2 Ti-mô-thê 2

1Kơi achêk hơq, akóón aku ơơi, akóón phaai đóng ađêi bâân grâ karơ kalóóng ơơn phươk liêm dhiq Jê-su Chuôq Paq Manưih. 2Nôôq dhơơm akóón ơi xâng tư tââq aku m'pơng bơk manưih truuih, phaai pajaau đóng piđó leq nôôq manưih chóóm huuiq ganơơm hơq piđó kung e ve chóóm đuôh buôn pató pachóóm manưih lââng. 3Phaai kung đơơp jarnah xangaat palơq aku, kơi mưi manưih linh kataai ưng Jê-su Chuôq Paq Manưih. 4Xók têêng manưih linh óóq ngaai đóng ađêi bâân kamak vơng nôôq tarnêêng ưng rau mamông dhanuôr manưih, hơq đóng manưih linh achêk ve chóóm têêng bhuui lóóm manưih ơi chââih dhaloong ađêi. 5Kung kơi achêk, xók ngaai ađek ting tapâng tarjeng kataai, manưih achêk e kah bâân panơơng pô đươk lơh la kah pađuôh tarjeng ting gani. 6Manưih têêng hare jêi tarang phaai bâân đơơp chanoh chabet laloom tââm. 7Phaai kanóq val vôôiq rau aku dyơq praaq, taai Chuôq e đóng leq akóón rau chóóm n'nal kalóóng dyóp tarnêêng.

8Phaai hei tơk Jê-su Chuôq Paq Manưih, ơi bâân payuur mamông lóóiq tââq akan chêt, mađó dhong nooi Đa-viit, ting kơi Taruuih Liêm ưng aku, 9taai Taruuih Liêm ađek, aku đơơp jarnah tơk mơ taklooiq taglóóng kơi mưi manưih matu lơt. Dhơ kơi ađek, paraaq Yaang Pleng nek yươq bâân taklooiq tachoq mơ. 10Taai kơi achêk, aku đơơp jruôn dyóp rau taai nôôq manưih bâân lưa chââih, buôn piđó kung ve chóóm bâân rau paq jóói kalóóng Jê-su Chuôq Paq Manưih, nek palơq cha-iil tabah nh'chró.

11Paraaq ađô nek đaang huuiq ganơơm:

“Taai la nôôq he ơi chêt palơq Ađó, nek nôôq he kung e mamông palơq Ađó.

12La nôôq he đuôh đơơp jruôn, nek nôôq he kung e ting kadhâng akoq palơq Ađó.

La nôôq he dyiin Ađó, nek Ađó kung e dyiin nôôq he.

13La nôôq he kah bhơt lóóm, nek Ađó biêh bhiêk yươq tadhơ,

taai Ađó kah chóóm tư dyiin ađêi.”

14Phaai pató pahei manưih huuiq Chuôq nôôq rau achêk, xók trêh móón piđó toom mat Yaang Pleng buôn óóq tarjeng tarkaai leq chư dhanóók, taai kah rau malơơi malaai, chapiên đââng tơk rau hư bil nek palơq manưih xâng. 15Phaai têêng bhơt praan đóng gluh pakah chênh akóón kala kơi manưih pâng dhalam toom Yaang Pleng, mưi chanak têêng makông yươq kachiit mat, truuih pachóóm kre pâng paraaq dhalam. 16Mat lââng, phaai róch nôôq dharơp tapraaq taxêi dhiq đơơi kah machak maraang, taai piđó e đââng tơk dhiq kah bhi chap kaang lơh, 17lơq paraaq tapraaq taxêi ưng nôôq manưih achêk e vaaih xar rau trââi tơơr thê kơi matóch pa bhachơh, hơq kalóóng nôôq ađek nek Hi-mê-nê lơq Phi-lêêt, 18nôôq đu ơi vôôiq lơt xraang palơq paraaq dhalam, xók praaq kơi ađô rau mamông lóóiq xong ơi yuur vaaih, lơq piđó dyơq têêng pahư lóóm huuiq ưng mưi phơn manưih. 19Dhơ kơi ađek, bhanơn pariiq mưng liêm ưng Yaang Pleng ơi dyương mưng, xók ve paraaq kanal ađô: “Chuôq n'nal ngaai nôôq mađó lơq Ađó” lơq “Dhơ dhangaai dhaloong gavơh dhanóók Chuôq phaai róch changaai tââq rau kah liêm.”

20Mat lââng, kalóóng mưi dhanong đong gamak, kah chapiên ve angóók palơq vaang lơq baak, hơq dyơq palơq n'lóóng lơq katiêk tet, mưi phơn koom leq tarnêêng kiiq liêm, hơq phơn lââng koom leq tarnêêng havaar kaxu. 21Kơi achêk hơq, la ngaai ơi kajut pasek ađêi tââq nôôq rau achêk, nek manưih ađek e nek m'beq angóók koom leq tarnêêng kiiq liêm, ơi bâân lơơi pantua, malơơi đóng palơq kala, bâân ravang koom đóng dyóp rau tarnêêng liêm.

22Phaai mut klôôn nôôq lóóm malóóch kiêng ưng tuôi paniên, hơq ting viêng rau bhơt liêm, lóóm huuiq, lóóm tanhơr, palơq rau liêm marleng palơq nôôq manưih dhaloong gavơh Chuôq palơq kalóóng lóóm sek chadhah. 23Bơơi nek óóq tapâng nôôq tarkaai pađươk ngôôk ngaak lơq kah n'nal bhluuch, taai n'nal kơi piđó chapiên yuur vaaih tarkaai tarlak. 24Manưih dhơn ratơơq ưng Chuôq phaai óóq tarkaai tarlak, bơơi phaai moor charnap palơq dyóp ngaai, ve đuôh pató pachóóm, jruôn parngau, 25xók chaleq kayua nôôq đu jaklâk jơl ađêi palơq rau moor dha-iiq, ngaai n'nal Yaang Pleng đóng leq piđó lóóm klôôq matu malóóm tơk rau kanóq n'nal paraaq dhalam, 26lơq piđó ve chóóm meh lóóiq tââq dham biêng ưng abhưi abhóch, xong xók bâân ađó kóóp jư buôn têêng ting karnóq ađó.