1 Ti-mô-thê 6

1Dhơ dhangaai dyơq tơơt raal et têêng xól, phaai lêi kala ađêi nek đaang bhơt lóóm bhi chap, buôn dhanóók Yaang Pleng lơq rau pató pachóóm yươq bâân praaq tamôôp. 2Mat lââng, nôôq têêng xól ve nôôq manưih kala nek manưih huuiq Chuôq kah chóóm ơi taai piđó nek adhi anó hơq kah bhi chap, bơơi phaai têêng yaauq kaang lơh dyơq, taai piđó nek manưih huuiq Chuôq lơq manưih bâân nh'nhơr, manưih pâng phơn leq rau têêng yaauq. Akóón phaai pató pachóóm lơq bhơơl chut nôôq rau achêk.

3La ngaai manưih pató pachóóm n'tua lơq kah đơơp đươi nôôq paraaq liêm kre, hơq nek paraaq ưng Chuôq nôôq he, nek Jê-su Chuôq Paq Manưih, nek palơq paraaq parchóóm leq rau bhi huuiq, 4nek manưih ađek nek đu praaq parlaach, kah n'nal rarau, hơq ve malóóch kiêng keen tóóch kalóóng rau tarkaai pađươk lơq pachooi kaleh leq chư paraaq, tââq ađek yuur tavaaih rau chriik lêi, tarvei tarchuh, praaq tamôôp, targeet tarkhinh môôp lơt, 5margit, m'pơng nôôq đu bâân khung nh'xoq kalóóng lóóm karnóq lơq bâân tabhuch bil paraaq dhalam, lêi rau bhi huuiq nek rau tabâân đóng malơơi.

6Bơơi rau bhi huuiq nek palơq rau iêm lóóm nek tââq malơơi gamak. 7Taai nôôq he ơi kah rau đââng leq hóng katiêk, hơq nôôq he kung kah ve chóóm đââng rau ting vôôiq. 8Mat lââng, xók ve chana cha, aau xơp, nek nôôq he e bâân iêm lóóm palơq nôôq rau achêk. 9Dyơq nôôq đu kiêng val xar karvaan kabhôôq nek xruuk leq dharơơl galơơk, lơq mơk biêng, palơq bơk kiêng malóóch ngôôk ngaak, mahaai mahư, hơq nek nôôq rau dyruq paklêch akóón manưih mót leq hư huông lơq chêt bil. 10Taai tââm riêh ưng dyóp rau đu aak nek rau n'thaam jêên, hơq mưi phơn manưih, taai malóóch rahaal ađó, ơi bâân đââng dharơơl gluh tââq lóóm huuiq lơq têêng tarơh tachơơng đóng ađêi palơq bơk ranguôq jarnah.

11Bơơi akóón, manưih ưng Yaang Pleng ơơi, phaai viêr changaai nôôq rau achêk, hơq viêng tapun rau bhơt liêm, huuiq bhi, lóóm huuiq, lóóm tanhơr, lóóm đơơp jruôn, lơq m'pheep dha-iiq. 12Phaai tarjeng tarvei kalóóng galuh pađuôh tarjơl yaal liêm ưng lóóm huuiq, phaai jư tamưng rau parmông nh'chró, nek rau đu akóón ơi bâân dhaloong tơk lơq ơi ng'kóh paraaq đơơp n'tóól liêm kre toom bơk manưih lêi. 13Aku truuih kayua đóng akóón toom mat Yaang Pleng, Yaang têêng đóng dyóp rau bâân mamông, lơq toom mat Jê-su Chuôq Paq Manưih, Yaang gluh pakah paraaq đơơp n'tóól liêm kre dhiq Bôôn-xơ Phi-laat, 14kơi akóón phaai xâng jư paraaq trêh pachóóm ađô kơi óóq anhuq anhaach, yươq dhiq trêh jươm, đóng tơk tangêi bhral ưng Chuôq nôôq he, nek Chuôq Jê-su Paq Manưih, 15nek Yaang đu Yaang Pleng Bhơt Yaal đaang bhi haanh lơq mưi giêl, nek Bhua ưng nôôq bhua lơq Chuôq ưng nôôq chuôq, e gluh pakah leq dhalam tangêi kaxe, 16chapiên mưi Ađó ve yươq chóóm chêt, jaq kalóóng đu brương kah chóóm tơk pađan, nek Yaang kah ngaai ơi glêh lêi, kung kah ngaai ve chóóm bâân lêi, nhan rau bhi chap lơq mataai raman nh'chró chô leq Ađó. A-meen.

17Phaai truuih móón manưih karvaan dhiq đơơi ađôk óóq praaq laach, kung óóq rââm ganơơm dhiq drươp karvaan dhakơi kah mưng, hơq rââm ganơơm dhiq Yaang Pleng, Yaang đóng leq nôôq he dyóp rau kơi bơk ơơl buôn bhuui đơơp, 18lơq truuih yua piđó têêng rau liêm, xưa raai kalóóng tarnêêng liêm, ve lóóm bhươh rông, đương ravang paak blah, 19katiêq lơơi đóng chênh ađêi mưi janơơng liêm kre đóng rau ravang tơk, buôn piđó ve chóóm jư tamưng parmông lalua.

20Ti-mô-thê ơơi, akóón phaai jư lêi rau bâân huuiq pajaau đóng akóón, viêr n'đóch nôôq chiên kah makoq machak dhiq katiêk, lơq nôôq tarkaai tarlak khin móón nek bhriêl tabech, 21hơq mưi phơn manưih taai praaq karơ kơi achêk, ơi vôôiq lơt hót lóóm huuiq.

Nhan ơơn phươk liêm tơơt palơq nôôq adhi anó.