Skip to content
BibleKenya

Kaike Standard Traslation

प्रे 9

साऊलन मुक्ति

(प्रे २६:६-१६; २६:१२-१८)

साऊल प्रभुन चेलावन बिरोधग हेँदिरि सच्‌चेन धम्की भिनैभिनै प्रधान पुजारीन स्याह् होई, रे नुई मन लम्न चोलोङ्चा रा या चिमिचा, सू धोनै ख्युकाङ्मोः खीखी यरूसलेमग सच्‌चे धेराःयो र्‌वार्‌वा दमस्कसन आराधनालयवन मिह्‌नग पुर्जी तोल्बो। जब साऊल तूतौ दमस्कसन ङेमः ताप्पा, तैमेग स्वर्गलै ती ताह्‌म नुन धेँवछोँ चम्कि रह्पा। नु साः घ्याबो, रे नुई झाम र्‌वानान केह्ः ताह्बो, “साऊल, साऊल, ना तैङ ङा तेपफाम्बो?” नुई र्‌वाबो, “प्रभु, ङेन सु जेङ्पा?” आलै नुई र्‌वाबो, “ङा येसू जेङ्पा, सू ना तेफाफाङ्‌ङ। जेङ्नै च्याङच्याङ सहरग वया, रे नाई तै खेत्वानान अन नाः स्यान्नान ङ्याह्।”

नुन ङ्याबो यात्रा सिमिवजै केह्ः चन ताह्बो, जेङ्नै सुई र्‌वार्‌वा मरङरङ तै मर्‌वारे थाङथाङ छ्युङ्बो। तब साऊल सालै च्याङ्बो रे मी पोङ्तौ नुई तये मरङ्नान रह्पा, रे ख्युई नुन लाह् जुङ्जुङ् र्‌वार्‌वा नू दमस्कसग सप्पो। आलै नु सुमङी थाल रङ मतैबो, रे न ता झबो न थुङ्बो। दमस्कसग हननिया मिह्‌न्न ती चेला ङ्याह्। नू प्रभुई दर्सनग र्‌वाबो, “ए हननिया।” नुई र्‌वाबो, “हई प्रभु।” तब प्रभुई नू र्‌वाबो, “च्याँ, रे ‘सीधा’ मिह्‌न्न गल्‌ली वया, रे स्याह् यहूदान यिम साऊल मिह्‌न्न तार्तसग छ्युङ्नान सिमी फारा, तैङर्‌वाङिन नु सोअताबाईताबाई छ्युङ्पा ङ्याह्। नुई दर्सनग हननिया मिह्‌न्न ती सिमि झिङ स्वास्वा नुई देच्‌चे धेरायो र्‌वार्‌वा जेँन लाह्ः नुन लाह् नाम्पा रङ्पा ङ्याह्।”

जेङ्नै हननियाजै र्‌वाबो, “प्रभु, अन सिमिवजै यरूसलेमग ङेन पबित्र सिमिकाङ्मोः अलः लै खेपा ङ्याह्, अन ङै लै सिमिलम ताह्पा ङिह्पा। स्यीह् यङ नान मिह्‌न वन्नान पुरूग ज्यालग काचेन आङ ङोत्वा पुजारीवलम नुई देप्पा ङ्याह्।” जेङ्नै प्रभुई नू र्‌वाबो, “वया, तैङर्‌वाङिन यहूदीन खोलोःन सिमिव, झलीव रे इस्राएलन सिमिन ङू ङन मिह्‌न ताह्फेम्मः नु दम्पा ङन ती पात्र जेङ्पा, तैङर्‌वाङिन ङन मिह्‌न्न भिह्तु नुई हाति तूरि हुरत्वानान, अन ङा नु थन्नान ङ्युँ।” तब हननिया वैवै मन यिमन झिङ जाःबो, रे नुन लाह्ः जेँन लाह् नान्नान र्‌वाबो, “भाइ साऊल, कन प्रभु येसू ना स्वापा लम्म नान रह्‌म्म रङ्पा ङ्याह्, नुई र्‌वार्‌वा नाई रङ्चे धेरा रे ना पबित्र आत्माई नाङा र्‌वार्‌वा ङा फेप्पा ङ्याह्।” तुरुन्तै नुन मीलै सोपलैम तयाः छार्बो, नुई ह्‌याङ रङ्चे देप्पो। तब नु च्याङ्बो रे बप्‌तिस्मा वप्पो, आलै ङ्योप्पा झाझा नुई तोप देप्पो। साऊल खजिर्या दमस्कसग रह्पा चेलावन ङ्याबो छ्युङ्बो।

दमस्कसग साऊलजै ताह्फेप्पा

आलै तुरुन्तै नुई आराधनालयवग येसुन भारेः झामखेखे ताह्फेप्पो, “नु परमेस्वरन ङोह्जो जेङ्पा।” तब ताह्‌नान भरि पुरूजै हालाईलाई र्‌वाबो, “अन मिह्‌न वन्नान पुरूग यरूसलेमग मीपा दोङ्नान रे स्याह्ई ख्युकाङ्मोः खीखी ङोत्वा पुजारीवन ङ्याबो वस्सुमजै स्वानान अनै नङ्पा तै?” जेङ्नै साऊल हेँ ह्‌याल्म सक्तिसाली राईराई होई, रे येसुई मसिह जेङ्पा र्‌वानान पर्मान बिमबिम दमस्कसग छ्युङ्नान यहूदीकाङ्मोः तये र्‌वा मतैनान दोङ्बो।

आलै दिन लै वैमी यहूदीवजै दीदी नू सच्‌चेन सदेन्त्र दोङ्बो। जेङ्नै ख्युन सदेन्त्र साऊलग क्युई रह्पा। ख्यु नू सह्‌म्मः ङिमछाम सहरन झलावग कुकु छ्युँ। जेङ्नै नुन चेलावजै नू छान्जेई थामग काह्‌का पेःलै पोँ साःबो।

साऊल यरूसलेमग

यरूसलेम होल्मी साऊल प्रभु येसुन चेलावन ङ्याबो दिचेन फाप्पो। जेङ्नै चेलाव साऊलग ङिह्‌म्बो तैङर्‌वाङिन नु तेम्माई प्रभुन चेला जेङ्पा र्‌वार्‌वा ख्युई बिस्वासै खे मतैबो। जेङ्नै बरनाबासजै नू ङ्याबो वव्वै प्रेरितव ङ्याबो वप्पो। आलै साऊलजै प्रभू लमग रङ्पा रे प्रभु नुन ङ्याबो ल्होई र्‌वापा रे नुई दमस्कसग हिम्मत खेखे येसुन मिह्‌नग ताह्फेप्पा ल्होई ख्युकाङ्मोः स्याप्पो। साऊल यरूसलेमग ख्युन ङ्याबो ङ्याबोई हाकाहाकि ल्हेम्म जाःबो, रे मङिनङिन प्रभुन मिह्‌नग ताह्फेम्मः जाःबो, आलै नु यहूदीन खोलोःन सिमिव ङ्याबो खासे खेँ, जेङ्नै ख्युई नू सच्‌चे फाङ्‌ङ। जेङ्नै अन क्युई राह्‌राह्‌ बिस्वासी थिक्‌कोवजै नू कैसरियाग सप्पो रे स्याह्‌लै नू तार्तसग फेप्पो।

मन्न छाम्म यहूदिया, गालील रे सामरिया छेत्रग ङिह्पान मन्दलि पुरूवग किम्म रह्बो। प्रभुन चेलावजै पबित्र आत्मालम हिम्मत देप्पो रे मन्दलिन उन्नति रह्बो। चेलाव परमेस्वरग ङिनङिन ल्हेङ्‌ङ रे सिमिव यङ पोह्‌न राईराई होई।

पत्रुस लुद्‌दा रे जोप्पाग

पत्रुस धेँवछोँन ठाउँ पुरूग तुह्ईतुह्ई लुद्‌दाग ङिह्पान परमेस्वरन पबित्र सिमिवन स्याह् यङ स्वा ताप्पो। नुई स्याह् एनियास मिह्‌न्न कान सिमिदिग धोबो, सु के परालै ल्हो मगुल्नान्न नाजाई ल्हौग दिम्पा ङ्याह्। पत्रुसजै नू र्‌वाबो, “ए एनियास, येसू मसिहजै नाः ताःफान्नान। च्याँ, रे नान ल्हौ तिह्‌रा।” आलै अन तुरुन्तै च्याङ्बो। लुद्‌दा रे सारोनग छ्युङ्नान भरि पुरूजै नू रङरङ प्रभुक्याँ होल्बो।

जोप्पा सहरग तबीता, आथबा दोरकास (हरिनी) मिह्‌न्न चेलीदी ङ्याह्। नु धोन लः खेमः रे दान बिम्म जाःङ। अन्तौ नु खङ्‌खङ सिह्बो, रे सिमिवजै नू थुथु ङ्याल्क्यान तलान कोदीग नाह्‌म्बो। लुद्‌दा जोप्पा सहरन ङेमः रह्पान कारन, चेलावजै पत्रुस स्या ङ्याह् र्‌वानान ताह्ताह् नुन ङ्याबो सिमि ङेह्पाः झाःम र्‌वार्‌वा छ्याःफुल्मः फेप्पो, “ङ्योअन स्याह् खम्म स्वा।” तब पत्रुस च्याङच्याङ ख्युन ङ्याबो होई। स्या ताप्मी ख्युई नू ङ्याल्क्यान तलान कोठाः वप्पो। लम्माव पुरू नुन रह्‌म्म थाङथाङ खेखे दामः जाःबो, रे दोरकास ख्युन ङ्याबो रातौ नुई दोङदोङ नाम्पा घोलाङ रे घङ घोलाङ थम्बो। जेङ्नै पत्रुसजै ख्यु पुरूग खोलोः फेप्फे पो जुबो आलै सोअताप्पो, रे मन सिह्पान ल्होक्याँ होलहोल र्‌वाबो, “तबीता, च्याँ!” आलै नुई मी पोङ्बो, रे पत्रुसग रङरङ च्याङच्याङ छ्युङ्बो। नुई नू जेँन ल्हाजै जुङ्जुङ् जुरुक्‌कै सोल्बो, आलै पबित्र सिमिव रे लम्माकाङ्मोः स्वा र्‌वार्‌वा नू सम्पु थम्बो। ता अन ल्होई पुरू जोप्पा भरि ताप्पो, रे लैजे प्रभू बिस्वास खेबो। आलै नु खजिर्यान बेर सिमोन र्‌वानान फोन्न धोन खेनान सिमिदीन ङ्याबो जोप्पाः छ्युङ्बो।

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.