Katu Bible Literal Text
Lu-ka 18
Hayơq Ađó truuih đóng piđó mưi babi đóng lêi rau đu chóóm đươi palơq piđó nek phaai taluôn luôn nhan gavơh, lơq óóq bhayuih lóóm, kơi ađô: “Dhiq kanóón tôôh ve mưi takóh kadhâng xanêi achêk kah kakhin Yaang Pleng, kung kah bhi chap palââng. Dhiq kanóón achêk ve mưi amooq kamaai, lơq amooq bhiêk tơk leq ađó ađek, móón: ‘Nhan xêi bhơt liêm đóng aku toom manưih brau aku.’ Xók mưi ganah ađó ađek kah ve liêm lóóm, bơơi tatun ađek, ađó ađek tư móón palơq ađêi: ‘Dhơ aku kah bhi kakhin Yaang Pleng môôiq bhi chap ve ngaai, bơơi taai amooq kamaai ađô bhiêk têêng panhok leq aku, nek aku e xêi bhơt liêm leq amooq achêk, đóng amooq achêk yươq têêng panhok aku xók bhiêk val vôôiq patơk bhêêl xong tarnêêng ađô.’” Hayơq Chuôq praaq: “Phaai xâng paraaq takóh xêi xanêi kah liêm ađek praaq. Kơi ađek nek, ve kơq Yaang Pleng kah têêng bhơt liêm đóng nôôq manưih bâân chââih ưng Ađó, nek nôôq manưih tangêi hayum nhan gavơh Ađó, hơq Ađó pajih pangaang palơq piđó? Thêi praaq palơq adhi anó kơi Ađó e têêng bhơt liêm leq piđó kơi pađâh. Dhơ kơi ađek, xók Akóón Manưih bhral, Ađó lalua e bâân lêi lóóm huuiq dhiq katiêk kah?”
Hayơq Ađó kung truuih babi ađô đóng leq maphơn manưih, nek nôôq manưih tư huuiq leq ađêi kala kơi ađêi nek bhơt liêm lơq kađiq manưih đu lââng: “Bơơr nak đơk tơk leq đong bhanuôih nhan gavơh — mưi nak nek manưih Pha-ri-si, lơq manưih tôôh nek manưih pagoop jêên. Manưih Pha-ri-si dyương gavơh nhan nôôq paraaq ađô leq ađêi kala: ‘Kakoh Yaang Pleng, akóón ma-ơơn Amei taai akóón eh rau thê kơi nôôq manưih dyơq lóóiq — manưih tatông papei, manưih kah liêm, manưih têêng tapiing — môôiq patơk mơ kơi manưih pagoop jêên ađô. Akóón drơng cha dyóp tun bơơr chu. Akóón tapôông phơn majêt dyóp rau akóón bâân.’ Bơơi manưih pagoop jêên, xók dyương tââq changaai, patơk mơ kah khin chaling mat leq pleng, palâh lóóiq ađó tơm tadhưa ađêi, móón: ‘Kakoh Yaang Pleng, nhan kayô ka-er akóón, mưi manưih ve matu.’ Thêi praaq palơq adhi anó, manưih ađô chô leq đong ađêi bâân đóók bhơt liêm eh rau manưih tôôh, ơi ngaai đu tư padyók ađêi kala e bâân tabhlêh pa-êêp, bơơi ngaai tư pa-êêp ađêi kala e bâân hayuur padyók.”
Bhêêl achêk, palââng đââng tơk mơ nôôq akóón paniên katưưiq tơk leq Ađó đóng Ađó lơơi têi dhiq piđó, bơơi xók lêi kơi ađek, nôôq môôn-đô trêh nôôq manưih ađek. Bơơi Chuôq Jê-su dhaloong piđó lóóiq, praaq: “Phaai đóng akóón paniên vôôiq palơq aku, lơq óóq kajơq piđó. Ơi katiêk ưng Yaang Pleng chô leq nôôq manưih kơi ađek. Alua, Aku móón palơq adhi anó, la ngaai kah pei đơơp katiêk ưng Yaang Pleng kơi mưi akóón paniên, nek manưih achêk lalua e kah bâân mót leq kalóóng ađek.”
Mưi manưih kuôn achêk tamóh Ađó, kơi ađô: “Nhan tamóh thêi bhơt liêm, aku e bâân đơơp parmông taluôn luôn xók têêng haurau?” Bơơi Chuôq Jê-su móón palơq manưih achêk: “Hau amei đóók Aku nek manưih bhơt liêm? Kah ngaai ve manưih bhơt liêm, chapiên mơ Yaang Pleng giêl. Amei ơi n'nal nôôq gani pachóóm — óóq têêng tapiing, óóq leng manưih, óóq tatông papei, óóq praaq galơơk chachââr, phaai bhi chap amêêq ama ađêi.” Bơơi ađó ââi: “Aku ơi jư têêng dyóp luch nôôq gani pachóóm achêk tââq xók dyơq paniên ưng aku.” Dhơ kơi ađek, xók xâng kơi ađek, Chuôq Jê-su praaq palơq ađó achêk: “Dyơq ve mưi rau dyơq thiêuq dhiq amei. Nek baan luch nôôq rau amei ve lơq đóng nh'xóóng leq manưih ngeeo, nek amei e ve drươp karvaan dhiq pleng — lơq nek tơk nô leq, vôôiq ting aku.” Bơơi xók xââng nôôq paraaq ađek, ađó ađek val xar ranguôq bhlơng, taai ađó kavaan bhlơng. Hayơq xong xók lêi ađó, Chuôq Jê-su móón: “Nôôq manưih ve bơk drươp karvaan mót leq kalóóng katiêk ưng Yaang Pleng lalua kadhaap n'nal mơ! Ơi lalua nek dhê lơh đóng adhah kamel mót leq bóng jarum, marchơng palơq mưi manưih kavaan mót leq kalóóng katiêk ưng Yaang Pleng.” Kơi ađek nek, nôôq manưih xâng kơi ađek, tamóh: “Kơi achêk ngaai ve chóóm bâân paq?” Ađó ââi: “Nôôq tarnêêng kah chóóm têêng palơq akóón manưih nek ve chóóm têêng palơq Yaang Pleng.” Hayơq Phi-e-rơ móón: “Thêi lêi, nôôq yi ơi lơơi dyóp rau hơq ting amei.” Kơi ađek, Ađó móón palơq piđó: “Alua, aku móón palơq adhi anó kơi kah manak manâ ve ngaai đu ơi lơơi đong, kađiêl, adhi anó, akonh akan, môôiq akóón anaaq, ơi taai katiêk ưng Yaang Pleng vil nek manưih kah ve bâân đơơp bơk lơh kalóóng đơơi ađô, lơq kalóóng đơơi ravang tơk, nek parmông taluôn luôn.”
Tatun ađek, xók ơi đââng panlei majêt bơơr sưưq-đô gluh, Ađó móón palơq piđó: “Ni, nôôq he xók vôôiq đơk leq kanóón Jê-ru-sa-leem lơq dyóp rau ơi xaraq leq Akóón Manưih taai nôôq manưih đââng taruuih e bâân paxong. Ơi Ađó e bâân tapajaau leq têi nôôq dhanuôr katiêk lââng, bâân ajóóch, bâân têêng tamôôp, lơq bâân kathui kachoh. Xong xók m'bhiiq Ađó, piđó e leng Ađó vaq, lơq tơk tangêi đu pe Ađó e mamông lóóiq.” Nôôq môôn-đô kah n'nal rarau nôôq paraaq ađô, lơq paraaq ađek biêh bâân palââp tââq piđó, hayơq piđó kah n'nal rau nôôq paraaq ơi bâân móón.
Tarnêêng vaaih xók Ađó vôôiq đan tơk kanóón Jê-ri-kô, mưi nak kabaang achêk xók tơơt nhanhan dhiq tóór kalơng. Xók xâng dhariêng ganơr manưih bơk vôôiq lalơh, ađó tamóh xâng harau chiên đu vaaih. Piđó đóng ađó n'nal kơi ađô: “Jê-su manưih Na-xa-reet ravang vôôiq hót ađôk.” Lơq hayơq ađó lalơu karơ, kơi ađô: “Jê-su ơơi, akóón bhua Đa-viit, nhan kayô ka-er aku.” Nôôq manưih vôôiq laloom teng ađó, đóng ađó phaai parngau. Bơơi ađó bhiêk dhaloong karơ lơh dyơq: “Ơơi, Akóón bhua Đa-viit, nhan kayô ka-er aku.” Bhêêl achêk, xók ơi dyương lóóiq, Chuôq Jê-su kayua đââng ađó tơk leq Chuôq. Hayơq xong xók ađó tơk pađan, Chuôq tamóh ađó: “Amei kiêng Aku têêng haurau leq amei?” Kơi ađek nek ađó ââi: “Kakoh Chuôq, ađek nek đóng aku chóóm bâân lêi.” Chuôq Jê-su praaq palơq ađó: “Phaai chóóm lêi val lóóiq! Lóóm huuiq ưng amei ơi payươh đóng amei.” N'drươh ađek, ađó chóóm lêi lóóiq lơq ađó vôôiq ting Chuôq, tapôông đóng cha-iil tampah leq Yaang Pleng. Xók lêi kơi ađek, dyóp ngaai maar tapôông paraaq bhi haanh Yaang Pleng.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.