Kaike Standard Traslation
प्रे 13
बरनबास रे सावलग सेवाकाईन भिह्तु दमदम फेप्पा
एन्तिओखियान मन्दली भबिस्यबक्ताव रे गुरुव, आथबा बरनाबास, काला र्वानान सिमीयोन, कुरेनीन लुकियस, प्रान्तीय ङोत्वा सासक हेरोदन ङ्याबो छारै वैपा मनेन रे साऊल ङ्याह्। ख्युई प्रभुन आराधना खेपाई छ्युङ्पा रे बर्त छ्युङ्पान भेला पबित्र आत्माई र्वाबो, “ङन भिह्तु बरनाबास रे साऊलग मन धोन्न भिह्तु फा, कन धोन्न भिह्तु ङै ख्युकाङ्मोः घ्वापा ङिह्पा।”
तब बर्त रे सोअतापताप ख्युई ख्युन लाह्ः जेँन लाह् नान्नान ख्युकाङ्मोः लम होई।
साईप्रसग सेवाकाई
तब पबित्र आत्मालम फेप्पा रह्पान कारन बरनाबास रे साऊल सिलुकियाग होई रे स्याह्लै त्युन जहाजग चपचप साइप्रसक्याँ होई। सलामिसग स्वातामी ख्युई यहूदीवन आराधनालयवग परमेस्वरन ल्होन् लः ताह्फेप्पो। ख्युकाङ्मोः फुरी खेमः यूहन्ना ख्युन ङ्याबो ङ्याह्। जब ख्यु तापु पुरूग ल्हेनैल्हेनै पाफोसथाल स्वा ताप्पो, तब स्या ख्युई यहूदी लबारन भबिस्यबक्तादीन बार-येसु मिह्न्न जादु खेनान्न सिमिदीग धोबो। अन जादु खेनान्न सिमिदी प्रदेसन ङोत्वा सासक सर्गियस पौलसन ङ्याबो छ्युँ। सर्गियस पौलस बुद्धिमानी सिमि ङ्याह्। नुई साऊल रे बरनाबासग घ्वाघ्वा परमेस्वरन केह्ः ङ्यान्सुम खेबो। जेङ्नै एलुमास जादु खेनान्न सिमिजै (तैङर्वाङिन ग्रीक ल्होईग नुन मिह्न्न धा अनै जेङ्पा) सर्गियस पौलसग बिस्वासलै होलफानफान ख्युकाङ्मोः काःबो। जेङ्नै साऊलजै, सू पावल यङ र्वाङ, पबित्र आत्माई नाङनाङ नुनङ्या ती खेखे सेनसेन र्वाबो, “ना सैतान्न ङोह्जो, पुरू धर्मी सिमिन बैरी, पुरू छल रे अलःजै नाङ्पा! तै ना प्रभुन थार्का लम् यिम्पु दोङ्म मख्योवानौ? ता सेह्ना, प्रभुन लाह् नान लाह्ः थेप्पा ङ्याह्, रे ना ता ङाई बेरथाल ङिह्मान ताह्म मरङ्नान राह्राह् काना राह्नान ङ्याह्।” आलै मन्नै भेला मूपा रे नातुमाई नू कप्पो, रे कानजै नुन लाह् जुङ्जुङ् र्वानान कि र्वार्वा अन धेँवछोँ वैमः जाःबो। तब देसन मन ङोत्वा सासकजै अन र्वापा रङरङ बिस्वास खेबो, तैङर्वाङिन प्रभुन छोएग नु हालाईपा ङ्याह्।
पिसिदियान एन्तिओखियाग सेवाकाई
पावल रे नुन फुरीव पाफोसलै त्युन जहाज चपचप पामफिलिया सहरन पर्गाः ताप्पो, रे यूहन्ना ख्युन लम भाभा यरूसलेम होल्बो। जेङ्नै ख्यु पर्गालै गेग्गे पिसिदियान एन्तिओखियाग स्वाबो, रे नाह्न ल्हाः आराधनालयन झिङ वैवै छ्युङ्बो। ता कानुन रे भबिस्यबक्तान किताबन पाठ तोअमी यहूदी आराधनालयन ङोत्वा अगुवावजै ख्युन स्याह् झाःम र्वार्वा फेप्पो, “ए भाइ हो, ङेनकोन ङ्याबो सिमिवन भिह्तु खाईकोएन तयाः ल्होई ङिङिन र्वा।” तब च्याङच्याङ पावलजै लाह्जै लाःता खेखे र्वाबो, “हे इस्राएली रे यहूदीन खोलोःन सिमि परमेस्वरग ङिन्नान हो, ङ्याना, इस्राएली सिमिवन परमेस्वरजै ङिन खेपुलकाङ्मोः दमदम मिस्रदेसग छ्युङ्तौ ख्युकाङ्मोः मकेकुकेन किम दोङ्बो, रे नुन सक्तिसाली पाःपुङ्जै ख्युकाङ्मोः मन देसलै छ्युछ्यु सप्पो।1 सुनसान ठाउँग क्वाईमाल्ला: ङेथल पराथाल नुई ख्युन सेन्चे खेबो।2 तब नुई कनान देसग ने जाति मीपा दोङ्दोङ् ख्युन देसन आङ क्वाईमाल्ला: क्याम ङेह् रै फेराङ ङाथल पराथाल ख्युकाङ्मोः बिम्बो।3” अन ल्होईन ङिक सामुएल भबिस्यबक्तान पालिन बेर नुई न्यायधीसव बिम्बो।4 आलै ख्युई झली तोल्बो, रे परमेस्वरजै बेन्यामीन पत्तिन किसन ङोह्जो साऊलग ङेथल पराथाल ख्युन लाह्ः रजाई खेफाम्बो।5 परमेस्वरजै नू पह्म्मी दाऊदग ख्युन झली राम सोल्बो। नुन भारेः परमेस्वरजै साँचि बिमबिम र्वाबो, “ङै यिसैन ङोह्जो दाऊदग ङन सम अन्सारन सिमि देप्पा, सुई ङन इच्छ्या पुरू पुरा खेनान ङ्याह्।”6 अनै सिमिन ङिकन सन्तानलम, नुन रेनरुपा अन्सार, परमेस्वरजै इस्राएलन पत ती मुक्तिदाता, येसू सप्पो।7 नु स्वाचेन खेरे ङू बप्तिस्मा बिन्नान्न यूहन्नाई इस्राएलन सिमि पुरूग घ्योप्पान बप्तिस्मान ताह्फेप्पा ङ्याह्।8 बप्तिस्मा बिन्नान्न यूहन्नाई जेँन धोन ताःमः जातौ र्वापा ङ्याह्, “ङेनकाङ्मोः तै छुनान, ङा सु जेङ्पा? ङा नु नङ्पा। जेङ्नै ङन ङिक तीपा स्वानान ङ्याह्, सुन ङा लेह्न पौलान तना यङ फोल्चेन सम स्योरस्योर लैम मीपा।”
“ए, अब्राहामन सन्तान सिमि, रे ङेन बर्ग परमेस्वरग ङिन्नान ए भाइ हो, ङिन स्याह्ई अन मुक्तिन ल्होन कोर्पा ङ्याह्। तैङर्वाङिन यरूसलेमग छ्युङ्नान रे ख्युन हाकिमवजै यसू मस्योरे बात्तै नाह्न ल्हाः तोअनान्न भबिस्यबक्तान बचनव हामकोरे न्यायग नू सच्चेन धल बिमबिम मन बचन पुरा खेबो। सच्चेन धलन कारन तये मदेन्नै ख्युई नू सत्त्वानान र्वार्वा पिलातसन ङ्याबो छ्याःफुल्बो, रे नुन भारेः सर्पा ल्होई पुरू ख्युई पुरा खेमी ख्युई नू क्रुसलै पोँ साःसाः तुह्र्साः लुँह्म्बो। जेङ्नै परमेस्वरजै नू सिह्पालै सम्पु दोङ्बो। जेँन ङ्याबो गालीललै यरूसलेम स्वानानवन स्याह् नु दिन लैन बेर रङ्बो, रे ख्यु चोँ सिमिवन घूँ नुन साँचि जेङ्पा।” परमेस्वरजै खेपुलग खेपान मन रेनरुपान ल्होन् लः ङि ङेनकाङ्मोः स्यान्नान। आथबा, कुजुई परमेस्वरजै येसू सम्पु दोङ्दोङ् सोलसोल अन ल्होई ङि, ख्युन सन्तान्न पत पुरा खेबो, कुजु भजनसङ्ग्रह ङेगै सर्पा ङ्याह्, “ना ङन ङोह्जो जेङ्पा, त्यान दिन ङै ना केह्पा ङिह्पा।”9 नुई मसिहग हातौयै मतोन्नान खेखे सिपालै सम्पु दोङ्पान भारेः चन झाम र्वापा ङ्याह्,10 “ङा ङेनकाङ्मोः दाऊदग बिम्पा पबित्र रे मताह्नान्न असिका बिन्नान ङिह्पा।” तैङर्वाङिन घङपू र्वार्वा झाम र्वापा ङ्याह्, ङेनजै जेँन पबित्र सिमिन ल्हो तोह्नफान्नान मया,11
“तैङर्वाङिन नुन जेँनै पुस्ताग परमेस्वरन उदेस्य अन्सार सेवा खेखे सिमी नुन खेपुलवन ङ्याबो दाऊद लुँह्म्बो, रे नुन ल्हो तोह्तोह् होई।12 जेङ्नै सू परमेस्वरजै सिह्पालै सम्पु दोङ्बो नुन ल्हो चन मतोह्म्बो।” “अन्नकारन हे जिङ्कोव, ङेनकाङ्मोः क्युई राःयो, कि मनै येसुलम तीपा माफ राह्नान र्वानान्न घोसना ङेनकाङ्मोः खेपा ङिह्पा। ङेन बिस्वास खेनानव पुरूजै नुन लमै ल्होई पुरूलम छुतकरा देप्पा ङ्याह्, कन छुतकरा मोसान कानुनलम ङेन पत राह्नान मया।”
अन्नकारन होस खेखे छ्योवा, तेमन्ता भबिस्यबक्तावन किताबग र्वापा अन ल्होई ङेन लाह्ः स्वानान ङ्याह्:13
“हे सिमिन नाः पन्नान हो, सेह्ना रे हालया, आलै मीपा रा, तैङर्वाङिन ङेन पाली ङा ती धोन खेचे, झाःम धोन कन्न भारेः सुई बयान खेनै ङेनजै हातौयै बिस्वास खेनान मया।”14 पावल रे बरनाबास यहूदी आराधनालयलै गेत्तौ सिमिवजै “घङ नाह्न ल्हाः ह्याङ स्वास्वा अन ल्होईवन भारेः ङी हेँ स्यारा” र्वार्वा छ्याःफुल्बो। आराधनालयन जोम्पा सिमिव च्याङ्मी लै यहूदीव रे यहूदीन ल्हूलाम ङ्यान्नान सिमिव पावल रे बरनाबासन ङिक जाःबो, रे ख्युई ख्युन ङ्याबो ल्होई र्वाईर्वाई ख्युकाङ्मोः परमेस्वरन दयाग लुईपाई छ्योवा र्वार्वा छ्याःफुल्बो।
घङ नाह्न ल्हाः क्वाईमाल्ला सहरन पुरू परमेस्वरन केह्ः ङ्यान्चेन पत होलहोल स्वाबो। मोङग रङ्तौ, यहूदीव थादोवाई नाङ्बो रे पावलजै र्वापा ल्होई च्याप्पो, रे नुन ल्हुई झबो।
जेङ्नै पावल रे बरनाबासजै हिम्मत खेखे र्वाबो, “परमेस्वरन बचन पुरून खेरे ङू ङेनकोगै मस्याखाईमे ङ्याह्। ङेनकोजै अनग अस्वीकार खेखे जेँगै न्यायग मताह्नान्न जिन्दगी मदेन्नान दोङ्पा राह्राह् ङि ता यहूदीन खोलोःन सिमिवन स्याह् वैनान ङ्यु। तैङर्वाङिन प्रभुई ङ्योअग झाःमन आग्या बिम्पा ङ्याह्, पिर्थीबिन धेँन नाःथाल मुक्ति साःमः ङै नाः यहूदीन खोलोःन सिमिवन पत ताह्म राम दम्पा ङिह्पा।”15 जब यहूदीन खोलोःन सिमिवजै अन ल्होई ताह्बो, ख्यु स्याङ्बो, रे परमेस्वरन बचन्न प्रसङ्सा खेबो, रे मताह्नान्न जिन्दगीन पत दम्पा पुरूजै बिस्वास खेबो।
प्रभुन केह्ः ठाउँ पुरूग फेल्बो। जेङ्नै पावल रे बरनाबासन बिरोधग यहूदीवजै अगुवा रे परमेस्वरन आराधना खेनान्न स्योःनान चिमिचाव रे सहरन ङोत्वा-ङोत्वा सिमिकाङ्मोः उक्साई खेबो, रे ख्युकाङ्मोः जेँन ठाउँलै खोलोः धाम्बो। जेङ्नै ख्युचन जेँन लेह्न थल्जुब ख्युन बिरोधग खारखार आइकोनियनग स्वाबो।16 चेलाव किम्म रे पबित्र आत्माई नाङ्बो।
Source notes (16)
- Cross-reference प्रस ६:१; १२:५१
- Cross-reference प्रस १६:३५; गन्ती १४:३४; कानुन १:३१
- Cross-reference कानुन ७:१; यहो १४:१
- Cross-reference न्याय २:१६; १ सामू ३:२०
- Cross-reference १ सामू ८:५; ८:१९; १०:२४; ११:१५
- Cross-reference १ सामू १३:१४; १६:१२-१३; भजन ८९:२०; यसै ४४:२८
- Cross-reference २ सामू ७:१२-१३; यसै ११:१
- Cross-reference मर्क १:४; लुक ३:३
- Cross-reference भजन २:७
- Cross-reference यसै ५५:३
- Cross-reference भजन १६:१०
- Cross-reference न्याय २:१०; १ झली २:१०
- Cross-reference हब १:५
- Cross-reference हब १:५
- Cross-reference यसै ४२:६; ४९:६
- Cross-reference मत्ती १०:१४; मर्क ६:११; लुक ९:५; १०:११
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.