Kaike Standard Traslation
प्रे 17
पावल रे सिलास थेसलोनिकेग
पावल रे सिलास अम्फिपोलिस रे अपोल्लोनियान लम राह्राह् थेसलोनिके स्वाबो। स्याह् येहूदीवन ती यहूदीवन आराधनालय ङ्याह्। पावल जेँन बानि अन्सार ख्युन ङ्याबो झिङ होई, रे नाह्न ल्हाः सुमङीन बेर पबित्रसास्त्रलम ख्युन ङ्याबो ल्होई र्वायङ छ्युङ्बो। “मसिहग पक्का तूरि हुर्चे रे सिपालै सम्पु रात्वाङ, रे अनै येसू, सुन ल्होन् लः ङा ङेनकाङ्मोः स्याच्चे, नुई मसिह जेङ्पा” र्वानान ल्होईन धा पोङपोङ पावलजै पर्मानित खेबो। ख्यु बर्ग हातिपा बिस्वास खेखे पावल रे सिलासक्याँ जाःबो। ताँका किमः परमेस्वरन भक्ति खेनान यहूदीन खोलोःन सिमिव रे हातिपा ङोत्वा चिमिचाव रे जाःपा ङ्याह्।
जेङ्नै थादोवाई नाङनाङ यहूदीवजै बजारन अलः सिमिकाङ्मोः रूरू मोङ सोलसोल सहरग फाईरा खेफाम्बो, आलै यासोन्न यिम हमला खेखे पावल रे सिलासग सिमिन ङू सच्चे फाप्पो। ख्युकाङ्मोः लाह्ग थेप मतैतौ, ख्युई यासोन रे कान-कान थिक्कोवकाङ्मोः सहरन ङोत्वा सासकवन स्याह् झाःम र्वार्वा फाईरा खेईखेई पुरीपुरी सप्पो, “सन्सारग गदबद दोङ्नान अन सिमिव स्यीह् रे स्वा ताप्पा ङ्याह्। आलै यासोन्न दम्फु रह्पा ङ्याह्, रे ख्यु पुरूजै येसू र्वानान तीपा घङयङ झली ङ्याह् र्वार्वा कैसरन आदेसन बिरोधग धोन खेँ।” अन ल्होई ताह्ताह् सिमिव रे सहरन ङोत्वा सासकव आत्ती खेबो। ख्युई यासोन रे नुन ङ्याबो रह्पा ह्याजन सिमिवन ङ्याबो धरौती वव्वै ख्युकाङ्मोः फेप्पो।
बेरियाग पावल रे सिलास
बिस्वासी थिक्कोवजै तुरुन्तै पावल रे सिलासग छान्जेई बेरिया फेप्पो, आलै जब ख्यु ताप्पो तब नु यहूदीवन आराधनालयन झिङ होई। बेरियान येहूदीव थेसलोनिकेन सिमिव खेरे ह्याल्म लः ङ्याह्। तैङर्वाङिन अजोवजै यामयाम स्याङ्स्याङ बचन स्वीकारी खेबो, रे मन ल्होईव र्वापालैम जेम कि नम र्वार्वा एकुरो पबित्रसास्त्र तोअतोअ छोए सेह्ङ्ङ। अन्नकारन अजोवन बर्ग लैजे, ङ्याबो लै युनानी खान्दान्न चिमिचावजै रे चोलोङ्चावजै बिस्वास खेबो।
जेङ्नै जब परमेस्वरन केह्ः पावल लम बेरियागै ताह्फेप्पाई ङ्याह् र्वानान थेसलोनिकेन यहूदीकाङ्मोः क्युई रह्पा, तब ख्यु स्या रे मोह्ङग सोल्मः रे बर्ग झाम स्वा ताप्पो। तब बिस्वासी थिक्कोवजै तुरुन्तै पावलग समुन्द्रक्याँ फेप्पो। जेङ्नै सिलास रे तिमोथी चन बेरियागै छ्युङ्बो। पावलग साःमः वैनानवजै नू एथेन्सथाल सप्पो। सिलास रे तिमोथी चन तैन बेर खम्मै नुन ङ्याबो स्वात्वानान र्वानान आग्या देद्दे ख्यु बेरिया होल्बो।
पावल एथेन्सग
पावलजै सिलास रे तिमोथीग एथेन्सग कुकु छ्युङ्तौ, अन सहरग कुई नाङ्पा रङ्रङ आत्माग नु मिह्दा तुँलाक्या रह्बो। अन्नकारन नुई यहूदीव रे परमेस्वरन भक्ति खेनान सिमिवन ङ्याबो आराधनालयग, रे दोपा पुरून ङ्याबो चन बजारन लम्म एकुरो खासे खेँ। इपिक्युरी रे स्तोइकीन ल्हा सेन्नान सिमिवन बर्ग हातिपाई नुन ङ्याबो खाथू खेबो। ख्यु हातिपाई र्वाबो, “अन लही थोअपा तै र्वाङ?” घङवजै र्वाबो, “घङ कान बिदेसि लावन ताह्फेन्नान लैम रँ।” तैङर्वाङिन पावलजै येसू रे सिपालै सम्पु ग्युर्नान्न ल्होईन ताह्फेङ्ङ। तब ख्युई नू अरियोपागसग वव्वै लोप्पो, “नाई बिम्पा अन सार्बा छोए तै जेङ्पा, तै ङि हाकोतैनौ? तैङर्वाङिन ना ङिन नाम्ज्योवाग हालाईचेन ल्होईव स्याप्यङ ङ्याह्। अन्नकारन अन ल्होईन अर्थ तै जेङ्पा ङी हाकोसुम ङिह्पा।” पुरू एथेन्सग छ्युङ्नानव रे स्याह् छ्युङ्नान्न बिदेसिव सार्बा-सार्बा ल्होई र्वामः रे ङ्याम्म नङ्म जेँन भेला घङ धोन तयेग बिताई मखेँ।
पावलजै अरियोपागसन घूँ च्याङच्याङ र्वाबो, “एथेन्सन सिमि हो, ङेनकाङ्मोः ङा ल्होई पुरूग मिह्दा ला तेन्नान रँ, अन सहरग तूतौ ङै ङेनकोन सोल्यापुव यङ रङ्पा। ठाउँदीन भोका फुल्नान्न बेदी ‘मस्योनान्न ला’ सर्पा ङिम्न। ङेनकोजै मस्योरेई सोल्याप्पान नुई परमेस्वरग ङा चोँ ताह्फेन्नान।” “परमेस्वर, सुई सन्सार रे अनग रह्पा तैस्याङ पुरू दोङ्बो, नु पान्नाङ रे पिर्थीबिन प्रभु रह्पान कारन लाह्जै दोङ्पा आराधनालयग मछ्युङ्नान,1 नू चिज तयाः त्वापालैम खेखे सिमिन ल्हालै नुन सेवा रात्वानान र्वार्वा नछुवा। तैङर्वाङिन नुई र्वार्वा पुरूग झुनी, ऊ रे तैस्याङ पुरू बिन्नान। नुई तीपा लम लै सिमि पिर्थीबी छ्युङ्मः जाति पुरून सिमि दोङ्बो। ख्युन लुईत्वानान्न भेला रे अन्त्यन दिन यङ तोकि खेबो,2 सिमिवजै नू फाम्मः रे छामछुम खेखे देत्तयाःयो र्वार्वा नुई झाःम खेबो। जेङ्नै परमेस्वर ङि स्याह्लै ग्याङ्म मह्या।3” तैङर्वाङिन “ङि नुग सोन्नान, रे नुग स्याङ्नान रे नुग ङिन अस्तित्व ङिह्पा।” ङेन जेँनै कबिवजै र्वापा ङ्याह्, “ङि तेम्माई नुनै सन्तान जेङ्पा।” “तब ङि परमेस्वरन सन्तान रह्पान कारन, परमेस्वर मर, मुल आथबा लुङलैम जेङ्पा र्वार्वा ङी छुचे नङ्पा। अजोव चन सिमिन सिप रे छोएन प्रतिरुप मात्र जेङ्पा।4 झाम क्युई मीपान भेलाः परमेस्वरजै ध्यान मबिम्बो, जेङ्नै ता ठाउँ पुरूग सिमिकाङ्मोः पुरू तीपान लमलै सम होल्मः घ्योप्पा खेफान्नान। तैङर्वाङिन नुई दिन ती तोकि खेपा ङ्याह्, कन दिन नुई जेँजै दम्पा तीपा सिमिलम धर्मी सोभाऊग सन्सारन न्याय खेनान ङ्याह्। नू सिपालै समपु दोङदोङ नुई पुरू सिमिकाङ्मोः अन्न पर्मान बिम्पा ङिह्पा।”5
जब पावललम ख्युई सिपालै सम्पु ग्युर्नान्न भारेः ताह्बो, तब कान-कानजै नू खिसि खेबो। जेङ्नै घङवजै चन “ङि ह्याङ अन भारेः नान ल्होई ङ्यान्नान ङिह्पा” र्वाबो। आलै पावल ख्युन जोम्पालै होई। जेङ्नै कान सिमिव नुन ङ्याबो जाःबो, आलै बिस्वास खेबो। ख्युन बर्ग अरियोपागसन सदस्य दियनुसियस, दामारिस मिह्न्न चिमिचादी, रे यहूदीन खोलोःन सिमिव रे ङ्याह्।
Source notes (5)
- Cross-reference १ झली ८:२७; यसै ४२:५; प्रे ७:४८; २ इति ६:१८; भजन १४६:६
- Cross-reference कानुन ३२:८
- Cross-reference यसै ५५:६; यर २३:२३
- Cross-reference उत १:२७; यसै ४०:१८-२०; ४४:१०-१७
- Cross-reference भजन ९:८; ७२:२-४; ९६:१३; ९८:९; यसै २:४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.