Ê-phê-sô 1

1Phaau-lô, sưưq-đô ưng Jê-su Chuôq Paq Manưih tââq karnóq kiêng ưng Yaang Pleng, pagơơi đóng nôôq manưih đu huuiq, nek nôôq manưih đu huuiq tơơt dhiq Ê-phê-sô lơq nek nôôq manưih bhơt lóóm kalóóng Jê-su Chuôq Paq Manưih. 2Rââm ơơn phươk liêm lơq yươq rauha tââq Yaang Pleng, Ama nôôq he, lơq Chuôq, nek Jê-su Chuôq Paq Manưih, tơk dhiq adhi anó.

3Đaang bhi haanh Yaang Pleng, Ama ưng Jê-su Chuôq Paq Manưih, Chuôq nôôq he, nek Yaang ơi dhaluônh phươk đóng nôôq he palơq dyóp rau phươk liêm lóóm huuiq tââq nôôq dhiq piing Pleng kalóóng Chuôq Paq Manưih, 4kung kơi Ađó ơi chââih nôôq he kalóóng Chuôq Paq Manưih tââq kah ơi tavaaih hóng katiêk, đóng nôôq he bâân sek tabah lơq kah dhiq chóóm jươm trêh toom mat Ađó.

Tââq luônh lóóm tanhơr, 5Ađó ơi kanóq laloom nôôq he đóng têêng akóón partơơt ưng Ađó tââq Jê-su Chuôq Paq Manưih, ting rau bhuui khe ưng kanóq kiêng Ađó, 6đóng ve machak maraang palơq rau bhi haanh cha-iil tabah ưng ơơn phươk liêm Ađó đu Ađó ơi bhươh rông kliim đóng leq nôôq he kalóóng Akóón Bơk Nh'nhơr ưng Ađó; 7hơq kalóóng Akóón achêk, nôôq he ve rau trôông paq ganơơm ahaam Ađó, rau pei lơơi matu lơt ting rau karvaan kabhôôq ưng ơơn phươk liêm Ađó, 8nek ơơn phươk liêm đu Ađó ơi đóng leq nôôq he kơi xưa raai kalóóng dyóp rau tarbech galang lơq tarlương tabech, 9Têêng đóng nôôq he đơơp n'nal rau đu lalââp ưng karnóq kiêng Ađó ting rau iêm lóóm Ađó, nek rau đu Ađó ơi kanóq têêng tââq laloom kalóóng Chuôq Paq Manưih, 10đóng xók tơk ganah xong bhơt tarnêêng ơi loom praaq, hơq gaboq karong dyóp rau lóóiq kalóóng Chuôq Paq Manưih, dyóp rau dhiq pleng palơq dyóp rau dhiq katiêk, kalóóng Ađó, 11nek kalóóng Yaang đu nôôq he kung bâân blah phơn drươp karvaan, taai ơi bâân praaq laloom ting karnóq kiêng ưng Yaang têêng tavaaih dyóp tarnêêng dhalam kơi tarnêêng ưng karnóq kiêng Ađó, 12buôn đóng nôôq he, nôôq manưih laloom bhơt tabóq lóóm rââm dhiq Chuôq Paq Manưih, bâân machak maraang palơq rau bhi haanh leq cha-iil tabah ưng Ađó. 13Lơq kung kalóóng Ađó, xong xók xâng taruuih ưng paraaq dhalam, nek Taruuih Liêm leq rau trôông paq adhi anó, lơq xók ơi huuiq dhiq Ađó, hơq adhi anó ơi bâân pakanal palơq Chuôq Yaang Liêm ting paraaq hươq; 14hơq Yaang achêk nek rau jư karnal leq drươp kavaan ưng nôôq he đóng patơk xók pók kơl tabhơt drươp karvaan, đóng machak maraang palơq rau bhi haanh leq cha-iil tabah ưng Ađó.

15Taai kơi achêk, patư tââq xók aku xâng leq lóóm huuiq ưng adhi anó kalóóng Chuôq, nek Chuôq Jê-su, lơq lóóm tanhơr pakoom đóng tabhơt nôôq manưih đu huuiq, 16hơq aku kah ha-ơt tapôông paraaq ma-ơơn taai adhi anó, n'tóól tơk adhi anó kalóóng paraaq gavơh nhan ưng ađêi, 17buôn đóng Yaang Pleng ưng Jê-su Chuôq Paq Manưih, Chuôq nôôq he, nek Ama cha-iil tabah, e đóng leq adhi anó Yaang Liêm ưng rau tarbech galang lơq rau tapakah kalóóng tarnêêng đơơp n'nal Ađó, 18têêng kaliêng mat ưng lóóm adhi anó bâân dyóól brương, đóng adhi anó n'nal rau parââm leq rau dhaloong kayua ưng Ađó nek hau rau, rau karvaan kabhôôq ưng drươp karvaan cha-iil tabah Ađó kalóóng nôôq manưih đu huuiq xariêq ng'kơi, 19lơq rau gamak liêm kah lơq babi marchơng ưng mataai raman Ađó nek ng'kơi palơq nôôq he, nek nôôq manưih ve lóóm huuiq, ting rau tarnêêng tââq praan karơ mataai raman ưng Ađó, 20hơq Ađó ơi têêng kalóóng Chuôq Paq Manưih xók payuur Chuôq Paq Manưih tââq akan chêt mamông lóóiq lơq patơơt tơơt hót atươm Ađó tơơt nôôq dhiq m'piing pleng, 21jalơh changaai m'piing dyóp kataai, têêng kala, praan karơ, lơq kala kataai, palơq dyóp rau dhanóók bâân n'nal tơk achak, eh mưi kalóóng đơơi ađôk hơq bhơt kalóóng đơơi ravang tơk dyơq. 22Ađó ơi têêng dyóp rau chakoh dhiq dyung Chuôq Paq Manưih lơq patơơt Chuôq Paq Manưih têêng koq tơơt piing dyóp rau palơq Akóón Dhơn Chuôq, 23hơq Akóón Dhơn Chuôq, nek chak araang Ađó, nek rau bing bhlaai ưng Yaang têêng bing bhlaai dyóp rau kalóóng dyóp n'dreh m'ma.