Lu-ka 19

1Xók ơi mót leq kalóóng, Ađó vôôiq lalơh kanóón Jê-ri-kô. 2Lơq nek lêi mưi nak, bâân đóók achak nek Xa-chê, ađó nek takóh kala kabhuh pagoop jêên, lơq ađó ađek kavaan kabhôôq. 3Ađó tabâân chalaang lêi Chuôq Jê-su nek ngaai, hơq ađó kah chóóm bâân lêi tââq kalóóng ganơr manưih bơk, taai ađó ve dyaang chak êêp katưưiq. 4Hayơq xók ơi mut tơk hót laloom, ađó dyók leq mưi tââm tarung đóng ađó ve chóóm bâân lêi Chuôq taai Chuôq kiêng đan vôôiq lalơh hót kalơng ađek. 5Xók Chuôq vôôiq tơk dham achêk, chaling lêi, Chuôq Jê-su móón palơq ađó: “Xa-chê, nek dhaluônh pađâh, ơi mađôk aku phaai tơơt lóóiq dhiq đong ưng amei.” 6Kơi ađek nek ađó tarhươk tarhââm dhaluônh lơq bhuui marhaal pơh yaauq Chuôq. 7Xók lêi kơi ađek, dhanuôr maar m'bhoonh, móón kơi ađô: “Ađó ađek mót tơơt madhiq palơq mưi manưih ve matu.” 8Bơơi xók Xa-chê yuur dyương, ađó móón palơq Chuôq: “Kakoh Chuôq, nhan lêi ađô, aku blah m'pơng drươp karvaan ưng aku leq manưih ngeeo, lơq la aku ơi galơơk chachââr ngaai ve rau, aku chróót lóóiq lơh tapuôn chu.” 9Xók achêk, Chuôq Jê-su praaq palơq ađó kơi ađô: “Mađôk rau paq jóói ơi tơk leq đong ađô, taai ađó ađô kung nek akóón chachau Ap-ra-haam. 10Taai Akóón Manưih ơi bhral đóng chik chêk lơq paq manưih đu chêt bil.”

11Dyơq xók piđó đương tameng xâng nôôq paraaq achêk, Ađó yuur truuih mưi babi, taai Ađó xók đan tơk kanóón Jê-ru-sa-leem, hơq piđó ngóq nek katiêk ưng Yaang Pleng ravang bhral tơk aq. 12Ơi kơi ađek, Ađó truuih: “Mưi đong karvaan achêk vôôiq leq xưưq changaai đóng chênh ađêi pei đơơp mataai karơ hayơq val chô. 13Xong xók dhaloong majêt dhơn ratơơq ưng ađêi tơk, ađó pajaau leq piđó majêt mi-na lơq móón palơq piđó: ‘Nek buôn baan xók bhêêl aku vôôiq changaai.’ 14Bơơi dhanuôr ưng ađó geet ađó lơq kayua mưi kabhuh manưih xal mat ting tapun ađó móón kơi ađô: ‘Nôôq yi kah kiêng manưih ađô têêng kala dhiq nôôq yi.’ 15Tarnêêng vaaih xók ađó val chô xong xók bâân đơơp mataai karơ, ađó kayua dhaloong tơk lum ađêi nôôq manưih dhơn ratơơq đu ađó ơi pajaau baak, đóng ađó ve chóóm n'nal piđó ơi têêng malơơi haurau tââq tarnêêng buôn baan. 16Hayơq kơi ađek, manưih đu laloom tơk, móón: ‘Abhươp ơơi, mi-na ưng amei ơi bâân têêng malơơi majêt mi-na.’ 17Kala móón palơq ađó ađek: ‘Dhơn ratơơq dhalam tapat, chóóm bhlơng. Taai amei ơi mưi lóóm kalóóng tarnêêng katưưiq bhlơng, hayơq amei nek kadhâng kataai dhiq majêt kanóón.’ 18Hayơq manưih đu bơơr vôôiq, móón: ‘Abhươp ơơi, mi-na ưng amei ơi têêng malơơi bâân xââng mi-na.’ 19Hayơq kala kung móón palơq ađó ađô: ‘Amei nek kadhâng koq xââng kanóón.’ 20Mưi nak lââng tơk, móón: ‘Abhươp ơơi, nhan nek lêi mi-na ưng amei đu aku biêh jư, bâân ha-ơu kalóóng bhaai, 21ơi aku kakhin abhươp, taai abhươp nek manưih kơi praaq kơi têêng. Abhươp pei tââq dham ađêi kah lơơi, lơq xóót tââq dham ađêi kah chóói.’ 22Kala móón ađó ađek: ‘Ting kơi bóóp praaq amei, aku e praaq xêi amei, dhơn ratơơq đu aak. Amei n'nal kơi aku nek manưih kơi praaq kơi têêng, pei kalóóng dham aku kah lơơi, lơq xóót kalóóng dham aku kah chóói. 23Hayơq nek ơi hau amei kah pagơơi baak ưng aku leq đong ha-ơu baak, đóng la xók val chô, aku kung pei lóóiq baak achêk palơq jêên malơơi?’ 24Hayơq ađó móón palơq nôôq manưih xók dyương dhiq ađek: ‘Nek pei mi-na tââq ađó ađô hơq đóng leq manưih đu ve majêt mi-na.’ 25Piđó móón palơq ađó: ‘Abhươp ơơi, ađó ađek nek ve majêt mi-na ơi.’ 26‘Aku praaq đóng nôôq pe n'nal, ngaai đu ve nek bâân đóng kơơq, bơơi tââq ngaai đu kah ve, e nek tapei luôn luch rau đu ađó ve. 27Dyơq nôôq brau ưng aku tôôh, nek nôôq manưih kah kiêng aku kađââng koq dhiq piđó, nek đââng piđó vôôiq leq ađô lơq leng chêt piđó dhiq toom mat aku.’”

28Xong xók móón nôôq paraaq achêk, Ađó bhiêk vôôiq leq hót lóóm, đơk leq Jê-ru-sa-leem.

29Tarnêêng vaaih xók Ađó vôôiq đan tơk Bêêt-pha-jê lơq Bê-tha-ni, dhiq m'bhââng bôôl nek bâân đóók Ô-liiu, Ađó kayua bơơr môôn-đô, 30móón kơi ađô: “Phaai vôôiq mót leq kanóón toom mat, xók mót leq kalóóng ađek, adhi anó e lêi mưi panong axeh akóón bâân tachoq, hơq dhiq axeh ađek kah ơi ngaai glêh dhââng. Xong xók lêh tarlêi choq ađó, nek đââng chô leq ađô. 31La ve ngaai tamóh adhi anó: ‘Ơi hau anhưa lêh tarlêi choq ađó?’ nek adhi anó e móón kơi ađô: ‘Chuôq ve kơng đươi ađó.’” 32Hayơq nek, xók bơơr nak ơi bâân kayua yuur vôôiq, nhiđó lêi rau tarnêêng ting kơi Ađó ơi móón palơq nhiđó. 33Xók nhiđó lêh tarlêi choq axeh akóón, nôôq kala axeh móón palơq nhiđó: “Hau anhưa lêh tarlêi choq axeh akóón?” 34Nhiđó ââi kơi ađô: “Chuôq ve kơng đươi ađó.” 35Hayơq nhiđó keh ađó đââng chô leq Chuôq Jê-su lơq xong xók bhalêêp aau chaguôk ađêi dhiq axeh akóón, piđó tơq Chuôq Jê-su dyók dhââng dhiq axeh. 36Xók Ađó vôôiq lalơh, palââng bhalêêp aau chaguôk ưng piđó dhiq kalơng. 37Xók Ađó ơi tơk đan leq bharđơk bôôl ô-liiu vaq, luch tanóói môôn-đô bơk bhlơng tââp driêu bhuui, makơi mandrươh dhariêng bhi haanh Yaang Pleng leq dyóp rau nôôq tarnêêng mataai raman đu piđó ơi lêi, 38kơi ađô: “Phươk đóng nek bhua bhral kalóóng achak ưng Chuôq! Yươq rauha dhiq pleng, lơq cha-iil tabah dhiq yaal bhơt yaal!” 39Maphơn manưih Pha-ri-si tââq kalóóng tanóói dhanuôr bơk móón palơq Ađó: “Thêi ơơi, nhan trêh móón nôôq môôn-đô ưng amei.” 40Ââi lóóiq piđó, Ađó móón: “Aku praaq leq nôôq pe, kơi la piđó parngau nek nôôq kaliêng dhơl ađô e yuur driêu karơ.”

41Xók Ađó ơi tơk đan, xók chalaang lêi kanóón, Ađó nhiim leq kanóón, 42praaq kơi ađô: “La kơq amei ơi bâân n'nal kalóóng tangêi ađôk, lalua chênh amei phaai n'nal, rau dhơơm đââng tơk yươq rauha! Dhơ kơi ađek, piđó nôk xók ơi bâân palââp tââq mat amei. 43Ơi e ve tangêi vaaih tơk leq amei, nôôq brau ưng amei e bhơq garóóng xirvir amei, piđó e xavaang amei, lơq ruul đenh amei tââq dyóp hót. 44Piđó e đenh bhlêh amei palơq akóón anaaq amei dhiq m'pơng amei. Hayơq piđó e kah châng mưi kaliêng dhơl đu dyơq tagơơn dhiq mưi kaliêng dhơl lââng dhiq dham amei, ơi taai amei ơi kah n'nal bhêêl amei bâân mót tham.”

45Hayơq xók mót leq đong bhanuôih, Ađó tââp đuôi luch nôôq manưih buôn baan dhiq ađek, 46móón palơq piđó: “Ve paraaq xaraq: ‘Đong Aku nek đong nhan gavơh,’ bơơi nôôq pe ơi têêng ađó xar ‘bóng gơơp ưng kabhuh tatông papei.’”

47Dyóp tangêi Ađó bhiêk truuih pachóóm kalóóng đong bhanuôih. Dyơq nôôq takóh kala kadhâng bhanuôih, nôôq takóh pachóóm gani lơq nôôq takóh kadhâng koq manưih dhanuôr biêh xók tabâân kơi leng Ađó, 48lơq piđó dyơq kah ơi bâân tarting kơi hơq piđó ve chóóm têêng, ơi tabhơt manưih dhanuôr maar tameng xâng Ađó.