chiên ađek óóq chóóm vaaih.” Bơơi xók lêi piđó, Ađó móón: “Kơi ađek, paraaq ơi xaraq ađô hau kơi kiêng móón: ‘Dhơl đu manưih têêng đong m'peq lơơi, chênh ađó vil xar dhơl n'tól đong’?
Ngaai đu n'tôq dhiq dhơl achêk e bâân lêêk chak. Dyơq la ngaai đu dhơl chêk n'tôq pâng, nek ađó e galiq lêêk glêi manưih ađek.”
Lơq hayơq, nôôq takóh pachóóm gani palơq nôôq takóh kala kadhâng bhanuôih tabâân kơi têêng paglêh palơq Ađó dhalam chênh jơ ađek, hơq piđó kakhin manưih dhanuôr, taai piđó n'nal kơi Ađó truuih babi achêk chaleq leq piđó. Xók chamet lêi Ađó pagiit, piđó kayua nôôq manưih choop lêi tư têêng pathê nek bhơt liêm, đóng piđó ve chóóm tabâân kaleh Ađó dhiq bóóp praaq, hayơq pajaau đââng Ađó leq kabhuh kadhâng koq lơq kabhuh kadhâng dhanuôr ưng kuôn kadhâng xưưq. Nôôq kabhuh ađek tamóh Ađó kơi ađô: “Thêi ơơi, nôôq yi n'nal ađek nek thêi praaq lơq pachóóm kơi đu dhalam tapat, yươq bhi kakhin ngaai, hơq thêi pachóóm kalơng ưng Yaang Pleng kalóóng paraaq dhalam. Pagoop jêên leq Sê-sa nek rau phaai têêng palơq nôôq he môôiq kah?” Bơơi ơi n'nal rau lóóm chachââr ưng piđó, Ađó móón palơq piđó: “Đóng aku lêi mưi đơ-ni-ê. Ađó ve a-ô lơq achak ưng ngaai?” Piđó ââi: “Ưng Xê-xa.” Hayơq nek Ađó móón palơq piđó: “Kơi ađek nek, phaai pachô lóóiq leq Sê-sa rau dhơơm ưng Xê-xa, lơq leq Yaang Pleng rau dhơơm ưng Yaang Pleng.” Piđó kah chóóm kaleh bóóp praaq achêk toom mat manưih dhanuôr, lơq taai hêq xâng toom paraaq ââi bóóp ưng Ađó, piđó maar parngau.
Tatun ađek, xók m'bưưiq manưih mađó kabhuh Sa-đu-sê vôôiq pađan, ađek nek nôôq manưih móón kơi kah ve rau mamông lóóiq, piđó tamóh Ađó kơi ađô: “Thêi ơơi, Môôi-se ve xaraq đóng nôôq he, la anó ưng mak ngaai nhan kađiêl, hơq xók chêt, ađó achêk kah ơi ve akóón, nek manưih adhi ưng ađó achêk phaai pei kađiêl kamaai ađô lơq ve chóóm đóng tavaaih akóón patet dhong nooi đóng anó ađêi. Hayơq, đong achêk ve tapól adhi anó padruuih, lơq xong xók pei kađiêl, anó padruuih ơi chêt kah ve akóón; lơq manưih đu bơơr, hayơq manưih đu pe pei a-ai; bơơi bhiêk kơi ađek hơq tapól nak maar kah ve akóón, lơq chêt. Xariêq ađek, manưih pađiil kung chêt. Hayơq nek, kalóóng tangêi mamông lóóiq, pađiil achêk e nek kađiêl ưng ngaai kalóóng sôôq piđó? Taai luch tapól adhi anó maar ơi pei pađiil têêng kađiêl.” Chuôq Jê-su praaq palơq piđó: “Akóón anaaq đơơi ađôk nek pei kađiêl, pei kayiik. Dyơq nôôq ngaai bâân đóók nek ađaang đơơp parmông taluôn lơq parmông lóóiq tââq akan chêt nek kah pei kađiêl kung kah pei kayiik. Taai piđó kung yươq chóóm chêt dyơq, taai piđó e kơi dhơn pleng; lơq piđó nek nôôq akóón ưng Yaang Pleng, xók nek akóón anaaq ưng đu mamông lóóiq. Dyơq leq tarnêêng manưih chêt mamông lóóiq nek dhalam kơi Môôi-se ơi đóng lêi dhiq tââm axông, xók ađó đóók Chuôq nek Yaang Pleng ưng Ap-ra-haam, Yaang Pleng ưng I-saak, lơq Yaang Pleng ưng Ja-kôôp. Ađó eh rau nek Yaang Pleng ưng manưih đu chêt, hơq nek ưng manưih mamông, ơi tabhơt maar mamông palơq Ađó.” Hayơq xók nôôq takóh pachóóm gani ââi lóóiq, piđó móón: “Thêi ơơi, thêi móón pâng bhlơng.” Piđó kah khin tamóh Ađó paleh palâ dyơq.
Tatun ađek, Ađó móón palơq piđó: “Hau kơi palââng móón Chuôq Paq Manưih nek akóón Đa-viit? Ơi kalóóng bha-aar Haanh Pleng, chênh Đa-viit ve móón:
‘Chuôq praaq palơq Chuôq aku kơi ađô:
“Nek tơơt hót atươm Aku,
đóng tơk bhêêl Aku têêng nôôq brau ưng Akóón xar parđâq đóng dyung Akóón.”’
Kơi ađek, Đa-viit đóók Ađó nek ‘Chuôq’, hayơq hau Ađó nek akóón ưng bhua achêk kơq?”
Xók bhêêl tabhơt manưih dhanuôr dyơq tameng xâng, Ađó praaq palơq nôôq môôn-đô ađêi: “Phaai hêch lêi palơq nôôq takóh pachóóm gani, nek nôôq manưih kiêng xơp aau yaal chik lalêi, kiêng nôôq paraaq chap yayar dhiq kalơng chơơq, lơq nôôq dhiq tanơơt đu kre liêm kalóóng đong gươl palơq dhiq đu yaal tââm kalóóng đaam bhiêk, hơq piđó lâân đong ưng nôôq pađiil kamaai, hayơq vil gavơh nhan payaal pađươnh đóng pakah palââng xâng. Nôôq manưih achêk e bâân taxêi matu lơt haleng lơh.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.