Katu Bible Literal Text
Kô-lô-se 3
Kơi achêk hơq, la adhi anó ơi bâân têêng đóng mamông lóóiq palơq Chuôq Paq Manưih, nek phaai chik-chêk nôôq rau tơơt dhiq pleng, tââq Chuôq Paq Manưih dyơq tơơt hót atươm Yaang Pleng. Phaai malóóm tơk lóóm kanóq nôôq rau tơơt dhiq pleng, eh rau nôôq rau tơơt dhiq katiêk. Taai adhi anó ơi chêt, lơq parmông adhi anó ơi bâân kadrêi palơq Chuôq Paq Manưih kalóóng Yaang Pleng. Xók Chuôq Paq Manưih, nek parmông ưng adhi anó, tabhral, nek adhi anó kung e tabhral palơq Ađó kalóóng cha-iil tabah.
Kơi achêk hơq, phaai têêng chêt nôôq phơn n'raal katiêk, kơi têêng taniêt, rau anhuq, lóóm kiêng, malóóch môôp lơt, lơq n'thaam dhahik, hơq n'thaam dhahik nek bhuôih kabhêi, taai nôôq rau ađô hơq ganơt pagrâ ưng Yaang Pleng dyơq bhral, hơq n'loom ahei, adhi anó kung ơi jađaang vôôiq kalóóng nôôq rau achêk, xók adhi anó dyơq mamông kalóóng piđó. Bơơi xók ađôk adhi anó phaai m'peq lơơi dyóp rau ađô, kơi grâ bha-ươk, jar-ââih, lơt kanóq, praaq tamôôp, palơq praaq tataaiq gluh tââq bóóp ađêi. Óóq praaq chachââr xóng ađêi, taai ơi lôh lơơi akóón manưih ti palơq nôôq atóóch keen ưng ađó, lơq ơi pei xơp akóón manưih tame, hơq nek manưih dyơq bâân têêng tame kalóóng rau tabech n'nal ting a-ô ưng Yaang tavaaih ađó, nek dhiq đu kah ve manưih Hi-laap lơq manưih Jo Thaaiq, manưih iêt ng'kar lơq manưih kah iêt ng'kar, manưih thiêuq tabech, manưih Si-the, manưih têêng xól, manưih têêng kala, bơơi Chuôq Paq Manưih nek dyóp rau, lơq kalóóng dyóp rau.
Kơi achêk hơq, kơi manưih bâân chââih ưng Yaang Pleng, nek manưih liêm lơq bâân nh'nhơr bơk, phaai pei xơp lóóm kayô ka-er, matư ma-iiq, pa-êêp ađêi, moor dha-iiq, đuôh jruôn, đơơp kađung xóng ađêi lơq lơơi lơt xóng ađêi. La kơi ngaai ađek ve rau m'bhoonh palơq palââng, hơq kơi Chuôq ơi lơơi lơt adhi anó ng'kơi, adhi anó kung kiêng phaai kơi achêk. Bơơi m'piing dyóp rau achêk, phaai pei xơp lóóm tanhơr, hơq nek tahaal patet alet ưng rau bhơt liêm. Phaai đóng rau yươq rauha ưng Chuôq Paq Manưih têêng kala kalóóng lóóm adhi anó, hơq adhi anó kung ơi bâân dhaloong tơk yươq rauha ađek kalóóng mưi achak araang lơq phaai pakah lóóm n'nal ơơn. Phaai lơơi đóng Paraaq Chuôq Paq Manưih tơơt kalóóng adhi anó kơi xưa raai, xók pachóóm Palơq tabhơt rau tabech brương, tabhơơl xóng ađêi palơq nôôq haanh pleng, nôôq guôp babóóch chaxuul lơq nôôq guôp bhanóóch babóóch chaxuul, palơq rau n'nal ơơn kalóóng lóóm ađêi koom đóng Yaang Pleng. Dyóp tarnêêng đu adhi anó têêng, dhơ palơq paraaq praaq môôiq palơq têêng vôôiq, phaai têêng tabhơt kalóóng dhanóók Chuôq, nek Chuôq Jê-su, n'nal Patââq Ađó ma-ơơn Yaang Pleng, nek Ama.
Manưih têêng kađiêl phaai xâng bóóp kayiik ađêi, kơi ađek nek rau dhalam liêm kalóóng Chuôq. Manưih têêng kayiik phaai nh'nhơr kađiêl ađêi, lơq óóq grâ jar-ââih palơq kađiêl. Manưih têêng akóón phaai xâng bóóp konh akan ađêi kalóóng dyóp tarnêêng, taai ađô nek rau liêm lóóm Chuôq. Manưih têêng akonh, óóq ơơr garâ akóón anaaq ađêi, đóng piđó yươq bil lóóm. Manưih têêng dhơn ratơơq, phaai huuiq bóóp kala ađêi leq phơn achak kalóóng dyóp tarnêêng, eh rau palơq rau cha met lêi ưng kala kơi nôôq manưih buôn pei lóóm palââng, bơơi palơq lóóm lalua dhalam, bhi kakhin Chuôq. Dhơ adhi anó têêng mak rauriq, phaai têêng patư tââq luônh lóóm pakơi têêng đóng Chuôq hơq eh rau đóng akóón manưih, taai n'nal kakơi ađêi e đơơp phơn chaner leq drươp karvaan ađêi patư tââq Chuôq. Adhi anó dyơq têêng dhơn ratơơq đóng Chuôq, chênh nek Chuôq Paq Manưih. Hơq ngaai manưih têêng rau lơt môôp e đơơp lóóiq rau đu manưih ađek ơi têêng kơi lơt môôp; lơq kah ve rau paq katơq!
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.