Kaike Standard Traslation
प्रे 15
यरूसलेमन बिस्वासीव जोम्पा
ता कान सिमिवजै यहूदियालै एन्तिओखियाः स्वास्वा बिस्वासी थिक्कोवग झाम लह्म्मः जाःबो, “ङेन मोसान कानुन अन्सार खतना मराङिन ता ङेन उद्धार रा तैनान मया।”1 तब पावल रे बरनाबासन ख्युन ङ्याबो लै मदीचे रे र्वाचे रामी, स्यान थिक्कोवजै पावल, बरनाबास रे घङ हातिपाः अन प्रस्नन फैसलान पत प्रेरितव रे ताङ्बोन अगुवावन ङ्याबो यरूसलेम वैचेन पत दम्बो।
मन्दलिन सिमिवजै ख्युकाङ्मोः स्याह्लै भिदा बिम्बो। ख्यु फोनिके रे सामरियालम राह्राह् वैतौ यहूदीन खोलोःन सिमिवन प्रभू स्वीकारी खेपान ल्होई पुरू मङी खेखे ख्युकाङ्मोः स्याप्पो। अन ल्होनजै स्यान बिस्वासी थिक्कोव मिह्दा स्याङ्बो। जब ख्यु यरूसलेम स्वा ताप्पो। तब ख्युकाङ्मोः मन्दलि, प्रेरित रे ताङ्बोन अगुवावजै स्वागत खेबो। परमेस्वरजै ख्युन ङ्याबो खेपा ल्होई पुरून प्रतिबेदन ख्युई स्याह् बिम्बो। तब फरिसी पातीन हातिपा बिस्वास खेनानवजै च्याङच्याङ र्वाबो, “यहूदीन खोलोःन सिमिवन खतना राचे रे ख्युकाङ्मोः मोसान कानुन ङ्यान फानत्वानान ङ्याह्।”
अन्न बिसयग सोच बिचार खेचेन भिह्तु प्रेरितव रे ताङ्बोन अगुवाव जोम्बो। लै ल्होई रामी पत्रुसजै च्याङच्याङ ख्युकाङ्मोः र्वाबो, “भाइ हो, ङेनकाङ्मोः क्युई ङ्याह्, ङून दिनवग कुजुई परमेस्वरजै ङन ङुरलै यहूदीन खोलोःन सिमिवजै ल्होन् लःन केह्ः ताँयो रे बिस्वास ख्याःयो र्वार्वा ङेन घूँलै ङाः दम्बो। समन ल्होई क्युई राह्नान परमेस्वरजै ख्युकाङ्मोः र्वार्वा ङी लैम पबित्र आत्मा बिमबिम ख्युकाङ्मोः स्वीकार खेपान ल्होई थम्बो। नुई ख्यु रे ङिन घूँ तये भेदभाव मनाह्म्बो, जेङ्नै ख्युन सम बिस्वासलम छाङ्म दोङ्बो। अन्न कारन चेलावन छोअपाः अन सिङ्कुल नान्नान तैङ परमेस्वरन छोए सेन्नान? अन सिङ्कुल न ता ङिन खेपुलजै न ङ्योअजै हुर तैनान। जेङ्नै ङि बिस्वास खेनान, कि प्रभु येसुन दयालम ङ्योअजै उद्धार देप्पा ङिह्पा, कुजुई ख्युई रे देप्पा ङ्याह्।”
तब जोम्पाः पुरू तै मर्वारे छ्युङ्बो, आलै यहूदीन खोलोःन सिमिवन घूँ परमेस्वरजै ख्युन लम कत्यामन हालाईचेन धोनव रे ताईलुवान धोनव खेबो अन्न बयान बरनाबास रे पावलजै खेबो। ख्युई अन बयान ङ्याम्बो। ख्युई ल्होई र्वातामी याकूबजै झाम र्वाबो, “भाइ हो, ङन ल्होई ङ्याना, परमेस्वरजै जेँनै मिह्न्न पत यहूदीन खोलोःन सिमिव लम ती सिमि दम्चेन दया खेबो र्वानान ल्होई सिमोनजै स्याप्पा ङ्याह्। अनै ल्होईन ङ्याबो भबिस्यबक्तान केह्ः रे दीनान, कुजु पबित्रसास्त्रग सर्पा ङ्याह्, ‘अन ल्होईन ङिक ङा होल्नान ङ्युँ, रे दाऊदन दिम्पान छ्युङ्पु ह्याङ दोङ्नान ङ्युँ, मन्न दिमदिम लुईपाव ङा ह्याङ दोङ्नान ङ्युँ, रे नू सोल्नान ङ्युँ,2 रे लुईपा सिमिवजै परमप्रभू फात्तयाःयो, रे यहूदीन खोलोःन सिमि पुरूवजै, सू ङन मिह्नलै स्वा र्वापा ङ्याह्, अन ल्होई परमप्रभु र्वाङ, सुई ताङ्बोलै अन ल्होईवन ल्होन स्यारैस्यारै स्वापा ङ्याह्।’3
“अन्नकारन ङन फैसला अन ङिह्पा, कि परमेस्वरक्याँ होल्नान यहूदीन खोलोःन सिमिकाङ्मोः ङ्योअ मकान्मता, जेङ्नै ख्युकाङ्मोः अन ल्होई सर्मता, कि ख्यु कु सोल्याप्नान्न बापा धोनलम भाभा छ्योवायो, ब्यभिचारलम, होला च्योरच्योर सह्प्पा भस्तन स्या रे कहलम भाभा छ्योवायो।4 तैङर्वाङिन ङून पुस्तालै सहर सहरग मोसान कानुन्न ताह्फेप्पाई ङ्याह्, तैङर्वाङिन अन पुरू येहूदी आराधनालय पुरूग नाह्न ल्हाः तोअयङ ङ्याह्।”
यहूदीन खोलोःन बिस्वासीकाङ्मोः पत्र
तब प्रेरितव, ताङ्बोन अगुवाव रे मन्दलि पुरूजै दीदी जेँन घूँलै हातिपा सिमिकाङ्मोः दमदम पावल रे बरनाबासन ङ्याबो एन्तिओखियाः फेच्चे ल छुबो। रे थिक्कोवन बर्ग ङोत्वा सिमिव, यहूदा र्वानान बरनाबास रे सिलासग दम्बो। रे नुन ङ्याबो ख्युई अन पत्र कोर्बो: “एन्तिओखिया, सिरिया रे किलिकियाः छ्युङ्नान यहूदीन खोलोःन सिमि बिस्वासी थिक्कोव, प्रेरितव रे ताङ्बोन अगुवावन नमस्ते। ङिन घूँलै वैपान कान-कान सिमिवजै घोलोवा लनलन ङिन ङेनकाङ्मोः तूरि बिम्बो र्वानान्न ल्होई ङी ताह्पा ङिह्पा। जेङ्नै ङी मन सिमिकाङ्मोः फेप्पा नङ्पा। अन्नकारन ङि पुरूजै ती सम राह्राह् खेपा निर्नय अन्सार हातिपा सिमिकाङ्मोः दमदम ख्युकाङ्मोः ङिन स्याङ्पान बरनाबास रे पावलन ङ्याबो ङेन स्याह् फेच्चे ङ्योअग ल छुबो। अन सिमिव झाम जेङ्पा, सुई ङिन प्रभु येसू मसिहन पत जेँन परान जोखिमग पप्पा ङ्याह्। अन्नकारन ङ्योअजै यहूदा रे सिलासग फेप्पा ङिह्पा। ख्युई र्वार्वा अनै ल्होईव ङुरलै र्वानान ङ्याह्। तैङर्वाङिन पबित्र आत्मा रे ङ्योअग अन ल छुबो, कि अन ङोत्वाखाईमे ल्होईव नङ्म घङ ह्याल्म तूरि ङेनकाङ्मोः हुरमफान्नान। ङेनकाङ्मोः कुकाङ्मोः भोका फुल्याप, कह, होला च्योरच्योर सप्पा भस्तन स्या रे ब्यभिचारलै भाभा छ्योवा। अन ल्होईवलम भाभा छ्युँङिन ल राह्नान ङ्याह्। ङ्याबो ङ्योअन नमस्ते।”5
भिदा रामी ख्यु एन्तिओखियाः स्वाबो, रे बिस्वासीन मोङग ङ्याबो जोमजोम अन पत्र बिम्बो। पत्रग रह्पान खाईकोएन ल्होई तोअतोअ ख्यु स्याङ्बो। यहूदा रे सिलास जेँ र्वार्वा भबिस्यबक्ता रह्पान कारन थिक्कोवकाङ्मोः लैः बचनलम खाईकोए बिमबिम ख्युकाङ्मोः बिस्वासग ङार्छेम दोङ्बो। अजोवजै खजिर्या स्याह् छ्युङ्मी, स्याह्न बिस्वासी थिक्कोवजै अजोवग फेन्नानवन स्याह् किम्म खेखे भिदा बिमबिम फेप्पो। [ जेङ्नै सिलासग स्याह्ई छ्युङ्चे ल छुबो।]
पावल रे बरनाबास चन लह्नैलह्नै रे प्रभुन केह्ः ताह्फेरैफेरै घङ लै सिमिन ङ्याबो खजिर्या एन्तिओखियाग छ्युङ्बो।
पावल रे बरनाबास भापा
खजिर्यान ङिक पावलजै बरनाबासग र्वाबो, “स्वा, कन-कन सहरग प्रभुन केह्ः ङ्योअजै ताह्फेप्पा ङ्याह् मन सहरवग होलहोल होई बिस्वासी थिक्कोवग धोमता रे ख्यु कत्याम ङ्याह् सेम्मता।” बरनाबासजै मर्कुस र्वानान यूहन्नाः ख्युन ङ्याबो वत्सुम खेबो। जेङ्नै पावलजै मर्कुसग ङ्याबो वच्चे ल मछुबो, तैङर्वाङिन नु पामफिलिया छेत्रलै ख्युन ङ्याबो भाभा वैपा ङ्याह्, रे ख्युन ङ्याबो धोनग वैपा मया।6 ख्युन घूँ अकेः किम सल्ला मदीनान रह्पा, कि ख्यु राह्ङराङ्सालम भाबो, रे बरनाबास मर्कुसग ङ्याबो वव्वै त्युन जहाजग साइप्रसक्याँ होई। जेङ्नै पावलजै सिलासग दम्बो, आलै थिक्कोवलम परमेस्वरन दयाग जेँग नान्नान स्याह्लै होई। मन्दलिवग ङाह्र्छेम दोङैदोङै नुई सिरिया रे किलिकिया राह्राह् यात्रा खेबो।
Source notes (6)
- Cross-reference लेवी १२:३
- Cross-reference यर १२:१५
- Cross-reference आमो ९:९-१२; यसै ४५:२१
- Cross-reference उत ९:४; लेवी ३:१७; १७:१०-१४
- Cross-reference उत ९:४; लेवी ३:१७
- Cross-reference प्रे १३:१३
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.