Kô-lô-se 2

1Taai aku kiêng adhi anó n'nal aku ve ganơt tarjơl gamak ađó mơ đóng adhi anó, lơq đóng nôôq manưih đu huuiq dhiq Laau-đi-xê, kung palơq n'nal mơ manưih dyơq kah glêh lêi mat aku leq dyaang achak, 2đóng lóóm piđó bâân tabhơơl, xók bâân tabóq pajum palơq xóng ađêi kalóóng lóóm tanhơr, lơq malóóm tơk dyóp rau bhơt liêm ưng tarnêêng bâân n'nal bing dyóp dhakơi mưng, kađââng tơk rau đơơp n'nal rau lalââp hanua ưng Yaang Pleng, hơq nek Chuôq Paq Manưih, 3hơq kalóóng Ađó nek rau kaboq lââp tabhơt nôôq jơơng karvaan tabech galang lơq karnóq n'nal. 4Aku praaq rau ađô đóng yươq ngaai ve chóóm galơơk chachââr adhi anó palơq bóóp paraaq iêm baq. 5Taai dhơ alua nek aku kah ve mat palơq adhi anó kalóóng ng'kar m'bech, bơơi aku tơơt palơq adhi anó kalóóng lóóm kanóq, bhuui marhaal lơq bâân lêi charnap matư ma-iiq kalóóng adhi anó kung palơq praan karơ ưng lóóm huuiq ưng adhi anó kalóóng Chuôq Paq Manưih.

6Kơi achêk hơq, dhalam xók adhi anó ơi đơơp huuiq Jê-su Chuôq Paq Manưih têêng Chuôq, nek phaai jađaang vôôiq kalóóng Ađó, 7đơơp chalót riêh lơq bâân hayuur kadhơng kalóóng Ađó, palơq bâân têêng đóng tamưng kalóóng lóóm huuiq dhiêp kơi adhi anó ơi bâân pachóóm, palơq xưa raai kalóóng rau ma-ơơn.

8Phaai chagơn óóq ve ngaai ađek e nek đu kóóp jư adhi anó palơq paraaq parhei lơq bhriêl tabech dharuông dhabóóih, ting taruuih ti ưng akóón manưih, ting nôôq dhale n'tót ưng akóón manưih, hơq kah ting Chuôq Paq Manưih. 9Taai kalóóng Ađó, tabhơt rau bing dyóp ưng lóóm kanóq Yaang Pleng tơơt kalóóng achak araang akóón manưih, 10lơq adhi anó ơi bâân têêng đóng bing dyóp kalóóng Ađó, Yaang nek akoq ưng dyóp praan karơ lơq kala xanêi. 11Hơq kalóóng Yaang achêk, adhi anó kung bâân iêt ng'kar palơq pheep iêt ng'kar kah taai têi akóón manưih têêng, bơơi palơq tarnêêng lôh lơơi lóóm kanóq manưih ti, hơq nek palơq pheep iêt ng'kar ưng Chuôq Kriit, 12taai ơi bâân tơp palơq Ađó kalóóng pheep bap-teem, lơq kalóóng Ađó adhi anó ơi bâân mamông lóóiq ve lóóm huuiq dhiq mataai raman ưng Yaang Pleng, Yaang ơi payuur Ađó mamông lóóiq tââq akan chêt. 13Leq phơn adhi anó, dyơq xók chêt bil kalóóng nôôq tarnêêng lơt lơq kalóóng kơi talum achak araang kah ơi iêt ng'kar ưng ađêi, nek Ađó ơi têêng đóng adhi anó bâân mamông palơq Ađó, taai ơi lơơi dyóp têêng lơt đóng nôôq he, 14ơi katel sek bha-aar xaraq leq tarnêêng lơt jaklâk tarjơl nôôq he, ađek biêh nek rau tarjơl palơq nôôq he, lơq Ađó ơi tabil ađó tââq m'pơng piđó gluh, xók teeng đinh ađó dhiq m'baang chatông, 15pagluh m'peq nôôq praan karơ lơq kala xanêi, Chuôq ơi têêng piđó vaaih pacheh karchang đóng akóón manưih, xók đươk lơh piđó dhiq m'baang chatông.

16Kơi achêk hơq, óóq đóng ngaai praaq xêi adhi anó leq cha đah, lơq leq rau ơm, hamôôiq kalóóng pâng leq ưng tangêi bhiêk, tangêi kaxe blo, môôiq tangêi Sa-baat, 17bơơi piđó chapiên nek m'beq a-ô ưng nôôq rau kanóq tơk, dyơq manưih ti mađó leq Chuôq Paq Manưih. 18Óóq đóng ngaai đu têêng adhi anó bil aq phơn chaner, xók pakah kiêng malóóch têêng pathê moor dha-iiq lơq rau bhuôih kakoh dhơn Pleng, ting kơi nôôq rau manưih ti achak araang ơi lêi, xar vaaih grô próng kơi kah machak tââq kanóq kơi manưih ti ưng ađêi, 19lơq kah bóq mưng palơq akoq, hơq tââq dhiq Ađó, tabhơt achak n'nal tââq nôôq bhakôq patet lơq talêi raraq bâân ban paar lơq ng'krô pajum palơq xóng piđó; achak araang achêk taha gamak palơq praan karơ tahayuur tơk tââq Yaang Pleng.

20La adhi anó ơi chêt palơq Chuôq Paq Manưih, gluh tââq nôôq dharniêng habưưn ưng manưih hóng katiêk, nek taai ng'kơi kalóóng xók dyơq mamông m'pơng hóng katiêk, adhi anó lóóiq huuiq kơi nôôq dhale n'tót ưng ađó: 21“Kah kadhâng, kah tadyep, kah rapơq!” 22hơq nek nôôq dharniêng habưưn đu tabhơt maar kađââng tơk rau pahư bil xók ting tađuui, kơi nôôq kadhâng gani lơq taruuih pachóóm ưng akóón manưih? 23Dhơ dhakơi ađek nek dharau tarnêêng, dhơ chrooq kađôôq đơơp ngóq tabech galang kalóóng bhiêk bhaan tư tavaaih, palơq rau moor dha-iiq lơq jarnah xaryô ưng achak araang, nek kah ve dhơ dharau n'đó kiiq liêm jaklâk lóóiq malóóch kiêng ưng manưih ti.