Kaike Standard Traslation
प्रे 16
पावल रे सिलासन ङ्याबो तिमोथीन यात्रा
पावल दर्बी रे लुस्त्रागै स्वाबो। स्याह् तिमोथी मिह्न्न चेलादी ङ्याह्। नु बिस्वासी यहूदी चिमिचादीन ङोह्जो ङ्याह्, जेङ्नै नुन पा चन ग्रीक ङ्याह्। लुस्त्रा रे आइकोनियन्न थिक्कोवग नुन मिह्नकै ङ्याह्। तिमोथीग पावलजै ङ्याबो वत्सुम खेबो। मन ठाउँवग छ्युङ्नान यहूदीवन कारनजै खेखे पावलजै नू वव्वै खतना खेबो। तैङर्वाङिन नुन पा ग्रीक ङ्याह् र्वानान ख्यु पुरूग क्युई ङ्याह्। ता ख्यु सहरवन लम राह्राह् वैतौ ख्युई यरूसलेमन प्रेरितव रे ताङ्बोन अगुवावजै खेपा निर्नयव अजोवग ङ्यानाःयो र्वार्वा स्याप्पो। झामखेखे मन्दलिव बिस्वासग ङार्छेम राईराई रे ताँका बात्तै छारैछारै होई।
त्रोआसग पावलन दर्सन
पबित्र आत्मालम एसियाग केह्ः ताह्नफेरा र्वापा राह्राह् पावल रे नुन फुरिव फ्रिगिया रे गलातियान ठाउँव राह्राह् होई। माइसियान सिमानाः स्वामी ख्युई बिनिथिया प्रदेसक्याँ वैसुम खेबो। जेङ्नै येसुन आत्माई ख्युकाङ्मोः वैमफाम्बो। तब माइसिया राह्राह् ख्यु त्रोआसग होई। छान पावलजै ती मङ मङ्बो, माकेदोनियान ती सिमि च्याङच्याङ नू छ्याःफुल्पाई छ्युङ्पा ङ्याह्, “माकेदोनियाः स्वा, रे ङ्योअग सहयोग ख्या।” जब नुई अन दर्सन देप्पो, आलै तुरुन्तै ङि माकेदोनिया वैमः तयार रह्पा। ङ्योअजै अन तेम्माई छुपा कि ख्युकाङ्मोः ल्होन् लः ताह्फेम्मः परमेस्वरजै ङ्योअग घ्वापा जेअँ।
फिलिप्पीग लिदियान सम लःरितपा
तब ङि त्रोआसलै त्युन जहाजग चपचप थारेः सामोथ्राके तापुक्याँ वैपा, रे नाप्चे नियापोलिस स्वा ताप्पा, स्याह्लै माकेदोनियान ङूस्योवान जिल्ला ङोत्वा सहर फिलिप्पी सहरग स्वा ताप्पा। मन सहर चन रोमीवन अधिनग ङ्याह्। स्याह् ङि खजिर्या बेर छ्युङ्पा। ता नाह्न ल्हाः सहरन झलालै खोलोः चाङ्पुन नाः वैपा, तैङर्वाङिन स्याह् सोअताप्पु ङ्याह् र्वार्वा ङ्योअजै छोए खेपा ङ्याह्, रे स्याह् ङि छ्युङ्पा रे जोम्पान चिमिचावन ङ्याबो ल्होई र्वामः जाःपा। आलै थिआतीरा सहरग छ्युङ्नान, बैजनी घोलाङन ब्यपार खेनान लिदिया मिह्न्न परमेस्वरग आराधना खेनान्न चिमिचादीजै ङिन ल्होई ङ्याम्बो। पावलजै र्वापान ल्होई ध्यान खेखे ङ्यानाःयो र्वार्वा प्रभुई नुन सम पोङ्बो। जब नु रे नुन यिमन सिमि पुरूजै बप्तिस्मा वप्पो, तब नुई ङी छ्याःफुल्बो, “यदि ङेनकोजै ङा प्रभुन बिस्वासिनी छुचेन निर्नय खेङिन ङन यिम स्वास्वा छ्योवा।” रे नुई ङी धिप्पी खेबो।
पावल रे सिलास ज्यालग
जब ङि सोअताप्पू वैयङ ङ्याह्, तब ल्हा सेन्नान्न आत्मा अलः ङिह्पान राङ्मा चिमिचादीग ङी दोपा, सुई ल्हा सेनसेन नुन मालिकवन भिह्तु लै कमाइ खेँ। अन पावल रे ङिन ङिङि जाःबो, रे झाम र्वायङ फाईरा खेबो, “अन सिमिव पुरून खेरे किम परमेस्वरन सेवकव जेङ्पा। अजोवजै ङेनकाङ्मोः मुक्तिन लम्न घोसना खेँ।” मन चिमिचाई लै दिन्न बेर झाःम खेपाई छ्युङ्बो। तब पावलजै छरछर ङिक होलहोल मन आत्मा अलःग र्वाबो, “येसु मसिहन मिह्नग ङा नाः नुनलम गेग्गे वया र्वाचे।” आलै मन आत्मा अलः मन्नै भेला गेप्पो।
जेङ्नै नुन मालिकवजै ख्युन कमाईन आस मरह्पा रङरङ पावल रे सिलासग जुङ्जुङ् बजारन चोकग ङोत्वा हाकिमवन स्याह् कानैकानै वप्पो। आलै ख्युकाङ्मोः रोमी सासकवन ङ्याबो सस्सै र्वाबो, “अन सिमिव यहूदी जेङ्पा, अजोवजै ङिन सहरग गोलमाल धोँ।1 अजोवजै झाम-झाम ल्हूलामव लन्नान कन ङि रोमीवन कानुन्न बिरोधग स्वीकार खेचे आथबा ङ्यान्चे लः मह्या।” तब मोह्ङव दीदी पावल रे सिलासग फ्याङ्मः जाःबो। सहरन सासकवजै ख्युन घोलाङ छ्योनछ्योन पप्पो, रे ख्युकाङ्मोः पेर्गाई फ्याङ फाम्बो। ख्युई पावल रे सिलासग लै पेर्गाई फ्याङ्मी ख्युकाङ्मोः ज्यालग कबो, रे ज्यालखानान सासकग अन झ्यालखानाः त्यापा सिमिकाङ्मोः लः खेखे सेह्ना र्वार्वा आदेस बिम्बो। झाम आदेस देद्दे नुई ख्युकाङ्मोः झ्यालखानान झिङक्याँ वव्वै ख्युन ल्हे ठिँगुरो थीङ्थिङ नाह्म्बो।
जेङ्नै छानफेग पावल रे सिलास सोअताबाईताबाई परमेस्वरन धेन धेपाई छ्युङ्पा ङ्याह्, रे घङ झ्यालखानाः त्यापान सिमिवजै अन ङ्याम्पाई छ्युङ्पा ङ्याह्। तब हतपत ती किम साँगुल होई, रे झ्यालखानान जगव दार्बो, रे तुरुन्तै झलाव पुरू पोङ्बो, रे पुरून खीपाव पोङ्बो। ज्यालखानान सासक मिवालै साप्पो, रे ज्यालखानान झलाव पोङ्पा रङरङ झ्यालखानाः त्यापा सिमि पुरूव ज्यार्तदँ र्वार्वा छुछु नुई हत्या खेसुमजै जेँन तरवाली छ्यूबो। जेङ्नै पावलजै केह्ः छाम खेखे झाम र्वायङ फाईरा खेबो, “नाई जेँग हानि तये नख्या, तैङर्वाङिन ङि पुरू स्यीह्ई ङिह्पा,”
तब बत्ती तोल्तोल् नु बोरैबोरै झिङ स्वाबो, रे ङिनङिन दारैदारै पावल रे सिलासन ङू खल्बु क्याप्पो। ख्युकाङ्मोः नुई खोलोः सस्सै र्वाबो, “गुरुज्यू उद्धार देच्चेन पत ङै तै खेत्वानान?”
आलै ख्युई झब बिम्बो, “प्रभु येसू मसिहग बिस्वास ख्या, आलै ना रे नान पयारजै उद्धार देन्नान ङ्याह्।” ख्युई नू रे नुन यिम रह्पा भरि पुरूग प्रभुन केह्ः स्याप्पो। तब छान्न मनै भेला नुई ख्युकाङ्मोः वव्वै भुमा थुबो। आलै नु रे नुन पयारजै तुरुन्तै बप्तिस्मा वप्पो। आलै पावल रे सिलासग यिम सस्सै ख्युकाङ्मोः ङ्योप्पा बिम्बो, रे परमेस्वरग बिस्वास खेबो र्वानान ल्होईग नुन पयार पुरून ङ्याबो नु स्याङ्बो।
जेङ्नै नम नाङ्मी रोमन सासकवजै सिपाहीकाङ्मोः अन आदेस बिमबिम फेप्पो, “ख्युम फेरा।”
तब ज्यालखानान सासकजै पावलग अन ल्होई स्याप्पो, “सहरन सासकवजै ङेनकाङ्मोः फेच्चेन आदेस बिम्पा ङ्याह्। अन्नकारन ता गेग्गे किम्म खेखे वया।”
जेङ्नै पावलजै ख्युकाङ्मोः र्वाबो, “ङि रोमी सिमी दोसी ठहर्याई मखेरे ख्युई सिमिवन ङू फ्याङ्बो, रे झ्यालखानाः र्वार्वा कह्बो, रे ता ङ्योअग फाक छ्यूचे फाङ्ङ? अन रा मतैनान। रोमी आङ खेनान्न सिमि जेँ स्वायो रे ङ्योअग छ्युछ्यु होराःयो।” मन सिपाहीवजै सासककाङ्मोः अन ल्होई स्याप्पो। ख्यु ता रोमी सिमि जेअँ र्वानान ताह्ताह् ख्यु ङिह्म्बो। ख्युई स्वास्वा पावल रे सिलासन ङ्याबो माफ तोल्बो, रे ख्युकाङ्मोः खोलोः वप्पो रे सहर ख्योवाख्योवा वया र्वार्वा छ्याःफुल्बो। ख्यु झ्यालखानालै खोलोः गेग्गे लिदियान यिम होई, रे बिस्वासी थिक्कोवन ङ्याबो दोःचे खेमी ख्युकाङ्मोः प्रोत्साहन बिमबिम होई।
Source notes (1)
- Cross-reference १ झली १८:१७
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.