Kaike Standard Traslation
प्रे 12
लै तेपफाम्पा
मन्न लाह्ः हेरोद झलीजै मन्दलिन लै सिमिकाङ्मोः तूरि बिन्चेन भिह्तु नुन लाह्ः लाह् कह्बो। नुई यूहन्नान दाज्यु याकूबग तरवालीजै सह्प्पो। अन धोनजै यहूदीव स्याङ्पा रङरङ पत्रुसग र्वार्वा जुङ्चेन प्रयास खेबो। अन घतना सोरा मकानान्न रोतान तेवरन लाह् रह्पा ङ्याह्। हेरोदजै पत्रुसग जुङ्जुङ् झ्यालखानाः कबो, रे निस्तार तेवरन ङिक नू सिमिन ङू सस्सुम खेखे नू सेन्चे खेमः सिपाहीन मोङ लीन जिम्मा बिम्बो। झामखेखे पत्रुस झ्यालखानाः कपा ङ्याह्, जेङ्नै नुन पत मन्दलिजै परमेस्वरग तुत्तुई सोअताप्पाई छ्युङ्पा ङ्याह्।
पत्रुसग ज्यालखानालै फेप्पा
हेरोदजै नू खोलोः छ्युछ्यु सत्फाम्पानै छान्जे, पत्रुस साँगल ङेह्जै खीखी पाले सिपाहीवन घूँ आःपाई ङ्याह्। सिपाहीव रे झलान ङूक्याँ थाङ्थाङ् छ्युङ्पाग झ्यालखानान सेन्चे खेपाई ङ्याह्। तैमेग प्रभुन स्वर्गदुतदी स्याह् रङ्बो, रे कोठाः साल्म रह्पा। स्वर्गदुतजै पत्रुसग कुलकुल “खम्म च्याँ” र्वार्वा नू सोल्बो। तब साँगलव नुन ल्हालै फोलफोल घ्याबो। स्वर्गदुतजै नू र्वाबो, “घोलाङ रे पौला घोना।” तब नुई झामै खेबो। नुई नू र्वाबो, “बर्खि गोनगोन ङन ङिह्ङिह् जाः।” आलै नु ज्यालखानालै गेग्गे नुन ङिङि जाःबो। स्वर्गदुतलम खेपान ल्होई तेम्माई जेङ्पा र्वानान नु क्युई मरह्पा। जेङ्नै नुई दर्सन रङ्पाई ङिह्पा र्वार्वा छुबो। जब सिपाहीन सेन्चे खेमः छ्युङ्पा पहिली रे ङेन मोह्ङग बोरबोर ख्यु सहरग जाःनान जङ्न झलाः ताप्पो, तब अन झला ख्युन पत नुँह् पोङ्बो, रे ख्यु खोलोः गेग्गे ती गल्लीन लम राह्राह् होई, रे तुरुन्तै स्वर्गदुत पत्रुसग ख्योवाख्योवा होई।
जब पत्रुसन ह्याका स्वाबो तब नुई र्वाबो, “ता ङाः तेम्माई क्युई रह्पा, कि प्रभुई जेँन दुत फेप्पे हेरोद झलीन ल्हालै, रे यहूदीवजै तै खेसुम खेँ मन पुरूलम ङाः छुतकरा बिम्बो।”
अन ल्होई पत्रुसग क्युई रामी, नु यूहन्ना, सू मर्कुस यङ र्वानान नुन मा मरियमन यिम होई। स्या सिमि लै जोमजोम सोअतापाई ङ्याह्। पत्रुसजै झला कुल्तौ रोदा मिह्न्न राङ्मा झला पोङ्मः स्वाबो। पत्रुसन केह्ः स्योःमी अन स्याङस्याङ झलाई मपोङ्रे झिङ धालैधालै होई “पत्रुस झलाः थाङथाङ छ्युङ्पा ङ्याह्” र्वार्वा ल्होन बिम्बो। जेङ्नै ख्युई नू र्वाबो, “ना युङ्मा जेङ्पौ।” जेङ्नै नुई र्वापा ल्होई तेम्माई जेङ्पा र्वार्वा नुई धिप्पी खेबो। तब ख्युई र्वाबो, “अन नुन स्वर्गदुत जेम्तौ।”
जेङ्नै पत्रुसजै चन कुल्पाकुल्त्वा खेबो। झला पोङ्तौ नू रङरङ ख्यु हालाईबो। पत्रुसजै “तै मर्वारे छ्योवा” र्वार्वा लाह्जै लाःता खेबो, रे प्रभुई नू कुजुई झ्यालखानालै खोलोः छ्यूबो अन ख्युकाङ्मोः स्याप्पो। अन ल्होईन ल्होन याकूब रे घङ बिस्वासी थिक्कोवग भिना र्वार्वा नु स्याह्लै घङपू होई।
नाप रामी पत्रुसग तै रह्पा? र्वार्वा सिपाहीवन घूँ मिह्दा फाईरा रह्पा। हेरोदजै नू फाप्पे मदोतौ, सिपाहीवन छोए सेनसेन ख्युकाङ्मोः सच्चेन आदेस बिम्बो। आलै हेरोद चन यहूदियालै कैसरिया वैवै स्याह्ई छ्युङ्बो।
हेरोद सिपा
हेरोद तुरोस रे सिदोन्न सिमिवन ङ्याबो यामयाम सुतूपा ङ्याह्। ख्यु मोह्ङदी राह्राह् नुन स्याह् स्वाबो, रे झलीन झिङन कर्मचारी बलस्तसन ङ्याबो चापलुसी खेखे दिचेन भिह्तु छ्याःफुल्बो। तैङर्वाङिन ख्युन देस साईन भिह्तु झलीन देसग निर्भर ङ्याह्।1
तोकि खेपान दिनग झलीन घोलाङ गोनगोन हेरोद नुन सिङ्हासनग छ्युङ्बो, रे सिमिकाङ्मोः नुई भासन बिम्बो। सिमिव “अन ता लान ल्होई जेङ्पा, सिमिन नङ्पा!” र्वार्वा फाईरा खेबो। जेङ्नै परमेस्वरन प्रसङ्सा मखेपान कारन मन्नै भेला प्रभुन स्वर्गदुतदीजै नू फ्याङ्बो, रे खोल-खोल भु राह्राह् नु सिबो।2
जेङ्नै परमेस्वरन केह्ः छार्यङ रे फेलैफेलै होई। बरनाबास रे साऊल जेँन सेवान धोन पुरा खेखे यरूसलेमलै होल्बो। आलै ख्युन ङ्याबो मर्कुस र्वानान यूहन्ना रे होई।
Source notes (2)
- Cross-reference १ झली ५:११; इज २७:१७
- Cross-reference दान ५:२०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.