1 Kô-rin-tô 4

1Taai kơi ađek, ting chanak phaai lêi nôôq yi kơi nôôq dhơn ratơơq ưng Chuôq Paq Manưih lơq nôôq manưih jư lêi nôôq rau lalââp ưng Yaang pleng. 2Hayơq tarlum kadhaap dhiq ađô, achêk nek rau bâân mââl nhan dhiq nôôq manưih jư lêi nek ng'kơi đóng dyóp ngaai bâân lêi nek yươq tadhơ. 3Bơơi tarlum kadhaap ađô nek chiên kuôq katưưiq katit nek palơq aku, dhơ đóng aku ve chóóm bâân chamet lêi tââq adhi anó môôiq tââq kabhuh kadhâng xanêi ưng akóón manưih, Mat lââng, aku kung kah tư chamet lêi achak ađêi. 4Ơi aku đơơp lêi yươq ve rau tarlum kadhaap jaklâk huông ađêi kala, dhơ kơi ađek aku kah bâân đóók bhơt liêm đươi tarnêêng achêk; bơơi Chuôq nek Yaang chamet lêi aku. 5Kơi achêk hayơq, óóq xêi lơt hau rau laloom tơk gani, nek tơk xók Chuôq bhral, nek Yaang chadrươh e đââng nôôq tarnêêng kadrêi lââp ưng rau kanam kanheet gluh leq brương, chadrươh e pakah nôôq karnóq kaniêng kalóóng lóóm. Hayơq mót bhêêl ađek, rau bhi haanh tââq Yaang Pleng e tơk palơq ting chanak.

6Nhan móón adhi anó, aku ơi pei têêng nôôq rau ađô nek palơq chênh ađêi lơq A-bô-lô, taai malơơi ưng adhi anó, buôn tââq nôôq yi, adhi anó ve chóóm hok n'nal xayar ađô:

“Óóq bhalóng lơh paraaq ơi xaraq,”

hơq đóng óóq mưi ngaai yuur laach jơơr ađêi vơn dhanóók manưih ađô jaklâk lóóiq manưih tôôh. 7Ơi ngaai têêng blah adhi anó tablah xóng ađêi? Mat lââng, hau rau adhi anó ơi ve hơq ađêi ơi kah bâân đơơp? Bơơi la adhi anó ơi đơơp, nek ng'kơi adhi anó vil laach jơơr kơi ngóq kah ơi đơơp? 8Adhi anó nek ơi bâân dyóp aq! Adhi anó ơi val kơi kabhôôq karvaan aq, adhi anó ơi ravang kađââng akoq hơq kah đươi nôôq yi, lơq aku rââm adhi anó lalua kađââng akoq, buôn nôôq yi kung ve chóóm kađââng akoq makơi palơq adhi anó! 9Ơi aku ve kanóq Yaang Pleng ơi pakah nôôq yi gluh têêng nôôq sưưq-đô tatun kiêt, kơi nôôq manưih bâân tabóq matu leng chêt. Taai nôôq yi ơi val xar mưi tarnêêng têêng pacheh đóng manưih hóng katiêk, lơq đóng dhơn Yaang Pleng palơq đóng dhong nooi manưih. 10Nôôq yi nek ngôôk khơl ơi taai Chuôq Paq Manưih, hayơq adhi anó nek tabech galang kalóóng Chuôq Paq Manưih. Nôôq yi dhur lóóm, hayơq adhi anó nek grâ karơ. Adhi anó bâân bhi chap, hayơq nôôq yi bâân kađiq kađiêp. 11Đóng tơk bhêêl ađôk, nôôq yi lơq jruôn ha-ul, đơơp rahaal, lơq xơp n'đóh bhatuui taai, lơq bâân tambhiiq m'pah jarnah jakaal, lơq kah ve dhiq tơơt ra-iên, 12lơq têêng vôôiq nhưh nhok, têêng tarnêêng palơq chênh bơơr beq têi ađêi. Xók bâân tóh taaiq, nôôq yi nhan phươk. Xók bâân janah leng, nôôq yi đơơp jruôn. 13Xók bâân baauq uôn, nôôq yi bhơơl pahêêl. Nôôq yi ơi val xar kơi nôôq rau n'đoh n'đương ưng manưih hóng katiêk, ưng dyóp rau n'đoh n'đương, đóng tơk xariêq tangêi ađôk.

14Aku kah xaraq nôôq paraaq ađôk buôn têêng kachiit mat adhi anó, bơơi aku bhơơl pachóóm adhi anó kơi akóón bơk nh'nhơr ưng aku. 15Ơi dhơ adhi anó ve kaaq bhaan manưih kađââng kalóóng Chuôq Paq Manưih, nek kung kah ve bơk ama; tââq aku ơi yuur n'niên adhi anó kalóóng Jê-su Chuôq Paq Manưih đươi Taruuih Liêm. 16Kơi achêk, aku mââl bhơơl adhi anó phaai val kơi nôôq manưih ting đuui aku. 17Taai ơi rau ađôk aku kayua Ti-mô-thê vôôiq, hơq nek panong akóón bơk nh'nhơr lơq bhơt lóóm huuiq ưng aku kalóóng Chuôq, tơk palơq adhi anó. Ađó achêk e praaq pahei adhi anó leq nôôq ploong kalơng ưng aku kalóóng Jê-su Chuôq Paq Manưih, dhalam kơi aku ơi truuih pachóóm dhiq kalóóng Kabhuh Akóón Dhơn Chuôq plok dyóp dhiq. 18Dhơ kơi ađek, kơi ngóq taai aku kah tơk palơq adhi anó, hayơq mưi phơn manưih ơi yuur laach jơơr ađêi. 19Bơơi aku e đâh vôôiq palơq adhi anó, la Chuôq kiêng, lơq aku e bâân n'nal, eh rau paraaq praaq ưng nôôq manưih laach jơơr tôôh, bơơi nek praan kataai ưng piđó. 20Ơi katiêk Yaang Pleng eh rau dhiq paraaq praaq, bơơi nek dhiq karơ mataai. 21Adhi anó kiêng harau? Aku kơng tơk palơq adhi anó palơq m'beq rooi, môôiq palơq lóóm tanhơr lơq lóóm karnóq moor dha-iiq?