Kaike Standard Traslation
प्रे 10
पत्रुस रे कर्नेलियस
कैसरियाग कर्नेलियस मिह्न्न ती सिमि ङ्याह्, सु रोम इतालिया मिह्न्न पल्तन्न ती अफिसर ङ्याह्। नु परमेस्वरन भक्त ङ्याह्, नु रे नुन पयार पुरूजै परमेस्वरग ङिह्ङ्ङ। नुई त्वापाकाङ्मोः दया खेखे दान बिमबिम परमेस्वरग एकुरो सोअताप्ङ। नुई ङिजे तिन बजेरा दर्सनग लः खेखे परमेस्वरन ती स्वर्गदुत जेँक्याँ स्वास्वा झाम र्वापा ताह्बो, “कर्नेलियस।” नुई ङिनङिन नू लः खेखे सेह्म्बो रे र्वाबो, “प्रभु, र्वा।” आलै स्वर्गदुतजै नू र्वाबो, “नान सोअताप रे बिखारीकाङ्मोः बिम्पा दान नावान रुपग परमेस्वरन ङू ताप्पा ङ्याह्। ता सिमिकाङ्मोः जोप्पा सहरग फेरा, रे पत्रुस र्वानान सिमोनग घ्वाम फेरा। नु फोन्न धोन खेनान सिमोन्न स्या छ्युङ्पा ङ्याह्, सुन यिम समुन्द्रन नाः ङ्याह्।” जब नुन ङ्याबो ल्होई र्वानान स्वर्गदुत होई, तब नुई जेँन राङ्पावन बर्ग ङेपा रे एकुरो नुन सेन्चे खेनान भक्त सिपाहीदीग स्वा र्वाबो, रे ख्युकाङ्मोः ल्होई पुरू स्यापस्याप जोप्पाः फेप्पो।
नाप्चे ङिजे बार बजेरा ख्यु सुम्पा जोप्पा सहरन रह्म्म स्वा ताप्पो, मन्तौ पत्रुस यिमन ल्हुपग सोअताप्मः बरन्दा लिप्पो। नु गुसिबो, रे नुई तयाः झासुम खेबो, जेङ्नै घङवजै ङ्योप्पा दोङैदोङै छ्युङ्तौ नुई दर्सन रङ्बो। नुई पान्नाङ पोङ्बो, रे स्याह्लै कोप्चा लिब्रुङग खीपा तन्नालैम तयाः पिर्थीबिक्याँ घ्यापा यङ रङ्बो। मन तन्नाग पिर्थीबिन तैस्याङ पुरून ल्हे ली ङिह्पा भस्त, स्युस्स्युई लेन्नान्न परानी रे पान्नाङन युजुव ङ्याह्। तब नुई ती केह्ः ताह्बो, “ए पत्रुस च्याँ, रे सस्सै झा।” जेङ्नै पत्रुसजै र्वाबो, “नङ्पा प्रभु, तैङर्वाङिन ङै हातौयै अपबित्र आथबा बाःपा तये झपा मीपा।”1 नुई मन केह्ः ह्याङ ङेरेप ताह्बो, “परमेस्वरजै तै छाङ्म दोङ्पा ङ्याह् मनग ना बाःपा नछुवा।” सुमरेपथाल झाम रह्पा, रे तुरुन्तै अन तन्ना स्वर्गक्याँ वप्पो।
जब पत्रुस जेँजै रङ्पान अन दर्सन्न अर्थ तै जेअँ र्वार्वा समसमग अकमक्क रह्पा ङ्याह्, मन्नै भेला कर्नेलियसजै फेप्पान सिमिव सिमोन्न यिम फारैफारै झलान ङू च्याङ्बो, “पत्रुस र्वानान सिमोन स्यीह् छ्युङ्नौ?” र्वार्वा केह्ः किम खेखे लोप्पो।
जब पत्रुस दर्सन्न भारेः नावा खेपाई ङ्याह् तब पबित्र आत्माई नू र्वाबो, “सेह्ना, सिमि सुमपाई नाः फारैफारै छ्युङ्पा ङ्याह्। च्याङच्याङ पोँ वया, रे कनकन मखेरे ख्युन ङ्याबो जाः, तैङर्वाङिन ख्युकाङ्मोः ङै फेप्पा जेङ्पा।” तब पत्रुस पोँ लिप्पो, रे मन सिमिवन ङ्याबो वैवै र्वाबो, “सेह्ना, ङेनजै फापा सिमि ङाई जेङ्पा। ङेन स्यीह् तैङ स्वापा?”
ख्युई र्वाबो, “अफिसर कर्नेलियसजै नाः नुन यिम घ्वाम फेप्पा जेङ्पा।” नु वाम्पा रे परमेस्वरग ङिन्नान यहूदी पुरू लम सम्मान देप्पा सिमि जेङ्पा, रे ङेनलम ल्होन् ङ्यानाःयो र्वार्वा पबित्र स्वर्गदुतदीलम नू आदेस देप्पा ङ्याह्। तब नुई ख्युकाङ्मोः झिङ स्वा र्वार्वा ख्युन स्वागत-सत्कार खेबो। नाप्चे पत्रुस च्याङच्याङ ख्युन ङ्याबो होई, रे जोप्पान कान बिस्वासी थिक्कोव नुन ङ्याबो जाःबो। दानाप ख्यु कैसरिया ताप्पो। जेँन क्यालाकिप्पाव रे जेँन फुरीकाङ्मोः स्वा र्वार्वा यिम रूरू कर्नेलियसजै पत्रुसग कूपाई छ्युङ्पा ङ्याह्। पत्रुस स्वास्वा झिङ जाःतौ कर्नेलियसजै नुन ल्हे ध्वाः खेबो। जेङ्नै पत्रुसजै नू झाम र्वाईर्वाई सोल्बो, “च्याँ, ङा रे सिमिदी जेङ्पा।” तब पत्रुस नुन ङ्याबो ल्होई र्वाईर्वाई यिमन झिङ होई, रे स्या नुई लै सिमि जोम्पा रङ्बो। तब पत्रुसजै ख्युकाङ्मोः र्वाबो, “यहूदीन खोलोःन सिमिन ङ्याबो सङ खेचे, आथबा ख्युकाङ्मोः दोःचे ती यहूदीन पत हाति अलः जेङ्पा र्वानान ल्होई ङेनकाङ्मोः क्युई मया। जेङ्नै परमेस्वरजै ङा सिमि सुई र्वार्वा अपबित्र आथबा बाःपा नछुवा र्वार्वा थम्पा ङ्याह्। अन्नकारन कताङ्लुङमिम सङ्का तये मखेरे ङा ङेन स्या स्वापा। ङेनजै ङा तैङ घ्वापा? ता र्वा।” तब कर्नेलियसजै र्वाबो, “सुमङीन ङू क्वाईमाल्ला: अन्नै भेला यिम ङा तिन बजेन सोअताबाईताबाई छ्युङ्पा ङ्याह्, तब साल्म घोलाङ च्योम्पा सिमि ती ङन ङू च्याङ्बो, आलै र्वामः जाःबो, ‘कर्नेलियस, परमेस्वरजै नान सोअताप ङ्याम्पा ङ्याह्, रे नाई बिखारीकाङ्मोः बिम्पा दान्न नावा खेपा ङ्याह्। अन्नकारन जोप्पाग सिमि फेप्पे पत्रुस र्वानान सिमोनग घ्वाम फेरा। नु समुन्द्र नाः फोन्न धोन खेनान सिमोन्न यिम छ्युङ्पा ङ्याह्।’ तब ङै तुरुन्तै नान स्या सिमि फेप्पा, रे ना दया खेखे स्वाबो। ता प्रभुलम नाः र्वापा ल्होई पुरूव ङ्याम्म ङि पुरू परमेस्वरन ङू स्यीह् स्वापा ङिह्पा।”
पत्रुसन भासन
तब पत्रुसजै ल्होई र्वामः जाःबो, “तेम्माई ङा रँ, कि परमेस्वरजै छ्योवा मरुप्नान,2 जेङ्नै सिमि पुरू नुन ङ्याबो ङिह्ङ्ङ, रे धोन लः खेँ, अन नुन ङू स्वीकारी खेचेन पत सम स्योरस्योर राह्नान। परमेस्वरजै इस्राएलीकाङ्मोः कोर्पान लोन, आथबा मसिहलम ताह्फेप्पा किम्मन ल्होन् लः ङेनकाङ्मोः क्युई ङ्याह्। (येसु र्वार्वा पुरून प्रभु जेङ्पा।)3 बप्तिस्मा बिन्नान्न यूहन्नाई ताह्फेप्पा बप्तिस्मान ङिक, गालील प्रदेसलै सुरु खेखे पुरू यहूदिया देसभरि ताह्फेप्पान बचन अनै जेङ्पा, कि परमेस्वरजै नासरतन येसू पबित्र आत्मा रे सक्तिजै अभिसेक खेबो। नु धोन ल खेयङ रे सैतानलम तेपफाम्पा सिमिकाङ्मोः सिम दोङैदोङै ल्हेम्बो, तैङर्वाङिन परमेस्वर नुन ङ्याबो ङ्याह्।” “आलै नुई यहूदीवन देसग रे यरूसलेमग खेपा तैस्याङ पुरून ङि साँचि जेङ्पा। नू ख्युई क्रुसग चुनचुन यङ सह्प्पो।4 नू परमेस्वरजै सुमङीग सम्पु दोङदोङ सोल्बो, रे नू सिमिवन ङू थम्बो, सिमि पुरूग नङ्पा, जेङ्नै ङि सू परमेस्वरजै साँचिन रुपग फाप्पो, रे नु सिपालै सम्पु रामी ङ्योअजै नुन ङ्याबो झपा थुङ्पा। नुई ङ्योअग सिमिवन घूँ ताह्फेम्मः, आलै नु सम्पु रे सिह्पावन न्यायकर्ता राम परमेस्वरलम दम्पा सिमि जेङ्पा र्वानान्न साँचि भिना र्वार्वा कोपा ङ्याह्। भबिस्यबक्ता पुरूवजै नुन साँचि बिम्पा ङ्याह्, कि येसुन लाह्ः बिस्वास खेनान पुरूजै नुन मिह्न्न सक्तिलम तीपान माफ देन्नान।”5
यहूदीन खोलोःन सिमिवजै पबित्र आत्मा देप्पा
पत्रुसजै अन ल्होई र्वातौ र्वातौ केह्ः ङ्यान्नान पुरून लाह्ः पबित्र आत्मा लिप्पो। यहूदीन खोलोःन सिमिवन ल्हाः यङ पबित्र आत्मान वर हाल्पा रङरङ पत्रुसन ङ्याबो स्वानान यहूदी बिस्वासीव हालाईबो। तैङर्वाङिन घङ ल्होईग ल्होई र्वार्वा ख्युई परमेस्वरन प्रसङ्सा खेपा ख्युई ताह्बो। तब पत्रुसजै र्वाबो, “ङि लैम पबित्र आत्मा देन्नान अजोवग त्युन बप्तिस्मा देच्चेलै सुई काःतैनौ?” आलै नुई ख्युकाङ्मोः येसू मसिहन मिह्नग बप्तिस्मा भिना र्वार्वा र्वाबो। तब ख्युई पत्रुसग खजिर्या स्याह्ई छ्योवा र्वार्वा छ्याःफुल्बो।
Source notes (5)
- Cross-reference लेवी ११:१-४७; यहो ४:१४
- Cross-reference कानुन १०:१७; २ इति १९:७
- Cross-reference भजन १०७:२०; १४७:१८; यसै ५२:७; नहू १:१५
- Cross-reference कानुन २१:२२-२३
- Cross-reference यसै ३३:२४; ५३:५-६; यर ३१:३४; दान ९:२४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.