Ê-phê-sô 2

1Leq phơn adhi anó, nek manưih chêt kalóóng nôôq têêng lơt lơq matu lơt ađêi, 2nek kalóóng nôôq rau đu xók n'loom, adhi anó ơi cha tơơt ting paloong hóói ưng manưih hóng katiêk ađôk, ting manưih têêng koq palơq têêng kala dhiq bharyô, nek abhô abhưi xók ađôk dyơq têêng kalóóng nôôq akóón anaaq kah huuiq bhi. 3Hơq n'loom ahei, tơơt m'pơng piđó, tabhơt nôôq he kung ơi mamông kalóóng nôôq lóóm malóóch kiêng ưng manưih ti ađêi, têêng nôôq malóóch kiêng ưng manưih ti lơq lóóm karnóq. Ting lóóm karnóq kaxu, nôôq he biêh nek akóón anaaq ưng rau jarnah xarngaat kung kơi dyóp manưih lââng. 4Bơơi Yaang Pleng, nek Yaang kavaan lóóm ayô ka-er, taai lóóm nh'nhơr gamak garóóq ưng Ađó hơq Ađó ơi nh'nhơr nôôq he. 5Hơq xók nôôq he nek nôôq manưih chêt kalóóng nôôq têêng lơt ađêi, nek Ađó ơi payuur nôôq he ting mamông kalóóng Chuôq Paq Manưih, ađek nek ve ơơn phươk liêm hơq adhi anó ơi bâân paq jóói. 6Ađó payuur nôôq he ting mamông lóóiq, lơq partơơt tơơt madhiq palơq Ađó tơơt nôôq tanơơt dhiq pleng kalóóng Jê-su Chuôq paq manưih, 7đóng kalóóng nôôq klaang manưih ravang tơk, Ađó ve chóóm pakah rau karvaan kabhôôq kah bil ưng ơơn phươk liêm Ađó tââq rau moor dha-iiq palơq nôôq he kalóóng Jê-su Chuôq Paq Manưih. 8Taai tââq ơơn phươk liêm, adhi anó bâân paq ve lóóm huuiq, rau ađô kah vaaih chat tââq adhi anó, hơq nek kliim kaliim ưng Yaang Pleng, 9eh rau gluh tââq nôôq tarnêêng têêng, đóng kah mưi ngaai ve chóóm laach pajơơr. 10Taai nôôq he nek paraaq tarnêêng ưng Ađó, bâân tavaaih payuur kalóóng Jê-su Chuôq Paq Manưih đóng nôôq tarnêêng liêm đu Yaang Pleng ơi ravang laloom đóng nôôq he ve chóóm mamông kalóóng nôôq tarnêêng achêk.

11Taai kơi ađek, phaai hei kơi n'loom ahei, adhi anó nek dhanuôr katiêk lââng kalóóng manưih ti, dhanuôr bâân tađóók nek “kah ơi đơơp iêt ng'kar” tââq dhanuôr bâân đóók nek “ơi bâân iêt ng'kar” kalóóng manưih ti, mưi charnap taai têi akóón manưih têêng. 12Taai xók ađek, adhi anó biêh bâân tablah n'tua palơq Chuôq Paq Manưih, xók bâân lơơi hót nguôi dhanuôr manưih I-sơ-ra-êên, lơq biêh nek tamóói chrih palơq nôôq raket bóóp ưng paraaq hươq, hơq kah ve lóóm rââm, kung kah ve Yaang Pleng dhiq hóng katiêk ađô. 13Bơơi, kalóóng Jê-su Chuôq Paq Manưih, adhi anó, nôôq manưih bhêêl n'loom biêh changaai bhayah, xók ađôk ơi bâân đââng tơk đan ve ahaam ưng Chuôq Paq Manưih. 14Taai chênh Ađó nek rau khe liêm ưng nôôq he. Nek Yaang ơi têêng đóng miq bơơr xar vaaih mưi lơq rơh pahư jađơr ưng rau targeet tarblah, hơq nek rau têêng brau, kalóóng achak araang Ađó, 15Xók ơi m'peq lơơi gani ưng nôôq gani pachóóm kalóóng nôôq dhanang, buôn đóng Ađó ve chóóm têêng miq bơơr val xar mưi manưih tame kalóóng Ađó, tavaaih khe liêm, 16lơq lơơi Ađó ve chóóm paliêm lóóm miq bơơr palơq Yaang Pleng kalóóng mưi achak araang tââq m'baang chatông, lơh xók leng kaxiêt tarlum têêng brau dhiq ađek. 17Bhêêl Ađó ơi bhral, Ađó xêi truuih rau khe liêm đóng adhi anó, nek nôôq manưih tơơt changaai, lơq rau khe liêm đóng nôôq manưih tơơt đan, 18taai ve Ađó, miq bơơr ve chóóm jađaang tơk đan kalóóng mưi Yaang Liêm đóng tơk palơq Ama. 19Kơi achêk hơq, adhi anó kah dyơq nek tamóói chrih dyơq môôiq manưih katiêk lââng. Klóóih dhiq ađek, adhi anó nek manưih matââq xưưq palơq nôôq manưih huuiq liêm lơq nek manưih kalóóng parlóng đong ưng Yaang Pleng. 20Taai ơi bâân têêng kadhơng dhiq bhanơn ưng nôôq sưưq-đô lơq nôôq đââng taruuih, xók chênh Jê-su Chuôq Paq Manưih nek dhơl n'tól đong, 21hơq kalóóng Ađó, bhơt tarnêêng têêng kadhơng, xók bâân pater palơq xóng piđó, nek xar vaaih kơi mưi đong bhanuôih liêm kalóóng Chuôq, 22lơq kung kalóóng Ađó, adhi anó bâân hayuur kadhơng madhiq palơq xóng ađêi xar dhiq jaq ưng Yaang Pleng kalóóng Yaang Liêm.