1 Ti-mô-thê 5

1Kah chóóm pagrươq bóóp palơq nôôq padruuih taha tuôi, bơơi phaai bhơơl pahei manưih achêk kơi ama, n'dhóm nek kơi adhi anó, 2nôôq pađiil taha tuôi nek kơi amêêq, nôôq pađiil kamór nek kơi mamóóq adhi, kalóóng rau sek chadhah tabhơt.

3Phaai bhi chap nôôq manưih kamaai, nôôq manưih kamaai lalua. 4Bơơi la ngaai manưih kamaai ve akóón môôiq chachau, nek laloom tââm akóón chachau piđó phaai đuui đóng bhi chap manưih đong ưng chênh ađêi, lơq pakah lóóm đóng chróót leq nôôq manưih đu tavaaih achêk, taai ađô nek rau pâng dhalam toom mat Yaang Pleng. 5Dhơ kơi ađek, manưih kamaai lalua lơq chapiên mưi achak mưi ađêi, nek đương rââm tââq Yaang Pleng, lơq bhiêk markơi kơi kalóóng rau nhan panhel lơq gavơh nhan hayum tangêi. 6Hayơq đu chik chêk rau bhuui kiêng nek ơi chêt, dhơ ve biêh dyơq mamông. 7Kung phaai truuih nôôq paraaq kayua ađô, buôn piđó ve chóóm yươq ve dhiq chóóm trêh. 8Bơơi la ngaai ađek kah nh'xóóng đóng leq kabhuh xóng ađêi, hơq đu griêq tââm nek manưih đong ađêi, nek manưih achêk ơi dyiin lơơi lóóm huuiq lơq nek đu môôp lơh manưih kah huuiq.

9Mưi manưih kamaai kơng phaai bâân xaraq achak nek kah m'bưưiq lơh chapat jêt tuôi, nek kađiêl ưng mưi kayiik, 10bâân haliq lêi dhiq nôôq tarnêêng liêm; ađó ve ban pachóóm akóón anaaq kah, ađó ve pơh yaauq tamóói chrih kah, ađó ve raau dyung nôôq đu huuiq Chuôq kah, ađó ve poor jóói đu bhrê hư kah, ađó ve bhơt lóóm palơq dyóp tarnêêng liêm kah.

11Bơơi phaai m'bhraq lơơi nôôq manưih kamaai dyơq paniên, taai xók marlóóch kiêng tââq lóóm yuur vaaih huông palơq Chuôq Paq Manưih, nek piđó kiêng bâân lóóiq kayiik, 12pei đơơp rau xêi xanêi taai piđó ơi m'peq lơơi raket bóóp tââq tarnââp ưng ađêi. 13Dhơ nek, piđó kung e akeen tóóch têêng dyââng, bhiêk tơơt bóóng tââq đong ađô đong tôôh, hơq kah chapiên tóóch dyââng têêng, bơơi dyơq tóóch praaq bhông haau lơq kiêng kachrua leq tarnêêng ưng palââng, praaq nôôq rau palââng kah chóóm praaq. 14Taai kơi achêk, aku kiêng nôôq manưih kamaai dyơq paniên phaai bâân kayiik, n'niên akóón, gamang lêi đong ađêi, buôn óóq tavaaih bhêêl bâân đóng đu jaklâk jơl ve paraaq xuôq bha. 15Taai mưi phơn manưih ơi tablah xooq vôôiq ting abhưi Sa-taan aq.

16La ngaai pađiil đu huuiq ve manưih kamaai kalóóng đong, nek phaai poor jóói piđó, lơq óóq lơơi Akóón Dhơn Chuôq bâân haleng jong, buôn đóng Akóón Dhơn Chuôq ve chóóm poor jóói nôôq manưih kamaai lalua.

17Nôôq takóh bhươl n'nal kơi kadhâng lêi phaai bâân lêi nek đaang bhi chap bơk lơh, đu tââm nek nôôq manưih đơơp jarnah kalóóng Paraaq Chuôq lơq rau pató pachóóm. 18Taai Bha-aar Paraaq Yaang Pleng pachóóm: “Amei kah chóóm xróp bóóp akóón karók dyơq xók ađó đâq aviq,” lơq “Manưih têêng makông ađaang palơq jêên kông ưng ađêi.” 19Óóq ting xâng paraaq kaauq patu jaklâk lóóiq mưi takóh bhươl, la lơh tââq ganơơm dhiq bhơt m'bưưiq nek bơơr môôiq pe chanak truuih. 20Phaai trêh teng đu têêng lơt toom mat dyóp ngaai buôn nôôq manưih dyơq lóóiq ve chóóm kung n'nal kakhin. 21Aku bhơt lóóm praaq kayua akóón toom mat Yaang Pleng lơq Jê-su Chuôq Paq Manưih, palơq nôôq dhơn Pleng bâân tachââih, kơi akóón phaai jư nôôq paraaq kayua ađô hơq yươq n'dróók palơq kanóq môôp, yươq têêng rau ting lóóm paq katơq.

22Óóq tahươk lơơi têi dhiq dhangaai, kung óóq ting tapâng leq matu lơt ưng palââng. Phaai jư ađêi sek liêm.

23Akóón óóq hơq chapiên ơm đơơk, hơq phaai ơm m'bưưiq buôh ơi taai palung ưng akóón lơq nôôq rau ka-ai buôn lum.

24Matu ưng mưi phơn manưih nek drêh dróói, đââng tơk dhiq xêi xanêi, bơơi kung ve nôôq matu chapiên haleh gluh xók praaq xêi. 25Markơi ađek, kung ve nôôq tarnêêng liêm nek drêh dróói, dyơq nôôq tarnêêng liêm ve chóóm parngau lalââp nek kah chóóm bhiêk bâân kadrêi lââp.