Kaike Standard Traslation
प्रे 14
आइकोनियनग पावल रे बरनाबासन सेवाकाई
ता आइकोनियनग पावल रे बारनाबास ङ्याबो येहूदीवन आराधनालयग जाःजाः झाःम खेखे ल्होई र्वाबो, कि यहूदीव रे यहूदीन खोलोःन सिमिवन मोङ किमै बिस्वास खेबो। जेङ्नै बिस्वास मखेनान यहूदीवजै चन यहूदीन खोलोःन सिमिकाङ्मोः बर्ग जाःजाः थिक्कोवन बिरोधग ख्युन सम खाःपा दोङ्बो। प्रभुन भरग हिम्मत खेखे ल्होई र्वायङ भेला लै थाल पावल रे बरनाबास स्याह् छ्यूबो। प्रभुई ख्युन ल्हालै हालाईचेन धोनव रे ताईलुवान धोन खेफानफान जेँन दयान बचन्न साँचि बिम्बो। जेङ्नै सहरन सिमिकाङ्मोः भाचे रह्पा, रे कान यहूदीवक्याँ रे कान प्रेरितवक्याँ जाःबो।
यहूदीन खोलोःन सिमि रे यहूदीव ङ्योरुमजै ख्युन हाकिमवन ङ्याबो दीदी प्रेरितकाङ्मोः तेपफान्नान रे लुङ फ्याङ्चेन प्रयास खेबो। ख्युई अन ल्होई क्युई रह्पा, रे लुकोनियान सहरव लुस्त्रा, दर्बी रे धेँवछोँन छेत्र राह्राह् ज्यारज्यार होई, रे स्याह् ख्युई ल्होन् लः ताह्फेप्पाई छ्युङ्बो।
लुस्त्रा रे दर्बीग सेवाकाई
ता लुस्त्रा सहरग लेह् कुल मतैनान सिमि तीपा छ्युङ्पा ङ्याह्। अन केह्तौलैन लुल्या ङ्याह्, रे हातौयै लेम्पा मया। पावलजै ल्होई र्वापा नुई ङ्यान्यङ ङ्याह्। पावलजै नू ती खेखे सेम्बो, रे ताःचेन नुन बिस्वास ङ्याह् र्वानान रङरङ केह्ः किमै फाईरा खेखे र्वाबो, “नान लेह्न भरग थार्का च्याँ।” आलै अन सैतैग च्याङ्बो रे बोरैबोरै ल्हेम्म जाःबो। जब पावलजै खेपा अन धोन मोह्ङजै रङ्बो, तब ख्युई लुकोनियान ल्होईग केह्ः किमै झाम र्वाबो, “लाव सिमिन रुपग ङ्योअन ङ्याबो लिपलिप स्वादँ।” ख्युई बरनाबासग जिउस ला रे पावलग हर्मेस ला र्वामः जाःबो, तैङर्वाङिन अजोव चन ङोत्वा भासन बिन्नान्न सिमि ङ्याह्। सहरन ङूक्याँ रह्पा जिउसन आराधनालयन पुजारीजै ताह्ङ्रावग मिबाव रे मिन्नोवान फुलमालाव सस्सै स्याह्न सिमिवन ङ्याबो दीदी भोका-फुलसुम खेबो।
जेङ्नै जब प्रेरितव, बरनाबास रे पावलजै अन ल्होई ताह्बो, तब ख्यु जेँन घोलाङ छ्योनछ्योन झाम र्वायङ फाईरा खेखे सिमिवन घूँ धालैधालै होई रे र्वाबो, “सिमिव हो, ङेनको तैङ झाःम धोन खेनान? ङि रे ङेनको लैम तूरि-किम्म कूनान्न सिमिव जेङ्पा, रे ङेनकाङ्मोः अन भाछ्योवान ल्होईव लम सम्पु परमेस्वरक्याँ होलफान्चेन पत ल्होन् लः स्यान्नान, सु परमेस्वरजै स्वर्ग, पिर्थीबी, समुन्द्र रे मनग रह्पा तैस्याङ पुरू दोङ्बो।1 नुई ङू वैतपा पुस्ताग सिमि पुरूवग जे-जेँनै ल्हूलाम अन्सार वैफाम्बो। जेङ्नै नुई जेँग साँचि मीपा मख्योवाबो, तैङर्वाङिन नुई भलो खेखे ङेनकाङ्मोः पान्नाङलै नाङ्का रे फल छ्यानान्न सम्यो बिम्बो रे ङेनकोन समग ङ्योप्पा रे किम्मै हन्तक दोङ्बो।”2 अन ल्होई पुरु र्वार्वा प्रेरितवजै धौखेखे भोका-आराधना फुलमफानरे मन मोङग काःबो।
जेङ्नै कान-कान यहूदीव एन्तिओखिया रे आइकोनियनलै स्याह् स्वा ताप्पो, रे मोङग उक्स्याई खेखे पावलग लुङ फ्याङ्बो, रे नु सिह्पा जेम्तौ र्वार्वा छुछु सहरलै खोलोः पुरीपुरी वप्पो। जेङ्नै जब चेलाव नुन धेँवछोँ च्याङ्बो। आलै नु च्याङ्बो रे सहरन झिङ जाःबो, रे नाप्चे बरनाबासन ङ्याबो गेग्गे दर्बी होई।
सिरियान एन्तिओखियाग होल्पा
पावल रे बरनाबासजै दर्बिया सहरग ल्होन् लः ताह्फेप्पे लै चेलाव दोङ्बो, रे ख्यु लुस्त्रा, आइकोनियन रे पिसिदियान एन्तिओखियाग होल्बो, ख्युई चेलाकाङ्मोः ङार्छेम दोङ्बो रे ख्युकाङ्मोः बिस्वासग तेम्मा राह्राह् छ्युङ्मः हौसला बिम्बो। ख्युई “परमेस्वरन राज्यग जाःम ङ्योअजै लै तूरिव गारत्वानान,” र्वार्वा लह्म्बो। जब ख्युई ख्युन मन्दली पुरूग अगुवाव दम्बो। तब सोअताप रे बर्त ङ्याबो ख्युवाजै बिस्वास खेपान प्रभुन जिम्माः ख्युकाङ्मोः बिम्बो।
आलै ख्यु पिसिदियालम राह्राह् पामफिलिया छेत्रग स्वाबो। पर्गाः केह्ः ताह्फेप्पे ख्यु अतालियाग स्वाबो। आलै स्याह्लै ख्यु समुन्द्र यात्रा खेखे एन्तिओखियाः होई, खाः ख्युई पुरा खेपा धोन्न पत परमेस्वरन दयाग ख्युकाङ्मोः थोप्पा ङ्याह्। जब ख्यु एन्तिओखियाः स्वा ताप्पो, तब मन्दली रूबो, आलै परमेस्वरजै ख्युन ङ्याबो खेपा धोन पुरून बयान खेबो, रे कुजुई नुई यहूदीन खोलोःन सिमिवन पत बिस्वासन झला पोङ्बो अन स्याप्पो। ख्यु एन्तिओखियाग चेलावन ङ्याबो याम्मा छ्युङ्बो।
Source notes (2)
- Cross-reference प्रस २०:११; भजन १४६:६
- Cross-reference भजन १४७:८; यर ५:२४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.