Kô-lô-se 4

1Manưih têêng kala phaai đââng tơk đóng nôôq dhơn ratơơq ưng ađêi rau dhalam tapat lơq marđơq. Taai n'nal kakơi ađêi kung ve mưi Kala dhiq pleng.

2Phaai bhơt lóóm kalóóng rau gavơh nhan. Xók meh lóóm kalóóng tarnêêng têêng ađô palơq rau ma-ơơn, 3Kung kơi makơi xóng ađêi gavơh nhan klóóih đóng nôôq yi, buôn đóng Yaang Pleng lóng đóng nôôq yi karđơp palóng ưng tarnêêng truuih taruuih liêm, đóng gluh praaq rau hanua palââp leq Chuôq Paq Manưih. Kung taai hanua palââp ađek hơq aku bâân takađaai. 4Ng'kơi đóng aku ve chóóm truuih pakah hanua palââp achêk kơi drêh dróói, kơi aku phaai papraaq. 5Phaai cha tơơt kalóóng rau tabech galang palơq manưih kah huuiq, xók kapươk tangêi kaxe. 6Bóóp paraaq adhi anó phaai taluôn ve kanóq hóng lóóm; xók kadyeep bhóh mót, đóng n'nal rau achêk kơng bhlơng đóng adhi anó nek ng'kơi đóng tar-ââi palơq ting mưi chanak manưih.

7Dyóp tarnêêng pâng tơk aku, nek mưi chanak adhi anó bơk nh'nhơr, mưi dhơn ratơơq bhơt lóóm, lơq mưi manưih marau tarnêêng kalóóng Chuôq, nek Ti-chi-kơ e pakah đóng adhi anó n'nal, 8ađó achêk nek manưih đu aku yua tơk talum adhi anó ơi taai kơi ađôk, ađek nek đóng adhi anó n'nal kơi tanơơt mamông leq nôôq yi, lơq đóng ađó achêk ve chóóm tabhơơl lóóm adhi anó, 9ting vôôiq nek Ô-nê-siim, manưih adhi anó kah dhơ lóóm lơq bơk nh'nhơr, ađó achêk ve gluh tââq adhi anó, piđó e đóng adhi anó n'nal dyóp tarnêêng dhiq ađô.

10A-ri-taak, parjơơk tơơt đong kanam ưng aku, tamóh tham adhi anó, kung palơq Maak, adhi kabhuh ưng Ba-na-ba (adhi anó ơi bâân đơơp paraaq pató leq ađó achêk la ađó achêk tơk leq adhi anó, nek phaai pơh yaauq ađó achêk), 11kung kơi Jê-su, manưih bâân đóók nek Juk-tu dyơq. Kalóóng nôôq manưih ve gluh tââq nek manưih ơi iêt ng'kar, piđó nek nôôq parjơơk marau tarnêêng mưi giêl palơq aku taai katiêk karuung ưng Yaang Pleng, piđó nek rau tabhơơl đóng aku. 12Ê-phaap-ra tamóh tham adhi anó, ađó achêk gluh tââq adhi anó, nek mưi dhơn ratơơq ưng Jê-su Chuôq Paq Manưih, xók taluôn tarjơl taai adhi anó kalóóng rau gavơh nhan, đóng adhi anó bâân têêng đóng tamưng, gamak karơ, lơq huuiq mưng kalóóng dyóp karnóq kiêng ưng Yaang Pleng. 13Taai aku truuih pan-nal leq ađó achêk, kơi ađó achêk ơi đơơp hadhơơp nhok lóng bơk taai adhi anó, kung kơi taai nôôq manưih huuiq dhiq Laau-đi-xê lơq dhiq Hi-ê-ra-bô-li. 14Lu-ka, manưih payươh ka-ai bơk nh'nhơr, palơq Đê-ma, tamóh tham adhi anó. 15Nhan tamóh tham nôôq adhi anó dhiq Laau-đi-xê, lơq Niim-pha, palơq Akóón Dhơn Chuôq nhoom dhiq đong ưng pađiil achêk. 16Xók tala thơ ađôk ơi bâân đok xong dhiq m'pơng adhi anó, alua dhakơi kơi ađó kung bâân đok dhiq Akóón Dhơn Chuôq Laau-đi-xê, lơq dhakơi adhi anó kung phaai đok thơ tââq Laau-đi-xê dyơq. 17Nhan praaq palơq A-chiip, kơi ađô: “Phaai kanóq chamet leq tarnêêng đu amei ơi đơơp kalóóng Chuôq, đóng amei ve chóóm têêng paxong liêm tarnêêng ađek.”

18Paraaq tamóh tham ađôk taai chênh têi aku, Phaau-lô, Phaai hei tơk nôôq tarlêi kađaai ưng aku. Nhan ơơn phươk liêm tơơt palơq adhi anó.