Kaike Standard Traslation
प्रे 8
साऊल मन्दली तेपफाङ्ङ
नू सत्तौ साऊल रे दीपा ङ्याह्। मन्नै लाह्ः यरूसलेमग रह्पा मन्दलिन बिरोधग दुङाल किम सुरु रह्पा, रे प्रेरितव नङ्म ख्यु पुरू यहूदिया रे सामरियान देसग खातत्त्या होई। भक्त सिमिवजै स्तिफनसग वव्वै लुँह्म्बो, रे नुन पत लै समतु खेबो। जेङ्नै साऊलजै मन्दली नोङ फाम्पा ङ्याह्। आलै नुई यिम-यिम जाःजाः चोलोङ्चा रे चिमिचाकाङ्मोः पुरीपुरी वव्वै झ्यालखानाः काँ।
सामरियाग फिलिप
तब मन खातत्त्याग रह्पावजै लिब्रुङ्क्याँ वैवै बचन ताह्फेप्पो। आलै फिलिप चन सामरियान ती सहरग वैवै ख्युकाङ्मोः मसिहन ल्होन् लः ताह्फेप्पो। फिलिपजै र्वापा बचन ताह्ताह् आलै नुई खेपा हालाईचेन धोनव रङरङ, मोह्ङजै ती सम राह्राह् नुन ल्होईग ध्यान बिम्बो। तैङर्वाङिन लै सिमिवलम मुव केह्ः किमै फाईरा खेखे गेङ्ङ जाःबो, रे लै ल्हो मगुल्नान्न नाप्पुवाव रे लुल्याव रे ताःफाम्बो। झामखेखे मन सहरग मिह्दा किम्म रह्पा।
स्या सिमोन मिह्न्न ती सिमि ङ्याह्। नुई ङूलै मन सहरग जादु खेखे सामरियान सिमिकाङ्मोः ताईलुवा दोङ्पा ङ्याह्, रे जेँग ङह् किम जेङ्पा र्वार्वा छूँ। मन सिमी छ्युमलै किमथाल पुरूजै झाःम र्वार्वा ङ्याङ्ङ, “अन सिमि परमेस्वरन अन सक्ति जेङ्पा, कनग मकेकुकेन किम सक्ति र्वानान।” ख्युई नू मानि खेँ, तैङर्वाङिन भेला लैःलै नुई जेँन जादु खेखे सिमिकाङ्मोः ताईलुवा दोङ्पा ङ्याह्। जेङ्नै जब ख्युई परमेस्वरन राज्य रे येसू मसिहन मिह्न्न ल्होन् लः स्यान्नान फिलिपन ल्होईग बिस्वास खेबो, तब चोलोङ्चा रे चिमिचावजै बप्तिस्मा वप्पो। सिमोन जेँजै बिस्वास खेबो। नुई बप्तिस्मा वप्पो, रे अन फिलिपन ङ्याबो सङ खेखेई लुईबो, रे हालाईचेन धोनव, ताईलुवान धोन खेपा रङरङ नू हालाईबो।
सामरियान सिमिवजै परमेस्वरन बचन स्वीकारी खेबो र्वानान ताह्ताह् यरूसलेमग रह्पा प्रेरितवजै पत्रुस रे यूहन्नाः ख्युन ङ्याबो फेप्पो। ख्यु स्या स्वास्वा ख्युई पबित्र आत्मा धेराःयो र्वार्वा सार्बा बिस्वासीवन भिह्तु सोअतापप्पो। तैङर्वाङिन मन्न बेर ख्युन बर्ग सुन लाह्ः यङ नु स्वापा मया। ख्युन बप्तिस्मा प्रभु येसुन मिह्नग रह्पा ङ्याह्। तब पत्रुस रे यूहन्ना जेँन लाह् ख्युन लाह्ः नाह्म्बो, रे ख्युई पबित्र आत्मा देप्पो। ता प्रेरितवजै लाह् नाह्ङ्ङिन पबित्र आत्मा देन्नान जेअँ र्वानान रङरङ सिमोनजै झाम र्वायङ ख्युकाङ्मोः सोह्ङ बिम्म सप्पो, “ङाः र्वार्वा अन सक्ति क, रे ङै सुस्याङ्न ल्हाः ल्हा नाम्मी नुई पबित्र आत्मा धेरायो।”
जेङ्नै पत्रुसजै र्वाबो, “नान सोह्ङ नानै ङ्याबो मीपा रायो, तैङर्वाङिन परमेस्वरन बर सोह्ङजै र्युह् तैनान र्वार्वा नाई सोच खेबो। नाई अन धोन खेचे मदेन्नान। नान अनग न काला ङ्याह् न ता आङ तैङर्वाङिन परमेस्वरन ङू नान सम लः नँह्।1 अन्नकारन नान जेँन अन अलःन पत घ्योप्पा ख्या आलै प्रभू सोअताप फुला, रे हालम नान समन झाम सोच माफ र्हदरा। तैङर्वाङिन ङा रँ, ना खाःपाई नाङ्पा ङ्याह्, आलै तीपान बन्धनग ङ्याह्।”
तब सिमोनजै र्वाबो, “ङेनजै ङन पत प्रभू सोअताप ख्याःयो, रे ङेनजै र्वापा ल्होई तै यङ ङन लाह्ः नताह्ःयो।” आलै ख्युई बयान बिनतामी रे प्रभुन बचन र्वातामी सामरीवन लै नामग ल्होन् लः ताह्फेरैफेरै ख्यु यरूसलेम होल्बो।
फिलिप रे इथियोपियान अधिकृत
आलै प्रभुन ती दुतजै फिलिपग र्वाबो, “च्याङच्याङ ज्याङक्याँ यरूसलेमलै गाजाक्याँ वैनान लम्म वया। स्या मरुभुमीन लम ङ्याह्।” आलै फिलिप च्याङच्याङ होई, रे ती इथीयोपियाली छक्काः धोबो, सु इथियोपिया देसन मकेकुकेन किम झलीमा कन्दाकीन अधिकृत रे क्यु पुरून कोसाध्यछे ङ्याह्। नु यरूसलेमग आराधना खेमः वैपा ङ्याह्। नु होल्चे खेपाई ङ्याह्, रे जेँन तान रथग छ्युङछ्युङ यसैया भबिस्यबक्तान किताबग तोअपाई ङ्याह्। तब पबित्र आत्माई फिलिपग र्वाबो, “वया रे मन रथन ङ्याबो जा।” फिलिप नुन रह्म्म धालैधालै होई, रे नू यसैया भबिस्यबक्तान किताब तोअपा ताह्ताह् नुई लोप्पो, “नाई तोअपा ल्होई हाकोनौ?”
तब नुई र्वाबो, “सुई मर्वारे ङा कुजुई हाकोतैनान?” आलै नुई फिलिपग ता चपचप नुन ङ्याबो छ्योवा र्वार्वा छ्याःफुल्बो। ता नुई तोअपा पबित्रसास्त्रन खन्द अन ङ्याह्, “कुजुई लूपा थुम्म वन्नान, आथबा थुमा मन ठेलान ङू तै मर्वारे छ्युङ्नान, झामखेखेई नुई जेँन ङुर मपोङ्बो। नुन ङान्ज्यान देप्पान भेला नू न्याय मदेप्पो। नुन काल्बान बयान सुई खेचे? तैङर्वाङिन नुन जिन्दगी पिर्थीबिलै तल्बो।”2
तब मन छक्काई फिलिपग र्वाबो, “दया खेखे ङा र्वा, भबिस्यबक्ताजै अन सुन भारेः र्वापा जेङ्पा, नुन जेँनै भारेः कि घङ सुईन भारेः?” तब फिलिपजै जेँन ङुर पोङपोङ पबित्रसास्त्रन अनै खन्दलै नु येसुन ल्होन् लः स्याप्पो। आलै ख्यु लम्म वैतौ वैता ङाई त्यु र्हपुन रह्म्म स्वातबो। मन छक्काई र्वाबो, “सेह्ना, स्यीह् त्यु ङिम्न, ङा बप्तिस्मा वच्चेलै तैजै काःतैनौ?” [ फिलिपजै र्वाबो, “यदि पुरू समजै बिस्वास खेङिन नाई बप्तिस्मा वत्तैनान।” नुई झब बिम्बो “येसू मसिह यङ परमेस्वरन ङोह्जो जेङ्पा र्वार्वा ङा बिस्वास खेनान।”]
फिलिपजै रथ काःफाम्बो, आलै फिलिप रे मन छक्का ङ्योरुम त्युन झिङ जाःबो, रे नुई नू बप्तिस्मा बिम्बो। जेङ्नै जब ख्यु त्युलै खोलोः लिपलिप स्वाबो, तब प्रभुन आत्माई फिलिपग जुङ्जुङ् वप्पो, रे मन छक्काई फिलिपग ह्याङ मरङ्बो, रे मन स्याङैस्याङै जेँन लम्म जाःबो।3 जेङ्नै फिलिप अस्दोदग रङ्बो, रे कैसरिया मताप्न बेर सहर पुरूग ल्होन् लः स्याईस्याई होई।
Source notes (3)
- Cross-reference भजन ७८:३७
- Cross-reference यसै ५३:७-८
- Cross-reference १ झली १८:१२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.