Kaike Standard Traslation
प्रे 11
पत्रुसन रिपोत यरूसलेमन मन्दली
यहूदियाग ङिह्पा प्रेरित रे बिस्वासी थिक्कोवजै यहूदीन खोलोःन सिमिवजै र्वार्वा परमेस्वरन बचन स्वीकारी खेदँ र्वानान ताह्बो। जब पत्रुस यरूसलेमग स्वाबो, तब खतना खेनानवन मोह्ङजै नू झाःम र्वार्वा खागे खेबो, “यहूदी बिस्वासीवन ङ्याबो वैवै ख्युन ङ्याबो नाई तैङ झापा थुङ्पा?” तब पत्रुसजै ङूलै ख्युकाङ्मोः र्वामः जाःबो:
“ङा जोप्पा सहरग सोअताप यङ ङ्याह्, रे दर्सन ङ्याह्, तब ती किम तन्नालैम लिब्रुङक्याँ जुङ्जुङ् स्वर्गलै पोँ घ्यापा तयाः ङै दर्सनग रङ्पा, रे अन ङन ङ्याबो स्वाबो। ङै लः खेखे सेन्तौ स्याह् पिर्थीबिन भस्त रे तप्लन भस्तव, स्युस्स्युई लेन्नान्न परानी रे पान्नाङन युजुव रङ्पा। ङा झाम र्वापा केह्ःदी ङै ताह्पा, ‘पत्रुस च्याँ, रे सस्सै झा।’ जेङ्नै ङै र्वापा, ‘नङ्पा प्रभु, ङै तये अपबित्र आथबा बाःपा झानान्न माल हातौयै झापा मीपा।’” “जेङ्नै मन केह्ःजै ङेरेप स्वर्गलै ङाः र्वाबो, ‘तै परमेस्वरजै छाङ्म दोङ्पा ङ्याह् मनग ना बाःपा नछुवा।’” सुमरेप झामै रह्पा, रे मन पुरू ह्याङ स्वर्गः वप्पो। “अन्नै भेला कैसरियालै ङन ङ्याबो फेप्पा सिमि सुमपाव ङा छ्युङ्पा यिम स्वा ताप्पो। कनकन मखेरे ख्युन ङ्याबो वया र्वार्वा ङाः पबित्र आत्माई र्वाबो। अन थिक्कोव रुपाई ङन ङ्याबो जाःपा ङ्याह्, रे ङि मन सिमिन यिम जाःपा। नुई ङ्योअग स्याप्पो, कि ती स्वर्गदुत नुन यिम थाङ्थाङ् छ्युङ्पाग झाम र्वापा नुई रङ्बो, ‘जोप्पाः सिमि फेप्पे पत्रुस र्वानान सिमोनग घ्वाम फेरा। नुई नाः बचन स्यान्नान ङ्याह्, सुन लम ना रे नान पयार पुरूजै उद्धार देन्नान ङ्याह्।’ जब ङै ल्होई र्वामः जाःपा, तब ङू ङिन लाह्ः लिप्पा लैम पबित्र आत्मा ख्युन लाह्ः रे लिप्पो। तब प्रभुई र्वापान अन बचन ङा नावा रह्पा, ‘यूहन्नाई ता त्युई बप्तिस्मा बिम्बो, जेङ्नै पबित्र आत्माग ङेन बप्तिस्मा राह्नान ङ्याह्।’ प्रभु येसू मसिहन लाह्ः बिस्वास खेतौ परमेस्वरजै ङ्योअग कन बर बिम्बो, यहूदीन खोलोःन सिमिकाङ्मोः अनै बर बिम्मी परमेस्वरग काःतैनान ङा सु जेङ्पा?” अन ल्होई ताह्मी ख्यु तै मर्वारे छ्युङ्बो, रे झाम र्वाईर्वाई ख्युई परमेस्वरन महिमा खेबो, “ता ता परमेस्वरजै यहूदीन खोलोःन सिमिकाङ्मोः जिन्दगीन पत घ्योप्पा खेचेन मौका बिन्दँ।”
एन्तिओखियाग मन्दली
स्तिफनसन भेलाः सुरु रह्पा तूरिन कारन खास्या पुरू फेल्पावजै घङग नङ्पा, जेङ्नै यहूदीकाङ्मोः मात्र केह्ः ताह्फेरैफेरै, फोनिके, साइप्रस रे एन्तिओखियाथाल तूह्बो। जेङ्नै ख्युन बर्ग कान-कान साइप्रस रे कुरेनीन सिमिव ङ्याह्। ख्युई एन्तिओखियाग स्वास्वा यहूदीन खोलोःन सिमिकाङ्मोः प्रभु येसुन ल्होन् लः ताह्फेप्पो। अन्नकारन प्रभुन सक्ति ख्यु ङ्याबो रह्पान कारन लैःजै बिस्वास खेबो रे घ्योप्पा खेखे प्रभुक्याँ होल्बो।
अन ल्होन यरूसलेमग रह्पा मन्दलिजै ताह्बो, रे ख्युई बरनाबासग एन्तिओखियाः फेप्पो। नु स्याह् स्वास्वा परमेस्वरन दया रङरङ स्याङ्बो, रे पुरूग सम पुरूजै प्रभुक्याँ बिस्वासी रह्पाई छ्योवा र्वार्वा प्रोत्साहन बिम्बो। तैङर्वाङिन बरनाबास लः, पबित्र आत्मा रे ङोत्वा बिस्वासी सिमि ङ्याह्। सिमिव मोङ किम प्रभू पोह्न रह्पा।
तब साऊलग फाम्म बरनाबास तार्तसग होई। जब नुई नू धोबो तब नू एन्तिओखियाग सप्पो। तब पुरा ती परान बेर मन्दलिन सिमिवन ङ्याबो ख्युई दोःचे खेपाई छ्युङ्बो, रे सिमिवन मोङ किमग लह्म्बो। चेलाव पहिली एन्तिओखियागै इसाही रह्बो।
अन्तौ कान भबिस्यबक्ताव यरूसलेमलै एन्तिओखिया स्वाबो। ख्युन बर्ग अगाबस मिह्न्न ती सिमि च्याङच्याङ सन्सार पुरूग अनिकाल किम राम जाःपा ङ्याह् र्वानान पबित्र आत्मालम भबिस्यबानी र्वाबो। अन अनिकाल क्लौदियसन पाली रह्पा। तब चेला पुरूवजै जे-जेँन औगात अन्सार यहूदिया छ्युङ्नान थिक्कोवग फुरी खेचेन भिह्तु भेती कोर्चे पक्का खेबो। ख्युई झामै खेबो, आलै बरनाबास रे साऊलन लाह्ःलम ख्युन भेती ताङ्बोन अगुवावन स्या फेप्पो।
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.