2 Ti-mô-thê 1

1Phaau-lô, sưưq-đô ưng Jê-su Chuôq Paq Manưih tââq karnóq kiêng ưng Yaang Pleng, ting paraaq hươq leq parmông kalóóng Jê-su Chuôq Paq Manưih, 2pagơơi leq Ti-mô-thê, akóón nh'nhơr bơk ưng aku: Rââm akóón bâân ơơn phươk liêm, rau kayô ka-er lơq yươq rauha tââq Yaang Pleng nek Ama lơq Jê-su Chuôq Paq Manưih, Chuôq nôôq he.

3Aku tapôông paraaq ma-ơơn Yaang Pleng, Yaang aku têêng yaauq klóóih patet tââq nôôq klaang akonh abhươp, palơq luônh lóóm chadhah sek, xók hayum tangêi aku kah katơng hei tơk akóón kalóóng nôôq paraaq gavơh nhan ưng ađêi, 4đương rââm lum akóón, hei tơk đơơk mat akóón, buôn aku bâân bing bhlaai lóóm bhuui, 5taai ve rau pató pahei leq lóóm huuiq lalua dhalam kalóóng akóón, nek lóóm huuiq bhêêl tarnââp tơơt kalóóng Lô-iit, amooq nguôi akóón, hayơq Ơ-niit, amêêq akóón, aku huuiq kơi lóóm huuiq achêk kung dyơq tơơt kalóóng akóón.

6Hơq ơi taai kơi ađek, aku pahei akóón phaai padyunh lóóiq ơơn ưng Yaang Pleng nek ơơn tơơt kalóóng akóón tââq rau kadhâng têi ưng aku. 7Taai Yaang Pleng ơi kah đóng leq nôôq he lóóm kanóq ưng rau dyââng katui, hơq nek ưng praan karơ, ưng lóóm tanhơr lơq rau pakala. 8Kơi achêk hơq, akóón óóq kachiit mat leq tarnêêng truuih đuui đóng Chuôq nôôq he, kung óóq kachiit mat leq aku, đu tơơt đong kanam ưng Ađó. Klóóih dhiq ađek, phaai ting đơơp jarnah taai Taruuih Liêm, ve mataai raman ưng Yaang Pleng. 9Yaang ơi paq nôôq he lơq tađaang dhaloong nôôq he palơq rau tađaang dhaloong liêm, eh rau ting tarnêêng têêng ưng nôôq he, bơơi ting kanóq kaniêng n'tua ưng Ađó, lơq ting ơơn phươk liêm, nek rau ơi bâân đóng leq nôôq he kalóóng Jê-su Chuôq Paq Manưih tââq n'loom đươnh điêq kah bil, 10hơq xók ađôk ơi bâân tapakah tââq rau tabhral ưng Chuôq Paq nôôq he, nek Jê-su Chuôq Paq Manưih, xók ơi têêng đóng akan chêt, val xar kah atiêng hơq bat brương parmông palơq rau kah bil dhiq Taruuih Liêm, 11taai Taruuih Liêm ađek hơq aku ơi bâân chaleq yua nek manưih truuih pachóóm, sưưq-đô, lơq manưih pachóóm, 12kung ơi taai ađek hơq aku đơơp xâng hadhơơp nhok palơq nôôq rau ađô. Bơơi aku yươq kachiit mat taai aku n'nal Yaang ađêi huuiq lơq aku kanóq dhakơi kơi ađô Ađó ve mataai jư lêi rau pajaau đóng ưng aku tơk leq tangêi ađek.

13Akóón phaai pei jư par loom leq paraaq pachóóm liêm kre đu akóón ơi xâng tââq aku, palơq lóóm huuiq lơq lóóm tanhơr kalóóng Jê-su Chuôq Paq Manưih. 14Phaai đương jư rau đóng pajaau kre liêm ve Chuôq Yaang Liêm, nek Yaang mamông kalóóng nôôq he.

15Akóón n'nal rau ađô, ađek nek tabhơt nôôq manưih dhiq A-si ơi kah đươi aku, hơq kalóóng ađek ve Phi-geen lơq Heet-mô-geen.

16Nhan Chuôq đóng ơơn kayô ka-er đóng đong Ô-nê-si-phô-rơ, taai ađó biêh taluôn bhơơl pahêêl aku lơq yươq kachiit mat leq taklooiq kađaai ưng aku. 17Palâh lóóiq, xók tơơt dhiq Rô-ma, ađó ơi bhơt lóóm tho tamóh leq aku lơq ơi bâân talum. 18Nhan Chuôq đóng ơơn leq amei buôn bâân talum rau kayô ka-er tư tââq Ađó kalóóng tangêi ađek. Dyơq akóón n'nal drêh ađó achêk ơi têêng yaauq bơk ng'kơi dhiq Ê-phê-sô.