1 Kô-rin-tô 5

1Tarlum kadhaap lalua bâân xâng praaq dhiq m'pơng kalóóng adhi anó nek mưi tarnêêng tapiing taniêt, lơq kơi tapiing taniêt kơi achêk nek rau patơk mơ kah ve dhiq m'pơng kalóóng nôôq dhanuôr katiêk palââng. Tơk mơ hơq mưi chanak tôôh pei kađiêl ưng ama ađêi. 2Hayơq adhi anó nek bhiêk laach jơơr, vil dhaang kah rau mơ kalau nhiim, hơq đóng manưih ơi têêng tarnêêng achêk ve chóóm bâân m'peq lơơi tââq m'pơng kalóóng adhi anó. 3Ơi aku, dhơ changaai kalóóng achak araang bơơi ve mat kalóóng lóóm karnóq, ơi tabóq matu manưih têêng matu mơ achêk ơi, kơi ngóq dyơq ve mat tơơt dhiq ađek. 4Kalóóng dhanóók Chuôq nôôq he, nek Jê-su Chuôq Paq Manưih, xók adhi anó ơi bâân nhoom karong lóóiq, palơq lóóm karnóq ưng aku, palơq karơ mataai ưng Chuôq nôôq he nek Chuôq Jê-su, 5buôn pajaau manưih ađek đóng Sa-taan hơq đơơp rau leng pahư phơn achak, ng'kơi đóng lóóm ravaai ađó ađek ve chóóm bâân paq kalóóng tangêi ưng Chuôq. 6Rau laach jơơr ưng adhi anó kah rau liêm kre. Adhi anó kah n'nal kơi m'bưưiq piêng têêng paxơơk tabhơt mapơq amun alua? 7Phaai kajut pasek piêng ti, buôn adhi anó ve chóóm nek mapơq amun tame, thê kơi adhi anó nek beng kah mapiêng. Taai Chuôq Paq Manưih, nek trưưu akóón Bhiêk Jalơh ưng nôôq he, kung ơi bâân leng têêng dhah bhanuôih. 8Kơi achêk hayơq, nôôq he phaai tơơt bhiêk, eh rau palơq piêng ti, kung eh rau palơq piêng chachââr galơơk, lơq têêng aak, bơơi nek palơq beng kah mapiêng ưng rau lóóm taniih lalua lơq paraaq dhalam.

9Kalóóng bha-aar aku ơi xaraq đóng adhi anó nek óóq tơơt charjơơk palơq manưih têêng tapiing. 10Parpâng eh rau nôôq manưih têêng tapiing ưng manưih hóng katiêk ađôk, môôiq nek manưih n'thaam jahaam, lơq malua, môôiq nôôq manưih bhuôih kabhêi, taai kơi achêk, adhi anó kơng phaai yuur gluh tââq manưih hóng katiêk. 11Bơơi kơi xók ađôk, aku ơi xaraq đóng adhi anó óóq tơơt charjơơk palơq dhơ dhangaai manưih đu bâân đóók nek adhi anó hơq nek manưih têêng tapiing, n'thaam jahaam, bhuôih kabhêi, keen tóh taaiq, ból plơ, môôiq chachââr galơơk. Patơk mơ kung óóq cha madhiq palơq mưi manưih kơi achêk. 12Taai xêi lơt nôôq manưih tơơt nguôi harau pâng tơk aku? Adhi anó kah xêi lơt nôôq manưih dhiq kalóóng alua? 13Bơơi Yaang Pleng e xêi lơt nôôq manưih dhiq tôôh.

“Phaai m'peq lơơi rau lơt aak tââq m'pơng chênh adhi anó.”